買完魚就返屋企倒數最後時光了。行李唔使執,因為根本無開過啲乜出嚟。媽媽整魚,兩個姐姐繼續逼我一齊同啲古董影相,頂。
客廳真係誇張
佢地逼我擺埋呢啲鳩pose
好彩張老虎皮假嘅只係毛公仔咁樣
兩個姐姐其實年紀都唔細,喺香港實俾人當老姑婆。但好幸運地佢地雙親咁西化,根本就唔急嫁走兩個女,只係好想佢地嫁俾外國人。爸爸做建築師搵錢好撚多,佢地兩姊妹返工都似係賺錢買花戴咁,見佢地Instagram,Sanaz姐姐就多係食好嘢,Sonia姐姐就日日飛車咁滯,間唔中仲多幾個靚女一齊開P咁。
爸爸真係好鍾意外國人,仲繼續問緊我有無興趣識佢個仔。如果我係仔你問我追唔追你個女我應該𦧲飯應,只係煩要邊個。
咋一聲嗰幾條魚就變成咁
其實味道唔差,只係我太鍾意蒸魚,同埋硬係覺得佢地係一早熱死喺魚溫泉到
呢餐就係我喺Karaj、姐姐屋企同伊朗最後一餐
食飽嗰下Sanaz姐姐問我可唔可以改遲張機票,我沉默咗
。嗰下覺得好唔好意思,佢咁期待我嚟,我竟然留得唔夠廿四個鐘俾佢,但佢地都對我咁好特登去買魚整魚咁。
我又真係打咗去問改遲要補幾錢。
但係改機票呢啲咁戲劇性咁貴嘅嘢點會發生喺我身上。
爸爸話唔緊要啦,你下次嚟要第一站嚟我地到,唔好最後一站先嚟喎!
到差唔多時間去機場時,媽媽俾咗盒嘢我
驚我夜啲肚餓
然後就坐的士返德黑蘭機場了。