內容有少少改動。
-
是咁的,上上年2015年6月尾去咗伊朗一個月。
適逢伊斯蘭教齋戒月,對伊斯蘭文化有一個好好嘅體驗。
補返少少前言:
去伊朗之前,已經一個人去過尼泊爾、斯里蘭卡、土耳其(剩係伊斯坦堡,之後同當地朋友一齊去巴爾幹半島)。除咗尼泊爾,全部都係玩couchsurfing。所以唔係一嚟就一條友揀伊朗呢類冷門(而家都唔冷喇)嘅地方去,亦唔係一去伊朗就咁大膽玩couchsurfing
點解會揀伊朗?
首先係唔少前人去過後大讚,同伊朗以前喺大眾心目中嘅形象大相逕庭,令我非常好奇。
第二,雖然無信教,但幾鍾意去認識宗教文化。伊斯蘭近年最為爭議,去斯里蘭卡同土耳其時都認識唔少穆斯林,咁就諗不如去下伊斯蘭起源地認識下( 未去之前係咁以為,當然去到就知有分唔同教派之餘,唔同教派之間仲好大仇口)。
當時揀緊去伊朗定去蒙古好,比較緊機票同火車票時,見到以下呢張相。
The Atlas of Beauty一張喺伊朗Shiraz Nasir al-Mulk Mosque 拍攝嘅作品。
The Atlas of Beauty 係羅馬尼亞女攝影師 Mihaela Noroc嘅攝影計劃,走遍世界各地找尋各地的女性面孔。
睇到張相,亳不猶豫揀咗伊朗,即刻訂機票。
平時除非同人一齊去旅行,否則都幾乎零計劃,訂咗機票就走人,所以我連當時係齋戒月同咁熱嘅天氣都唔知。
零計劃有好有壞,都中過唔少伏,但我相信無計劃咁去感受生命帶俾你嘅驚喜(嚇),好有活著嘅感覺。當然唔係人人都鍾意,不過後生傻下老咗感覺人生不枉過。