遊記寫到嘅呢一日,係伊朗同歐美就核武斡旋會談嘅最後一日。
本來打算今日離開Shiraz,但尋日Ashkan同奇怪仔叫我留多一日。佢地話如果今日達成共識有結果,會係歷史上好重要嘅一日。全國可能會大肆慶祝,因為呢個會談對伊朗人嚟講非常重要,係伊朗重見光明不再封閉嘅開始。
可能你話全國慶祝咁去邊到都有慶祝啦,但佢地話Shiraz呢個大城市慶祝一定更好玩
,只僅次於Tehran。一聽到個玩字,我即刻投降啦
,決定聽日再走。
於是今朝起身,佢兩條友對住個電腦留意住會談嘅進展。等等等等等到下晝終於有結果,當下Ashkan同奇怪仔電話立即響個不停,因為全伊朗不停轉發緊呢個好消息。網絡立即癱瘓,伊朗本來上網就慢到仆街,而家直程上唔到網。
去到夜晚搭車出市中心一齊慶祝,點知未入到市中心已經大塞車。Ashkan話伊朗人其中一種慶祝方式就係將啲車揸晒出街
。伊朗亦真係好鬼多車,因為油價好低。喺架泥鯭的焗咗超過半個鐘,忍唔住落車行。
落車沿住Highway向住市中心方向行,沿途好多人同我講Welcome to Iran
、好開心咁同我(用日文)打招呼、同我握手,仲有人同我講多謝我同佢地一齊見證呢個日子
。
仆街多人到
呢晚係我去咁多次旅行最難忘嘅一晚。