究竟點解Ashkan唔想我一個人去Persepolis呢?前面有巴打講過伊朗的士司機好乞人憎,呢個就係原因。Ashkan叫我回程最好hitchhiking,首先佢唔放心我一個人搭的士,驚個司機唔知車我去邊到,第二就我肯定會俾人劏。
一到出口,已經有好多的士佬對住我大叫taxi taxi,我耍手擰頭然後坐喺馬路邊休息下,同留意有無一家人準備走,因為Ashkan話痴一家人嘅車容易同安全。有個的士司機行埋嚟撩我講嘢,問我去邊呀又叫我上車,我都好有禮貌咁話:唔駛,我等緊朋友。點知佢無走開仲問我:等邊個呀?去邊呀?不如上車啦。平時我可能就咁行開就算,但呢一刻又熱又攰
,我想坐喺到,唯有擰轉面唔理佢,等佢識趣行開。吖屌你老味佢仲問我做咩唔出聲。然後好似錄音機不停播你要去邊呀?等邊個呀?上車啦。
咁啱呢個時候有個女人開車經過,我即刻狗衝過去問佢係咪返Shiraz。點知…
屌,佢同個司機講:喂佢要去Shiraz呀,然後踩油走咗。個司機即刻話我可以車你去呀,上車啦,我就話我唔想一個人坐,然後急步走開。
事後諗返點解唔直接答佢我無錢,嗰下真係無諗到。可能因為我唔係無錢,只係覺得一個女仔入黑後求其上架的士唔安全。去程個司機係Ashkan介紹,所以就無問題。
佢追住我話 I work in Persepolis. I am a good guy. Why don’t you follow me?
我見到有一家人準備走,即刻狗衝過去問佢地可唔可以車我。佢地係外國人,唔識講英文同波斯文,但見到我個樣好似撞鬼咁加上有人喺背後追住我都肯車我。點知真係估你唔到,個司機伸手擋住車門唔俾我上車!然後同佢地講no, no, no, she should, taxi, taxi, taxi…
然後個家人為免麻煩就開車走咗。我嗰下忍唔住大嗌I don’t want to! 或者佢可能真係一個好人,但佢伸手阻我上車嗰下我真係無晒耐性兼失去理智
。我大嗌完之後有個叔叔走嚟幫我,我解釋完佢聽,佢打發咗個司機之餘,仲搵到一對唔識英文嘅伊朗情侶可以車我返Shiraz。
上車打咗個電話俾Ashkan簡單講下發生咩事。佢同對情侶講好邊到放低我,Ashkan話對情侶叫我唔使擔心,瞓陣抖抖。
到我再擘大眼已經返到Shiraz。