春泥
2018-10-18 00:02:42
救護員把我推向手術室,躺在床上的我瞧著天花上的燈不斷向後倒退,耳旁響起了房侍農的聲音:「頂住啊!阿志!」
然而我的意識開始變得模糊,一股倦意襲來,眼皮變得很重很重。
「victor!victor!」
我發現自己坐在電腦前,電腦屏幕出現了關於倫敦金的陰陽燭圖表,一支突兀的大陰燭連穿數個支持位。
我向四周打量一眼,發現有三人站在我身後,那三人分別是Day、Billy、Paul。
Billy道:「victor,你依家爭人幾十萬,你點還啊?」
Paul道:「你三十幾歲人,等你還清晒所有街數,都唔知要幾多年啦?」
Day道:「victor,係我導你借錢;係我叫你係高位揸CALL;係我叫你將你個買賣同公司對賭啊!但係你唔可以怪我啊!要怪就怪你自己,你又貪心又蠢,唔呃你呃邊個啊?我知你恨不得殺咗我,但係你依啲又無用又無膽嘅人,最叻都係自殺啫!」
「你個仆街,同我收聲啊!」我舉起了電腦屏幕扔向阿Day。
當電腦屏幕觸及阿Day的時候,四周的環境倏地一轉,我身處酒樓的宴會廳。
有多雙眼睛打量著我。
宋蓮道:「成皇志,我地依到所有人都生活得好好!生活得最差嘅就係你。」
成敏研道:「小志,我仔女都有三個喇!你仲係咩都無啊?」
林海原道:「你唔係咩都無,你仲有一身債務!」
陸永祥道:「我係成績差,我係毅進仔啊!但係依家我係阿SIR,你係咩野啊?」
面對他們的步步進迫,我只能節節敗退。
此時,場景再次轉變,我身在力寶廣場的天台,面前人潮如堵,我不斷後退,可是我發現身後再無退路,再退的話便要由數十米的天台墜下。
從人群中,我看到管佳莉,我向她揮手求救,可是她抱著女兒轉身離去。
正當我要被人潮迫離天台之際,一隻手穿過人潮,抓著快要墜樓的我。