我們一行人走出了那荒廢的校舍,我感到全身乏力,暈眩的感覺比剛才更甚。
陳依官道:「仲有架的士未走啊!尚興國,你帶佢去醫院先啦!」
布正麗打開了的士的車門,司機看到我的狀況,愕然道:「嘩!佢做咩搞成咁啊!流咁多血容乜易會整污糟部車架?你地都係搭過第二架啦!」
布正麗扠著司機的脖子,怒道:「你快啲開車,車我地去醫院啊!如果佢有乜冬瓜豆腐連人帶車打爆你啊!整污糟你部車,最多畀多兩舊水你。」
十多人滿面怒容地瞪著司機,司機只好妥協,道:「咁你肯畀多兩舊水我,自然無問題啦!靚女,妳放手先,唔好咁勞氣。」
布正麗把我扶進了車廂,我想起了一些事情,道:「得一架車咁你地點啊?我驚湯仲謀改變主意,衝出嚟搵你地算帳。」
陳依官道:「布甸、楊鳳瑤,妳地同成皇志去醫院先啦!成皇志講得啱,此地不宜久留,我地依啲男丁依家跑落山,到咗大路再轉其他車去醫院。」
布正麗道:「成皇志,你放心啦!有陳依官睇住佢地,佢地會無事架!」
我吃力地點了點頭,楊鳳瑤道:「司機,仁濟醫院,快啊!」
的士啟程,向著仁濟醫院的方向駛去。
楊鳳瑤瞧見我的慘況,泫然欲泣道:「成皇志,早知我就報警,唔好搵陳依官啦!都係我累到你同布甸。」
我搖頭道:「唔係啊!今次妳做得好好,如果你搵警察,警察唔會快到過陳依官。」
布正麗擔心道:「成皇志,你傷成咁,抖下啦!好快到醫院架喇!」
可能失血過多,我的意識開始變得模糊,我要找些事情說說好讓自己清醒一點。
我道:「記唔記得上次8座,我地幾驚險啊!我差啲畀沈雲樂殺死,好彩布甸妳喺佢後面一刀劈落去,佢先殺我唔到咋!」
楊鳳瑤察覺到我不妥,她道:「上次咁危險,我地都可以過到嗰一關,今次都一樣,成皇志,你堅持住啊!」
我語無倫次道:「布正麗,妳成日都咁衝動,不過我之前欠妳嘅人情,今次當還番畀妳。」
布正麗道:「我同你嘅帳有排都計唔清,等你好番我地再計過喔。」
我的眼皮變得很沉重,我道:「我好凍…好攰,好想…瞓返覺。」
布正麗摟著我,拍打著我的臉道:「成皇志,你唔好瞓啊!」
楊鳳瑤催促道:「司機,點解仲未到醫院架?你開快啲啦!」
司機道:「開得好快架喇!再快,我地全部都要瞓醫院架。」
我感到一顆淚珠打在我的臉上,布正麗和楊鳳瑤的臉容變得模糊,最後我眼前的景象變得漆黑一片。
***
當我甦醒過來,已經是另一個一千年的開始——2000年1月1日早上。
阿公阿婆收到醫院的電話時,都著實嚇了一跳。阿媽與他們一同到達醫院,那時我還是昏迷未醒,醫生對他們說我沒有生命危險,他們才鬆了一口氣。
他們擔心了一整晚,見我終於轉醒才鬆了一口氣。
阿媽問:「阿志,究竟發生咩事?醫生話你兩隻腳板都畀利器割傷?」
一直以來,我都沒有向他們提及關於湯仲謀的事情,連上次阿興與榮仔被湯仲謀的手下追打的事情我也沒有說,就是不想他們擔心,現在我又沒有能力突然間去編一個合情合理的故事蒙混過去,只好道:「媽,我好攰啊!我想瞓啊!有咩野遲啲再講啦!」
阿婆道:「咁我地走喇!聽日煲啲雞腳湯畀你補下。」
「哦!好啊!」
阿媽他們離開了不久,那名當初我誤以為是白無常的黎柱國醫生來巡房,他瞧見我,神色不善,搖了搖頭道:「點解又喺到見到你架?」
我聞言不禁吐了吐舌頭,自從回到了1998後,我也數不清來過這裡多少次了。
黎柱國查看我的病歷,他皺了皺眉頭,道:「你兩隻腳板都被利器割傷,究竟發生咩事啊?」
我面有難色,黎柱國搖頭嘆道:「身體髮膚受諸父母,你應該要好好愛惜自己身體先係,你受傷入醫院,一來令父母擔心,二來加重香港醫療體系嘅負荷,希望今次係最後一次喺到見你啦!」
我問道:「醫生咁我係咪好快可以踢波跑步啊?」
「你仲諗住踢波跑步啊?你要截肢架!」
我聞言大吃一驚,激動道:「要截肢?無理由架醫生!」
黎柱國臉上現出狡黠的笑容,道:「你知驚嘅咩?你今次好彩,差少少就割斷條動脈,如果傷口受到細菌感染,你真係要截肢嗱!」
我如釋重負地拍了拍心口,道:「嘩!醫生,你講笑搵第二樣喔!真係畀你嚇死啊!」
「你最少抖番一頭半個月,唔好做劇烈運動,游水、跑步、打波統統都唔可以,知唔知啊?」
「OK!」
黎柱國離開後不久,自強會的同伴來到醫院探我,由於人數眾多的關係,他們分開數批進來病房。
一批又一批進來,我向他們說我沒有大礙,要他們不用擔心。
陳依官道:「成皇志,依件事你打算點處理啊?」
我想了想,才道:「我覺得依件事,就算我地報警都未必有用,我受嘅傷係我自願行過去帶布甸走而做成嘅!」
陳依官點頭道:「有依個可能性,如果話佢擄拐布甸呢?」
「依層睇布甸意願。」
陳依官見我沉思,問道:「成皇志,你其實係咪有啲咩打算啊?」
「可以話有啲眉目咁啦!」
楊鳳瑤道:「陳依官,你畀成皇志抖下啦!依啲野等佢好番先再講啦!」
輪到飯桶武、矮仔文與萬季常進來,飯桶武一瞧見我,立時歌頌道:「會長,你今次真係好鬼型啊!…(下刪一千字)。」
矮仔文與萬季常都對飯桶武的頌辭點頭贊同。
雖然被別人讚賞是一件樂事,然而他們三人實在有點兒太過份,我道:「我有啲攰,想休息下。」
矮仔文道:「哦!會長,咁我地走先喇!」
三人轉身離開之際,我卻道:「等陣,你地三個係最後一批嚟探我嘅人?」
萬季常回頭,道:「係啊!咩事啊?會長。」
我聞言有點失望,道:「無哦!問下啫!」
布正麗沒有來探望我,我躺在這裡,都是因為救她,一念及此,我不禁感到失望及難過。
算了吧!我是自願救她的,又不是為了什麼報酬才救她?
就在此時,我一直期盼的布正麗終於出現在我的面前。
布正麗打量了我一眼,道:「醫生點講啊?」
「無乜大礙,佢話依排唔好做運動住。」
我瞧見她額上滲出一些汗珠,而且呼吸有些急促,她應該是趕過來的。
「咦!其他人呢?」
「佢地啱啱走咗。」
布正麗把手上的紅色塑膠湯壺放在茶几上,道:「你對腳傷咗,我煲咗啲花生雞腳湯畀你以形補形。」
布正麗乘了一碗給我,我嚐了一口,布正麗的廚藝挺不錯。
布正麗瞧了日曆一眼,道:「成皇志,新年快樂,希望你新嘅一年一切都順順利利。」
我笑了笑道:「歡迎妳嘅到另一個一千年嘅開始。」
她亦笑了笑道:「可惜你錯過咗由一個一千年橫跨到另一個一千年嘅歷史時刻。」
我搖了搖頭,道:「其實我之前經歷過,都無乜特別啫。」
布正麗訝道:「唔通你係宋朝人?咁你咪成千歲?」
「又或者我係回到過去,經歷咗兩次公元2000年嘅1月1日呢?」
布正麗噗哧一笑,道:「你講笑嗰樣都咁認真嘅?」
我笑了笑道:「咁都畀你識穿我講笑添。」
布正麗陪我說說笑笑,直到探病時間結束,她才離去。
布正麗離開後,我的心思便放在如何對湯仲謀作出反擊的一事上,這次他放過我們,並不代表他就此罷休。