春泥
2018-07-05 01:13:14
布正麗哽咽道:「我…依世都會記得嗰日喺醫院見返琛琛嘅情形,嗰班禽獸唔當佢係人,將佢虐待到不似人形。搞到琛琛咁慘,佢地仲唔肯罷休,喺佢住緊嘅地方,四圍去貼街招唱衰佢,最後佢頂唔住跳樓自殺…佢好痛苦,我乜都幫唔到佢。」
布正麗說到後來已經泣不成聲。
儘管布正麗只是以幾句說話去覆述過去,但局外人的楊鳳瑤還是感到很震撼,她感到顧琛琛的絕望,亦感到布正麗的悲傷,可是她難以相信對她很溫柔的湯仲謀會做出這些泯滅人性的事情,而且對方還是他曾經愛過的人。
布正麗拭去了淚水,道:「湯仲謀唔會對妳忠貞,佢出面好多女人,佢利用佢地對自己嘅感情,去達成一啲目的。妳唔好以為自己與眾不同,嘗試去感動佢,琛琛就係有咁嘅諗法,結果佢失去咗一切。楊鳳瑤,我唔希望睇住妳成為第二個琛琛。」
少女情懷總是詩,湯仲謀長得酷似楊鳳瑤的偶像瀧澤秀明,而且他又是她的初戀,儘管他的背景很複雜,她還是覺得自己可以用愛來讓對方走回正軌,所以她難以認同布正麗的說話。
楊鳳瑤輕聲道:「布甸,其實我一早已經當咗你係朋友,我以為可以解開妳同湯仲謀之間嘅心結,睇嚟依家仲未係時候。」
楊鳳瑤轉身離去,在布正麗眼中,楊鳳瑤的背影仿似與顧琛琛重疊。
布正麗道:「楊鳳瑤,我都當妳係朋友,所以我唔希望妳好似琛琛咁,妳明唔明啊?」
楊鳳瑤聞言只是略為停步,然後她便沒有回頭、一言不發繼續朝樓梯走去。