國泰嚇機暴雨試降失敗急升千米　空中盤旋兩小時　乘客尖叫狂嘔

我會同隔離條女講
反正都就死
可唔可以執返劑先？

Feel bad for your experience ，希望睇完呢個 post，或者了解完唔同天氣對飛行嘅影響，可以安撫到你少少(只係少少咁多)

颱風同今次係兩種唔同 weather

颱風係較大形(橫跨幾百公里)嘅天氣系統，八號風球嘅風力一般可以一早預測到(LA起飛之前已經知)，所以一般都會帶定多好多油(盤45 分鐘+ 試兩次 landing + divert 去台北 + 30 分鐘後備)

今次4 月30 號嘅壞天氣，只係一舊幾公里闊嘅雷雨區，雖然事前可以預測到有機會有壞天氣，但係未必講得實幾點鐘出現，即使你新加坡起飛只係4個鐘前嘅事。雖然油係一定會帶定足夠，但機師未必能夠一早同你講定天氣一定一定會好差，真係要去到臨場先知。埋到嚟又要避 weather 又要同控制塔講數又要重新set 過晒電腦，機師好鬼忙，安撫乘客係佢嗰刻最 least priority 嘅工作。得閒嘅話咪開咪講兩句，都好睇嗰別機師嘅 style，同一間航空公司之下唔係個個機師都咁好或者咁差，只能講你當日遇到一班唔係特別好人嘅機師

講返4 月30 號晚嘅天氣，其實前一個鐘頭後一個鐘已經好大分別，你班機如果本身夜晚8點幾或11 點幾到香港，係完全 smooth 無問題，真正壞天氣影響只係9 點幾10 點嗰段時間，你咁啱撞正嗰一個鐘嚟到香港嘅上空

當然，雷雨區過後個天空大塞車，要盤旋一段時間先有得 land，令到好多機失預算唔夠油，例如台中嗰班UO183 其實連第一次 landing 都無試過，淨係喺天空轉轉轉，轉到再唔走就唔夠油去台北，就果斷決定去台北。嗰班機全程 smooth，冇九宵驚魂。

你嗰班新加坡係最慘，全機乘客唔一定個個都有簽證可以入中国境，所以去咗深圳都無得倒客，無得安排酒店，你焗住喺機上等，直到有另一班機嚟接濟你。所以一等就要等到第朝

======

睇到呢度(如果你仲睇緊)你可能會問，點解上海嗰班CX341(divert咗深圳)同埋UO183(divert咗台北)都可以喺當地補一補油，凌晨兩點幾左右就返到香港，你嗰班要等到第二朝10點先有得飛，仲要轉坐另一隻機呢？呢個就已經去到Operation層面，唔關天氣影響事啦。法例上有規定每一班執飛嘅團隊嘅工作時數有最高上限，超過咗某個時數再工作，機師空姐都會攰，需要休息，如果夾硬要佢執行任務，可能會影響航空安全。

喺航空公司(蝕少啲錢)嘅角度同乘客想快啲去到目的地嘅角度，其實都想快啲返香港，不過法例要保障航空安全，超咗時就冇得傾。航空公司一定要安排另一班機師空姐團隊，當日未工作過(啱啱休息完)，嚟執飛呢班只係唔夠一個鐘嘅深圳往香港航班。

計一計數，一班由香港起飛新加坡4個幾鐘，再飛埋回程，計埋 delay/divert，你嗰程機land咗深圳之後，班 crew已經返咗成10 個鐘頭工，長過一般 office 工，長過上海來回/台中來回。所以新加坡來回會「爆鐘」，上海/台中 來回唔爆。

機師係咪可以講多啲嘢，多啲宣布？係嘅，不過佢都一齊等緊急症，公司幾時安排到另一隻機另一班 crew，唔係佢話事，佢都係等公司安排

多謝巴打咁詳盡既回覆同解說，真係學到野

我exactly係大約21:30-22:00就係正香港上空，食正最惡劣既時間

不過原來唔補油再飛返香港係咁解，長知識

Ching勁能型