我見布正麗一臉沉思的樣子,不禁問道:「妳成個諗樣咁,諗緊啲咩野啊?」
布正麗道:「成皇志,我諗返起成件事,真係好似范倚敏咁講好多巧合,我收到阿芳嘅外賣電話,原來就係周平泰屋企,之後因為收到靜宜電話話莉莉唔見咗,就折返去周平泰屋企;而你就因為學生會會長失蹤,就同楊鳳瑤一齊去周平泰屋企,唔通真係琛琛在天有靈,要我地去救范倚敏?」
「聽妳咁講又好似係喎!咁其實都幾好喔!善惡到頭終有報,有啲人做咗壞事,避過咗法律制裁,但避唔過個天,如果真係有個無形嘅主宰,去審判世間嘅善惡,我覺得對生活喺依個世界嘅人會公平啲、幸福啲。」
布正麗又道:「成皇志,我聽醫生講,范倚敏要去戒毒,而且佢出庭指證嗰三條友,可能又會面對琛琛相同嘅壓力,我驚佢最後都好似琛琛一樣。」
我搖頭道:「我覺得就算沈雲樂今次再貼街招,都唔會迫到范倚敏自殺,首先,范倚敏被禁錮嘅時間比琛琛短;其次,范倚敏係一個媽媽,佢個仔都未夠一歲,佢今次死過翻生,可以見返個仔,妳頭先都聽到佢講佢係幾咁掛住個仔架啦!」
「真係咁咩?」
我笑道:「或者有日妳做咗媽媽,妳就會明白咩叫母愛喇?母愛嘅力量係幾咁偉大,范倚敏會捨得佢個仔咁細過就無咗媽媽咩?」
「超!你講到自己好似有仔女咁?你生到仔咩?」
我咕嚕道:「搵個女人咪可以生囉?」
「喂!成皇志,你口噏噏,講啲咩啊?」
「無,我話我雖然未有仔女,但係我係我阿媽個仔,當然知道母愛嘅偉大啦!」
(待續)