我同男朋友都無父幹，住公屋，大家都係二十頭，佢細我少少
兩個都一邊讀書一邊返part time搵零用，我地都唔係大洗嘅人，返pt搵嘅都夠用
近排，有個親戚話介紹一個屋企有鋪頭嘅男仔俾我識，
我呀媽雖然知道我有拍拖（未見過家長），但就叫我考慮去見下個男仔，我話唔去，佢就講依家趁自己仲後生，應該要再揀下，
我話已經有男朋友，唔需要，佢就兜話係當識朋友姐，又唔係叫你同人一齊（心知佢一定係想我同個有錢仔一齊先叫我去）
我終於爆左出黎，話佢只係睇錢，點解我當初話拍拖佢就反對，佢話應該要認真讀完書先好學人拍拖，但另一方面依家人地有個有錢仔介紹就想我同個有錢仔一齊，佢根本就自相矛盾，貪錢。
佢就話只係想我生活好啲，寧願我同一個大過我，有經濟能力嘅男人一齊，一切都係為我好，但心水清嘅我知道我生活好就等於家人生活好過，個女識到個有錢仔，成家人仲可以靠個女升呢（生活過得更好）你究竟當個女係咩？
之後仲要講啲好難聽嘅說話，話我男朋友可能都唔係得我一個，佢可能會隨時揀第二個（我相信男朋友好愛我）
當然，我都知個有錢仔可能都係俾屋企人逼同人地相睇，佢都未必想，我唔係怪佢地一家人，而係失望點解我有個唔顧女感受，貪錢嘅呀媽。仲有一定唔可以俾男朋友知道，會傷佢自尊心，加上近排同佢因為其他事嘈過，我真係好煩，感情同親情一次過打擊我
阿女，恕我老餅講句，有冇發覺紅字嗰兩句野都係「你心諗」，事實上你阿媽係咪真係你諗得咁負面、咁賣女呢？
我明白二十出頭嘅妹妹，一墮入愛河就好易「愛情就是唯一」、「反我條仔嘅都係衰人」，不過，你先問一問自己，你同你男友有冇諗過做人世先？
如果有，咁其實你阿媽就算想你識下個有鋪仔，都唔錯得晒喎。
你第一句話「一邊讀書一邊pt搵零用都夠駛」，你而家就得囉。到你地真係結婚時，大家有無計劃去令自己有能力建立一個家庭先？
唔講買樓、生仔咁離地啦，兩公婆租樓都要卦？普通租間劏房都七、八千啦。仲有每期水電煤，一到夏天，每期電費可以係二、三千的。到時，就唔係一句「有情飲水飽」就解決得到的。
你阿媽經歷過建立家庭嘅階段，明白咩叫「貧賤夫妻百事哀」，想個女認識下一個經濟條件較好嘅，做個朋友睇下有冇發展機會，你或者會覺得呢套好老土，但好難否認你阿媽係想你日後過得無咁辛苦，錯唔晒的。
我上面咁講，好似企晒喺你阿媽嗰邊，聳恿埋一份叫你去識下個有鋪仔咁。不過，我其實無呢個意思。
如果你真係好愛你男友嘅話，就應該同你男友傾下將來計劃，而你男友亦show到日後會愛你、照顧你嘅決心。當然，呢份決心仲要比你阿媽知道同睇得到（尤其你男友仲未見家長）。大部份阿媽只要見到個未來女婿係正直、錫自己個女、有擔戴嘅話，就算一時三刻都仲覺得「自己個女可以揀更好」都好，遲早都係會接受到你男友、唔會再煩你的。
講多句封埋後門。
或者會有巴絲、甚至阿女你，可能會話「愛情係兩個人嘅事，其他人有乜資格管我？」
不過，除非你預咗為愛情斷六親啦，否則........唔好傻啦，一段認真嘅關係，最少會關「四大長老」事。
阿女，祝你好運啦。
我都係一時激氣得濟先覺得佢唔好，但可能佢真係為我好，自己因為嫁左俾老豆辛苦唔想我步佢後塵。不過我都唔會去見有錢仔。
雖然我同男朋友依家仲細，將來會唔會因為其他事分手都唔知，但現階段我有決心大家對感情都好認真，更唔需要去見識其他人，覺得為錢去識人好cheap,寧願自己努力搵錢，同男朋友一齊儲錢好過。
