20-07-2022 Day 34 Ananuri Gudauri Stepantsminda
其實高加索並唔係淨係指阿塞拜疆亞美尼亞同埋格魯吉亞
依三個國家之不過係南高加索
格魯吉亞北面嘅大高加索山就分隔開南同北高加索
北高加索本來都有好多國家 但係而家已經變成俄羅斯嘅領土
來到格魯吉亞 一定要去去北面嘅地方行山
今日呢個團 就係去一個北面嘅地區Kazbegi
琴晚好夜先返到Tbilisi 今日一早又出發
之前喺亞美尼亞識嘅加拿大香港女仔都會一齊join
第一個景點Zhinvali 有啲西貢嘅感覺
回家了
見到呢個韆鞦好想玩
但係原來係要畀錢 大概十蚊港幣玩一次
不了
嚟到呢度因為向住高海拔出發
所以有啲涼
第二個景點 Ananuri Fortress
係啱啱個湖邊嘅一個堡壘
入面嘅教堂仲有幾百年前嘅壁畫
即係蘇聯時代 因為共產黨唔鍾意宗教嘅關係
所以成幅的話畀人覆蓋咗 救得返嘅只有呢part
格魯吉亞都係東正教國家
本來去Kazbegi只係想去一個行山城市Stepantsminda
同埋冇諗過跟團
但係上網見到呢個堡壘幾靚
交通又唔係好方便 就決定跟團
喺Stepantsminda離團留一晚
因為時間緊迫 特登好趕咁行咗去影相位 影低呢幅相
如果有時間可以慢慢探索呢個堡壘
逐漸消散嘅陽光
睇完就去咗間山中隱世餐廳
雖然話Kazbegi出名Khinkali
但係我都係覺得阿美利亞嗰度嗰啲好食啲
食完飯之後就去第三個景點Gudauri
呢度冬天係一個滑雪城市 沿途見到好多Resort
但係夏天嚟講 唯一嘅景點就係Russia–Georgia Friendship Monument
好寫意嘅羊
呢個Russia–Georgia Friendship Monument 起嘅地方都係好有諷刺意味
呢條路Georgian Military Highway
點解叫Military Highway? 因為由古到今俄羅斯人入侵格魯吉亞都係經過呢條路
順帶一提 好多貨車都係經呢條路來往俄羅斯
但係佢哋都只可以夜晚先行 所以晏晝經過呢度就會見到好多貨車泊咗喺一邊
呢個紀念碑係蘇聯時代1938起嘅 紀念Treaty of Georgievsk 200年
1783年格魯吉亞王國同沙俄簽定咗Treaty of Georgievsk
如果格魯吉亞受到襲擊 俄羅斯會派出軍隊幫助抗敵
之後波斯真係入侵格魯吉亞 但係俄羅斯無動於衷
最終和螺絲係1801年派兵入格魯吉亞彈出係為咗入侵格魯吉亞
估唔到蘇聯時代仲有問題返呢條條約
導遊話呢個紀念碑啲畫係本地藝術家創作嘅 都有暗串蘇聯
你可以見到左手邊蘇聯人好似機械人咁 但係右手邊隻夾魯吉亞人係比較有生氣
喺格魯吉亞join兩個本地團 都係同一間公司
而佢哋嘅共通點 都係好憎俄羅斯 咁都好正常嘅
搞笑嘅係 佢哋一個就因為有太多亞美尼亞入境章 所以入阿塞拜疆嗰陣畀人遞解出境
而另一個就係因為有太多阿塞拜疆入境章 所以入亞美尼亞嗰陣畀人遞解出境
由格魯吉亞呢個中立國家 都可以睇得出阿塞拜疆同阿美尼亞嘅緊張情況
雖然話就話中立 但係格魯吉亞係比較親阿塞拜疆 一方面佢有石油
另一方面格魯吉亞唔係好鍾意亞美尼亞咁親俄
呢度開始好凍 睇咗一陣就要走
去到最高點好似有成三千幾米
再加多陣終於到今日嘅重頭戲Stepantsminda
喺個town仲要坐四驅車上去聖三一教堂
"鄧"到痴線
嚟到呢度開始有少少後悔跟團 因為佢話得半個鐘可以遊呢度
雲海
重中之重 聖三一教堂
格魯吉亞啲教堂都好鍾意係喺山上面
雖則話入教堂都要著長褲 但係好少見有教堂真係會enforce
呢度真係要 睇嚟真係好重要
好彩佢有啲布畀你包住隻腳
入面唔可以影相亦都冇咩特別
嚟到呢度好想影到張經典相 就係聖三一教堂嘅背景有一咋雪山
可惜時間唔夠 去唔到嗰個觀景台影 唯有寄望聽日好天可以行山上嚟
如果好天嘅話呢個方位可以見到Mount Kazbek
格魯吉亞境內最高嘅山
好似畀人趕羊咁好快就落番個town
回望啱啱山上面嘅聖三一教堂 已經開始烏雲密佈
希望聽日會有好天
最後一站Rooms Hotel Kazbegi 係一間喺呢度好出名嘅酒店 一晚間房都成二千蚊
諗極都諗唔明點解唔嘥多啲時間喺山上面 要落嚟呢度嘆下午茶好似hea時間咁
之後旅行社問我攞呢個團意見 我都同佢講番其實可以留多啲時間喺山上面
佢答返我話其實嗰啲四驅車都唔係平 喺有限嘅價錢之下 果啲司機淨係會留30分鐘
喊出嚟 其實山長水遠嚟到呢度 畀貴啲團費都冇咩問題 好過而家咁樣咁趕
Anyway除咗呢樣嘢之外其實個團都唔錯
之後飲咗一杯chacha 係格魯吉亞版嘅vodka 但佢有好多唔同水果味
hea完之後 導遊就drop低我喺今晚住宿
係一間家庭式經營嘅airbnb
如果好天嘅話到而過境會好靚
霧鎖深山
因為高海拔嘅關係行多幾步都喘氣
約咗香港女仔食餐飯
間餐廳都係家庭式經營 個餐牌係固定嘅冇選擇
格魯吉亞版omakase
食完飯天都黑曬 竟然收到airbnb message
問我喺邊 擔心我有事發生
好鬼有心