[有圖少字]中亞高加索5個星期遊記

Btw 唔怪得你個名熟口熟面
你個遊記幾時寫完？
我記得我同你差唔多時間去南美同南極

08-07-2022 Day 22 Tehran

今日最後一日喺伊朗
一日遊德黑蘭
德黑蘭係伊朗近代Qajar皇朝嘅首都
所以呢個城市就代表伊朗近代嘅歷史


因為喺大城市call的士等好耐
嚟到呢度咁耐都冇咩搭過公共交通工具
所以今日都係主要靠地鐵


呢度地鐵一蚊港幣都唔使 而且成個感覺幾整齊
其實係唔使錢因為我早得滯 年收費嗰條友都未返工
個站長直情叫我直入


車廂都幾整潔


地鐵站到有人叫我幫佢影相


連個站都有裝飾


第一站亦都係成個伊朗最貴嘅景點
佢個皇宮係一part一part咁買飛 總共要成百七蚊港幣


本身諗住覺得唔夠cash所以唔租audio guide
但睇完第一part 都係返去租
點知原來係用電話download app 畀錢係只不過佢幫你download
有啲覺得畀人水咗嘅感覺


之後入面又有個陵墓


呢個皇宮係更改嘅建築除咗伊朗風格仲融合咗歐洲風格


呢個平平無奇嘅陵墓 就變咗一個龍友位


話說無端端有個本地人叫我趴喺個定冇上面影相
跟住我又照做


影影下有其他本地人走埋過嚟一齊影
搞到我成個私影仔仔咁樣
點解佢哋咁鍾意懷念爺爺


影完我再搵個櫈坐低聽下阿audio auide
點知無啦啦有一對benz車隊向我駛埋嚟停車
跟住開門 個情景好似啲電影主角畀一大班特攻捉咁樣
原來係一群貴賓 有專人帶住參觀呢個皇宮 咁啱停咗喺我度者
平時呢個博物館冇咁多人 係有班貴賓所以搞到好熱鬧


呢個係一個畫展 入面啲話唔係話好靚


跟住再下個房就係收藏一啲皇帝嘅珍藏
呢個盒好似喺市集都見過


成個歐洲風格嘅大堂


跟住上二樓樓梯又變返伊朗風格


呢個曾經係擺放皇冠嘅地方
但有一日個皇冠畀啲僕人偷咗
個皇帝重要懷疑偷嘅人係整呢個皇冠嘅人
最尾發現原來係僕人偷嗰陣 即刻處決咗個僕人
但係整呢個皇冠嘅藝術家已經好不滿


之後個皇冠搬咗隔離嘅寶物庫 呢度收藏咗好多唔同嘅寶物年中國同日本來嘅都有
呢張相右邊成個菠蘿咁嘅嘢 就係個皇冠


近代嘅伊朗開始學習歐洲藝術 所以連啲地板都有歐洲風嘅畫作


鬥獸場


之後睇鏡宮
呢啲打碎咗嘅鏡造成嘅牆 亦都係伊朗建築嘅其中一個特色


跟住喺個花園度繼續行


聽聞呢個建築物上面住左一隻燕子 如果燕子飛走嗰陣就代表有壞事發生
對上一次應驗 係有人見到燕子飛走之後伊朗就發生大地震


其實成個皇宮我最鍾意呢個攝影展


話說當年其中一代皇帝好鍾意啱啱新嘅發明 相機
咁佢就周圍影相 最鍾意嘅係自拍
呢個可能係世界上最早嘅selfie影展
呢張就係佢嘅自拍照


呢張就係佢同佢啲後宮


又係另一個鏡宮


話就話全票但係唔知點解我有個場合入唔到
喺出面睇好似冇乜特別所以都冇加錢再入


最後睇埋個伊朗人習俗博物館 冇咩特別


之前睇過Argo嘅我 特登要去呢個地方
呢個就係前美國大使館


之前咪講過美國同伊朗關係喺70年代係幾好
但係經過伊朗伊斯蘭革命之後 新上任嘅領袖非常反美
佢激化咗好多年青人 其中一啲學生就衝咗入呢個美國領事館同埋挾持住入面啲人質
咁美國政府想盡方法救佢哋出嚟 呢個就係Argo
套戲就睇過就睇過 真係嚟到呢度有啲感動


除咗因為套戲呢度都幾值得嚟 因為佢好多壁畫 都諷刺美國係一個霸權主義
以正義之名輸出邪惡


好快睇完個前美國領事館就去最後一個景點
亦都係最有代表性嘅地標 Azadi tower
行緊過去嗰陣有個伯伯撩我傾偈 仲要拖住我隻手
話要請我去佢屋企食飯
可惜我夜晚就要走 如果唔係都可能會應承
同埋大家唔好以為男人拖住我隻手代表gay
其實佢哋文化係咁男同藍都會拖手 代表友誼


呢個tower 係1971年建成慶祝Persepolis嘅2500年


地底有個博物館 但係完全唔知做乜鳩


喺地下搵極都搵唔到𨋢 差啲想行樓梯上去
好彩問咗人喺個暗角位度搵到部𨋢
上面嘅風景好靚


另一邊係機場 本來以為我一陣搭飛機喺呢度 原來個國際機場喺另一個城市


其實個窗好細


睇完落樓下行行下無端端有嘢同我講嘢
差啲嚇親 原來係人工智能
佢可以同我完美對答 問佢問題都識答 幾犀利
唔知其實係咪背後有個操作員
因為佢第一句同我講英文
意見到其他本地人第一句就講伊朗話
諗極都唔明點解佢可以知道


睇完最後一個景點就係時候離開伊朗
鏡頭一轉已經去咗機場
準備去阿塞拜疆


呢架飛機係巴西做嘅 只要唔係波音或者airbus都有啲緊張
不過飛兩個幾鐘都係幾百蚊算啦

08-07-2022 Day 22 Tehran (Cont'd)

兩個幾鐘之後就到咗


即啪麥當勞先


阿塞拜疆首都Baku 第一個感覺好似巴黎


為期十日嘅伊朗之旅終於完咗 好慶幸係嚟咗伊朗而唔係喺塔吉克玩多十日
雖然好熱 雖然行程唔容許我受本地人邀請去佢哋屋企食飯
但係喺街上面佢哋嘅熱心幫忙 佢哋對你嘅好奇都令到我感受到佢哋嘅熱情
同埋感受到佢哋係真心想幫你 真心希望你喺伊朗有個好嘅經歷
唔似得埃及同摩洛哥嘅阿拉伯人咁樣 hello my friend即係代表準備畀佢呃錢咁解
雖然一早知道 但係都想同大家講伊朗一啲都唔危險 好多嘢都係因為比西方媒體抹黑
雖然呢度政府係極權政府 同埋喺中東都搞風搞雨 但係呢度嘅人民絕對唔係盲目順從政府
甚至好多人都話佢哋直情鍾意美國
點都好又平又有歷史又有建築人民又熱情嘅伊朗 係一個好值得嚟嘅旅遊地方
可惜嘅係我覺得伊朗人嘅文化 比阿拉伯人好太多 如果唔係當年伊斯蘭革命 呢個國家應該可以走得更遠

就黎完 唔捨得

仲有十三日

同烏克蘭一樣，地鐵又係整到好深

iran靚到
可惜俾垃圾宗教搞到咁

啲建築物真係靚到癲
仲有啲全景係沙黃色嘅建築物景點真係好正
真係好異國風情

其實伊朗係咪唔可以一個女仔自己去？佢哋啲嘢食係咪都係乾爭爭？

呢排整理緊戰利品 唔得閒update





頂佢georgia支旗用左美國georgia果支

伊朗唔算深
但係前ussr國家全部都好深

只可以講伊斯蘭教o既世俗國家冇大問題
係伊斯蘭教政教合一國家就係問題

係呀 女仔一個我覺得冇問題 不過要有d旅遊常識 唔好出夜街果d
我覺得伊朗野食乾淨 不過我垃圾土唔可以作準
去所度都冇痾過

我張地圖又係攪錯格魯吉亞旗
唔係用錯美國嗰支
而係明明白底紅十字變咗黑底紅十字

喊出嚟

Lm

09-07-2022 Day 23 Baku

第二朝一早出發
第一個感覺係終於唔使著長褲
第二個感覺係終於唔使用vpn
第三個感覺係呢個真係好似巴黎


hostel行幾分鐘就去到海邊
一早已經有人跑步 再睇下咁多人著短褲
confirm呢度係著得短褲嘅


離遠見到有人 諗住走過去叫佢幫我影相


點知去到
有冇巴打有眼科介紹


Baku象徵火焰塔


同埋海邊佈滿好特別嘅建築
Baku有錢全部都係因為佢有石油
有啲似高加索版嘅阿聯酋
但係呢度涼爽好多同埋開放好多
唔記得講第四個感覺係 由烏茲別克開始開始呢度係最涼爽嘅
因為超大風


呢度望住嘅就係裹海


三色國旗


之後又係奇特建築但係冇入
有啲似翻版悉尼歌劇院


去咗咁多日旅行都嚟唔開喺公園散步
不過呢個海旁真係好好行
雖然陽光好猛烈
但係好涼爽一啲都唔熱


行到仲有個地氈博物館


其實地氈嚟講應該波斯出名啲
但係呢個外型吸引咗我之後入去睇


Baku另一個地標處女塔


不知名歌劇院


如果唔係咁曬都想搵人同我玩下


行咗一陣
有啲肚餓 一路等free walking tour 一路食住嘢先
點知個walking tour來得三個人 唔計導遊
我問佢係咪因為肺炎搞到咁 佢就話其實不嬲都係咁佢都唔介意 因為呢度就本身少遊客黎


第一個景點就係入古城區一定經過嘅double Gate
以前呢度有內城牆同埋外城牆
但係因為要發展 所以外城牆拆咗
但係又留返到門 所以將道門裝落內城牆正門隔離
咁就變咗一個咁奇怪嘅景點


呢度都好多貓


新與舊


火焰塔做主角
影啲相都靚啲


跟住呢個係古城內為唯一嘅清真寺
如果我唔係跟住香港 一定會覺得導遊嗰陣講嘢好驚訝
因為阿塞拜疆係呢個區域入面最少宗教信仰
所以睇落好似係伊斯蘭 其實係冇人理
連禮拜時間都聽唔到宣禮塔嘅廣播
不過我呢個香港人聽到 都覺得習以為常
反而導遊話呢度雖然冇乜宗教信仰 但係好多人 特別係老一輩都好傳統
佢哋有啲都唔會鍾意人著短褲


之後導遊帶咗我哋 去佢喺古城入面最鍾意嘅風景
就係呢個位
因為呢個位可以見證咗Baku幾百年嘅歷史
最近嘅係幾百年前伊斯蘭嘅建築
跟住又有17 18世紀俄羅斯帝國帶來嘅建築
之後有蘇聯嘅務實人建築
最遠嗰度有20 21世紀嘅建築 都幾特別


嚟到呢度有導遊 梗係要問下亞美尼亞同阿塞拜疆嘅戰爭
一提起即刻好有火藥味
其實佢哋戰火嘅來源
係一個叫做Nagorno-Karabakh嘅地方
當亞美尼亞同阿塞拜疆比拼入蘇聯嗰陣
佢哋嘅國界係蘇聯定嘅 Nagorno-Karabakh入面有六成係亞美尼亞人 有四成係阿塞拜疆人
但係嗰陣蘇聯就將呢個地區或咗畀阿塞拜疆 咁大家喺蘇聯一齊嗰陣真係冇乜問題啦
但係1991年蘇聯解體嗰陣就係一個大問題
雖然呢個地方畫咗畀阿塞拜疆 但係因為本來多啲亞美尼亞人
所以佢哋就搞咗個公投 由阿塞拜疆獨立出來 並受到亞美尼亞嘅支持
但係嗰陣就觸發咗第一次亞美尼亞同阿塞拜疆嘅戰爭 嗰陣係亞美尼亞贏咗
咁阿塞拜疆一直想都搵機會反cup 一直增加軍費 再聯合土耳其 喺2020年嗰陣 就打到亞美尼亞仆街
之後我俄羅斯架介入 兩國簽咗停火協議 Nagorno-Karabakh大部分就歸返畀阿塞拜疆
好記得導遊話 "We kicked their ass"
之後去到亞美尼亞會聽到另一面


皇宮出面抖咗陣 其實阿塞拜疆係一個好新嘅國家 喺佢嘅歷史一邊最多都係呀有一個好強大嘅王國
仲要係係嗰陣伊朗嘅屬國 其實阿塞拜疆人同埋伊朗西部嘅人係同一班人


因為free walking tour 唔會入要畀錢嘅地方
所以抖咗陣就走
去咗我一個幾期待嘅地方 就係迷你書博物館
呢個地方係一個收藏家展出佢畢生收藏
佢入咗健力士世界大全 係世界上最多collection嘅迷你書博物館


有世界上最細嘅書


導遊話hidden gem係呢套迷你版莎士比亞全集


跟住下一個景點係叫做palace of happiness
講個好浪漫嘅護士畀你哋聽
話說二十世紀初 一個男人因為石油而變到好有錢
咁佢同佢老婆成日去歐洲 佢老婆都好鍾意歐洲嘅建築
跟住有一日佢哋喺Baku行行下 老婆就見到呢個咁靚嘅建築
就覺得如果可以住喺入面一定會好幸福
點知個老公下一秒就話 其實呢間屋係我特登起畀你嘅
因為咁樣 呢間屋就叫palace of happiness 而家喺婚姻註冊處






之後過幾年紅軍入侵 老公為咗保衛佢間屋唔畀紅軍佔領 所以殺咗闖入咗嘅軍人
之後佢知道難逃一死 所以自殺
完

完咗個tuner多有就帶咗我哋喺一間coffee shop度hea下
Ali and Nio喺伊斯蘭世界好出名 遲啲會再講


五湖四海嘅人一齊飲茶


坐咗一陣就去食lunch
右下角嗰啲叫Dolma 係一啲荷葉包住入面啲飯可以連啲葉一齊食


跟住又去返處女塔
雖然話係呢度嘅地標 但係其實佢點解叫處女塔 佢有咩用 同佢幾時起
全部都係一個謎
唯一知道嘅係有個傳說 話係本身一對情侶 個女嘅畀一個富商睇中咗
咁個女嘅擺脫唔到命運 就話要個副想起一座塔畀佢 起完住一排先肯嫁畀佢
用呢個方法爭取時間等佢本身嘅男朋友過嚟救佢
點知等咗好耐 個女仔聽到有腳步聲行上嚟 佢就以為係富商終於要強搶佢
咁佢就喺塔頂跳咗落去 點知原來個腳步聲係佢男朋友行緊上嚟準備救佢
因為有咗呢個傳說 不斷有好多人真係喺度跳樓
所以個頂有曬膠板 同埋有個警察喺度守住


去咗幾個國家旅行都見到好多G Class


跟住去咗皇宮 其實冇乜特別
唯一呢個模型幾靚


啱啱唔夠時間 所以encore咗迷你書博物館
入到去 個館主同佢屋企人家嗌緊交 嗌到拍曬枱


嗌嗌下佢啲屋企人走曬 佢又無端行埋呢 嚇親
原來係想介紹畀我聽
最後幫佢買咗本書仔 佢仲畀咗個親筆簽名我

09-07-2022 Day 23 Baku (Cont'd)

之後去咗Turkish Hamma 簡單啲嚟講就係中東式擦背同埋按摩
好爽擦完真係皮膚還咗
跟住食咗個本地菜


之後就去咗火焰塔嘅夜景
呢個城市因為石油而發達 所以火就變咗佢象徵


火焰塔上面就好似一個電視咁樣 不斷重複三組影像
國旗 火 同埋有啲傻鳩喺度揮動國旗
影相最靚都係啲火


去到天黑曬就返去

繼續寫緊
你啲相好靚

巴庫感覺一般

10-07-2022 Day 24 Baku

因為聽日一早要出團 所以驚冇機會買郵票
行過郵局竟然星期日有開 即刻入去買


首先去睇咗個政府大樓先
呢度唔似其他國家咁樣影兩張相就畀人趕
都幾free


大家有留意個f1 應該都會知道呢度係其中一站
我咁啱miss咗 好似上個月又比賽
不過我又唔係好好賽車 所以寧願條街少人啲


看台


又走咗去海邊 朝早嘅海邊仲更加靚
今次係琴日嘅另一個方向


donut型酒店 不過未開


今朝一覺醒來 發覺喺度有時間 忽發奇想
題外話 呢度入商場都要check疫苗passport
但個保安見到我準備喺個袋度攞出嚟嗰陣 已經話得啦得啦
WFC


話說咁啱雷神上緊 咁我又有排都未返到香港
所以就決定喺度睇咗
上次旅行睇戲 都係Marvel
喺東京睇蜘蛛俠2


張飛好貴成百七蚊港幣


不過係大班椅同埋包場


睇完戲 食個kfc先


跟住又驚海邊行去地氈博物館
中間經過唔知咩


其實有啲鍾意呢個景


公園入面其實都有一個景點
叫做小威尼斯 其實唔係好似


個地氈博物館除咗有冷氣外


冇乜特別


好快睇完 又call的士去睇地鐵站


行咗咁耐都係市中心都係好現代化嘅感覺
一出市中心外即刻有個好大嘅對比


比較local嘅清真寺


呢個地鐵站Nizami係紀念同名嘅波斯詩人
好似話係全個城市最靚嘅地鐵站 其實一般


啱啱講過好自由 點知過咗一陣我喺地鐵站影相就畀人鬧


返咗hostel攞個腳架之後 又出發去我第二個想去嘅景點
Heydar Aliyev center


Heydar Aliyev 係一個民望好高嘅總統
又因為呢度有錢 所以請得起Zaha Hadid幫佢喺呢個centre
聽講呢個係Zaha Hadid生前最後一個project


地下有名車展


Zaha Hadid好鍾意用曲線 但係佢啲作品全部都係華而不實 因為曲線會用好多位
不過華又真係幾華嘅


我將啲相send咗畀我做Archit嘅朋友 佢都話好想嚟


呢個center入面展覽好多 但係冇咩特別
最好睇都係迷你阿塞拜疆展覽 展示咗唔同嘅阿塞拜疆建築物嘅模型


梗係有火焰塔


之後因為六點鐘就閂 我就畀人趕咗出門 又要等到八點幾先影到日落
所以就去咗食飯先


又係阿塞拜疆傳統菜 食肉食到有啲厭


跟住之後又搭的士返返去
途中到個印度人 咁就同佢講下啲嗰陣我去印度嘅經歷


背面未開燈


夜景真係好靚


仲要畀我搵到湖面反射


影多一陣又係天全黑前就返去

Heydar Aliyev Centre嘅夜景有冇令你改觀?

原來我兩年前問過你呢個問題
你遊記都話最緊要影多d相ma

夜晚幾靚，係個國家西

哦原來你去過
點解你覺得佢好西?

11-07-2022 Day 25 Baku

今日最後一日喺阿塞拜疆
今日終於衝出Baku
join咗個tour去幾個市外景點
臨出Baku之前 去唔同地方接曬啲團友先
到今日先知原來火焰塔入面有一間酒店
應該有錢人先住得到 今次就係一對印度情侶
話說我ig follow嗰個Urus車group
入面好多post相嘅車主都係印度人 印度嘅貧富懸殊真係非一般嚴重


出咗首都之後都係一片荒涼


第一個景點係去Mud Volcano
但係我哋坐嘅旅遊巴入唔到
所以就要坐舊式的士 應該係蘇聯時代嘅產物


用兩條電線撻匙開車 電影成日見
今日真係親眼見到
得唔得㗎?


點知個司機揸住呢個咁嘅老爺車
都可以咁快咁樣走呢啲Off road路
真係好似Maverick咁講It's not about the plane it's about the pilot
我哋一團人三架車 喺呢個咁開闊嘅荒野入面off road drive
真正嘅絕塵而去 好有feel


揸咗大概三個字就到


平時啲火山會噴出岩漿
Mud Volcano顧名思義就會噴啲泥漿出嚟
啲泥漿暖暖地 好似死海啲嚟咁樣


隔離仲有個唔係好清嘅湖


因為冇帶樽裝住啲泥漿
所以我就咁用手指撩咗啲
跟住一陣就後悔呀


就係呢三架老爺車 我哋喺荒野入面風馳電掣
走嗰陣個司機仲叫我揸一程 本來我有啲想揸
但係見到有兩個唔識嘅團友一齊同一架車 就費事


呢度一大都好多Mud Volcano
聽講呢啲泥漿有美容功效
聽導遊講 曾經有啲團友趁佢唔為意 跳咗落去啲泥漿度
跟住回程成架旅遊巴都有呢啲泥漿
仲要係有啲危險 因為啲泥漿溝咗啲石油
係易燃嘅 所以佢都千叮萬囑叫我哋千祈唔好跳落去
但係最尾對印度情侶 都係搽咗好多係身上面
好彩臨上旅遊巴之前有水可以沖


去完Mud Volcano
就去一個非常出名嘅景點 Gobustan Rock Art Cultural Landscape
話說呢度有兩座大山 人們發現呢啲山嘅牆上面 有好多石刻
考古學家研究之後發現 最早嘅石刻甚至去到四萬年前石器時代
跟住呢個地方就登錄咗UNESCO世界遺產
呢度呢個垃圾桶都有石刻
估唔到四萬年前都有垃圾桶


入去之前 導遊首先帶咗我地去個博物館睇下先
首先介紹咗唔同嘅石刻代表啲咩


呢個係以前嘅祭司 Sherman
一講起Sherman
即刻諗起Bloodlust +40% movement speed +40% attack speed


不過令我最有印象嘅係呢個地球
佢show咗唔同地方嘅遠古石刻 人類喺好耐以前已經遍佈成個地球


跟住我正式入去啦
好彩入咗個博物館先 如果唔係睇住啲石刻都唔知做緊乜


又話呢度本來係冇限制啲人點樣行
但係因為兩單嘢 所以就特登畫咗一條遊客一定要行嘅路
第一單就係有外國遊客畀蛇襲擊


第二單就係呢個 本來呢個窿係冇嘢圍住嘅
呢個窿出名嘅地方係 傳說如果你可以爬過個窿就可以有好運
好多人特登會嚟呢度爬呢個窿 排曬長龍咁樣
久而久之個窿就畀人擴大咗
都算 前幾年有人下卡住咗 要出動到消防先可以救佢出嚟
自此就封咗唔畀人穿過


改咗咁耐 就係呢啲石刻 因為覺得冇乜特別 所以冇咩影相
但係要記住呢啲石刻個個都有1萬年歷史以上
不過可惜嘅係 呢度成日都有地震 最近嘅一次地震 整到好多錫冧咗落嚟
埋沒咗好多石刻


呢度風景唔錯 望遠嗰邊就係裹海


嚟返張全景


睇完呢個就去食飯 點解啱啱我話撩咗啲題將會後悔
因為我唔記得洗手 食飯嗰時又用隻手食麵包
跟住都未食完個飯 就覺得個胃好唔舒服
冇肚屙嘅感覺但係勁想嘔 又有啲頭暈 原來食咗石油係咁嘅感覺
之後嗰兩個鐘到溫溫燉燉 冇咩影相
暈住咁樣睇拜火教廟 見到啲火好想燒嘢食


因為唔係好舒服 所以都冇乜聽到導遊講嘢
淨係記得呢個廟 以前係拜火教徒用 但係傳下傳下搞到印度教徒都走過來拜
完全唔記得點解


勁想嘔嘅情況之下睇咩都冇心情


呢個好似係濕婆


紅血嘅狀態 又去咗下一個景點
導遊稱呢度係小型嘅地獄之門 即係土庫曼嗰個地獄之門
呢個又係一啲怪火 可能因為入面有Methane 所以燒極都唔完
有時落完雨熄左 等多陣又會著返


畫公仔畫出腸


估唔到呢度都見到有人騎馬
仲見到有個靚仔耍雜耍咁企喺隻馬上面 但係我影唔切相


返到去導遊就帶咗我哋去一間手信鋪買啲阿塞拜疆版Turkish Delight
呢度唔同之處係佢用蜜糖做 所以冇咁甜
明明我去間舖入面覺得幾好食
但係前幾日返到香港開嚟食嗰陣 覺得好媽媽
呢啲都有分新唔新鮮

買完咗就搭纜車上最後一個景點


呢個highland Park係Baku嘅最高點
基本上我接觸嘅本地人同導遊都大推呢度
除咗係一個觀景台 呢度仲有一條Martyrs' Lane
係為咗紀念獨立戰爭同埋亞美尼亞戰爭死佢嘅軍人


入面嘅火有一種好神聖嘅感覺


喺呢度最後一個景點都嚟唔開火焰塔


嚟咗呢度三日三日都有影夜景


最尾一張


影完相都成十點但係都有間餐廳想試
不過個牛麻麻地


總括嚟講三日嘅Baku之旅 都算係平平無奇
夜景係幾靚 個海都幾靚 就係咁囉
不過可能之前去咗伊朗 呢度自由嘅反差好大
同埋你問我我一定唔會後悔嚟咗呢度
因為黎到高加索 一定要去曬阿塞拜疆 亞美尼亞 同格魯吉亞
先會清楚知道呢度嘅恩怨情仇