[有圖少字]中亞高加索5個星期遊記

以色列又係唔會吸印，入境係比張飛仔你

Yes 但我果陣去係jordan去Israel 再返jordan
聽講有d 伊斯蘭國家癲到可以咁樣估到你去過israel

咁癲？咁相比之下以色列鬆好多，我果陣去完埃及再去以色列都冇野，係問多幾句，btw約旦好唔好去？

埃及同以色列關係正常化返
約旦正呀 petra 同wadi rum都好值得去
Wadi rum就要住一晚
死海就會平過以色列果邊

如果去完伊朗入唔入到以色列？
ps：有cup印

應該得不過可能有多啲問題

https://www.touristisrael.com/can-i-visit-israel-with-an-arab-passport-stamp/45609/

29-06-2022 Day 13 Shiraz

終於來到伊朗 本來我嚟伊朗嘅最大原因 係為咗粉紅清真寺
同埋感受下呢度啲人有幾友善
但我估唔到 原來都好多歷史可以睇
仲要係唔同城市你可以睇到唔同歷史
第一站嘅 Shiraz 就可以睇到近代Zand Dynasty嘅歷史 不過呢個朝代可能冇咁多人識
而離Shiraz好近嘅Persepolis同Pasargadae可以睇到Achaemenid Dynasty嘅歷史
唔知大家有冇聽過Cyrus the Great 同埋 Darius the Great 波斯同埋希臘嘅戰爭 就係喺呢段時期
好簡介講完 一早喺個好靚嘅波斯花園度食早餐 諗番呢間酒店好貴 明明好細間 扮成二百幾蚊一晚
不過個庭園幾靚 同埋好近景點 所以就算


一出到去即刻畀啲細路叫我影相


一早約咗導遊 朝早先去粉紅湖 跟住下晝有個好短嘅walking tour 晏晝再去persepolis
因為之前喺Bukhara 四十幾度搭的士冇冷氣有陰影 所以一見到導遊部車 疑似冇冷氣 我都面上一沉
好彩原來係有嘅
但係我嘅面上一沉 竟然畀導遊見到 仲俾佢笑
開住冷氣出發
呢個城市圍繞好多粉紅色第一個粉紅色就係粉紅湖


啲粉紅色係因為 海藻而成


但係因為乾旱季 所以成個湖都冇水 係唯獨呢個製鹽廠先有
水面好平靜 粉紅色嘅天空之鏡


跟住返去換錢 呢度啲錢好麻煩面額又大 又有黑市價 又分十做單位一做單位
搞到頭都亂曬


跟住去食Shiraz傳統菜 呢個飯有Saffron rice同唔知咩飯 溝埋幾好食


食完飯就去咗walking tour 雖然話經歷過Bukhara 耐熱程度up 100% 但係 呢度下午都真係幾熱下


導遊帶咗去行Bazaar


好多香料想買俾朋友 最衰個喼冇位


喺bazaar呀中間有一個caravanserai 身為絲綢之路其中一個站 當然會有caravanserai


導遊話 為咗婚係男定女敲門 男嘅會用粗啲嘅


女會用幼啲嘅 之後我敲門都跟返個傳統


呢度啲精品好靚同埋唔貴 都係嗰句 如果喼有位我一定買


繼續行下bazaar


去咗喺Shiraz僅次於粉紅清真寺嘅Vakil Mosque 導遊話 呢個城市係Zand Dynasty嘅首都
雖然時間好短 但係都起咗好多好靚嘅建築物 而粉紅色 就係呢度常用亦都係特有嘅顏色
好似話喺其他城市好少見到有粉紅色做裝飾


伊朗嘅庭園 就係中間有個大水池 四邊圍住啲屋 呢個清真寺嘅建築都係咁樣


啲清真寺係咪 同烏茲別克過啲好似呢 其實係烏茲別克抄呢度
想當年帖木兒所到之處一定會屠城
但係佢好鍾意伊朗式建築 同埋對美學文學有追求
所以會放過啲學者建築師工匠 帶佢返首都Samarkand 幫手起建築
Samarkand咁靚嘅建築 就係呢段時間嚟


之後去咗Zand Citadel 好似入面拍戲所以唔入得


跟住導遊請咗我食呢個傳統甜品 唔知點形容 係一啲甜嘅 一條條雪條


攤唞完又出發 去咗Naqsh-e Rostam 即係王者墓地 知道葬咗Darius the Great
然後我之後先知Pasargadae有Cyrus the Great嘅墓地 不過太遠所以最後決定唔去
千幾年之後 有第二個朝代嘅王又返返嚟呢度刻咗啲字 想話自己又重拾返當年先祖嘅光榮


墓地好細所以睇咗一陣就去重點Persepolis
Cyrus the Great將首都定都Pasargadae
而Darius the Great就將首都定都Persepolis


我特登叫導遊 安排到差唔多六點先嚟到呢度 因為想睇夕陽 但係最終六點幾先到 仲要八點就收七點幾就趕人走 只可以快睇
講起個導遊 佢有一種好頹廢嘅感覺 因為佢曾經有過一間旅遊公司 但係因為一連串事件 侵侵 烏克蘭民航機被擊落 跟住之後又有肺炎
所以少咗好多人嚟 搞到佢連公司都冇咗 而家只可以出生做返導遊


萬國之門 想像下二千幾年前呢度仲有屋頂 外國使節 一入嚟見到咁宏偉嘅入口 已經畀人震懾咗
跟住轉右見皇帝嗰陣 光線唔係好充足 但係個大廳好大 你睇唔清佢個樣 但係個回音大到喊出嚟 真係未傾到計已經畀人震懾咗


呢個獅子咬牛嘅雕刻應該係呢度嘅代表作 記得咗導遊講咩 大概都係力量嘅表演 上網search咗
"It is a symbol of great complexity and range. The basic sense of the bull brought down by beasts of prey is an image of the fundamental forces of life and death in a terrible, intense struggle. As an image of the conflict that provides the sustenance of life, the lion and the bull are bound together as a single symbol."


跟住就係唔同嘅皇宮


夕陽西下係幾靚嘅同埋冇咁熱


睇唔同嘅建築物雕像上面都有見到 唔同裝飾嘅人 可以表現到當時帝國嘅宏大
因為唔同服飾就係代表唔同嘅外邦人


個夕陽落咗啲啲


呢幅相見到更加多外邦人 連埃及嘅盧比亞人都有 可見嗰陣時國土之大 臣服嘅國家之多

不過幾強大嘅帝國都好 二千幾年後都係淨返一片頹垣敗瓦


跟住保安已經開始趕人走 好彩導遊幫我講咗幾句 之後我哋一齊沖咗上山 上面都係一個陵墓


仲可以睇到全景

29-06-2022 Day 13 Shiraz (cont'd)

留咗十分鐘最終都係畀人趕走 不過呢個景都幾靚呀


落到山下 終於日落 啱啱好八點 仲可以去遊客中心行個圈


話就話遊客中心但係得啲手信鋪同埋有個迷你版Persepolis
充實嘅一日咁就完咗
跟住導遊揸車返去嗰陣時我哋傾咗一陣計
首先問咗佢點解波斯會改名做伊朗
其實伊朗先係正名 在正式啲講應該係雅利安人 (Aryan) 因為佢哋覺得伊朗人即係移居咗落嚟呢個地區嘅雅利安人
由西伯利亞移居到伊朗地區嘅阿利安人其實有好多個部落其中一個部落就叫Persís / Perses / Persia 係希臘人畀佢嘅名
呢個部落就係建立Achaemenid Empire 嘅部落 所以希臘就將呢個地方命名為Persia
咁西方就一直沿用希臘嘅稱號
之後去到近代先改番正名叫Iran

第二個問題 就係講起 大家都應該見過啲相 幾十年前嘅伊朗人著得好開放 成個西方國家咁 點解而家變成咁
個導遊都好懷念以前講到勁嬲 佢話佢阿爺都好有錢 當年嘅國王Reza Pahlavi 係好親西方嘅
但係國內嘅貪污情況好嚴重 應該都令到貧富好嚴重
所以人民唔係好鍾意佢
咁當然會有革命啦
一個當年嘅革命領袖Ruhollah Khomeini 打著人民旗號 推翻咗呢個國王
可惜佢上咗位之後 冇遵守對人民嘅承諾 除咗對西方有敵意之外 仲用返伊斯蘭法
結果就令到伊朗變咗而家咁 雖然近年開放咗啲但係都係有啲封閉
本來我哋可以睇到一個好西化嘅伊朗 可能會變到土耳其咁 不過歷史就係歷史

30-06-2022 Day 14 Shiraz

今朝一早起身就係去成個伊朗我最想去嘅地方 粉紅清真寺
伊斯蘭教嘅人好鍾意貓所以週街都係 喺酒店一路食早餐一路撚貓


七點就到咗 我個酒店行到呢度只需要五分鐘 但係中途有人叫我上去架電單車 以為佢咁好客就上咗
點知一落車嗰陣叫我畀錢 跟住我就唔畀啦 跟住佢又好似好淫邪嘅笑容係咁話bon bon, bon bon (男人嚟)
粉紅清真寺八點先開但聽人講越早去越有著數 因為呢個係我最重要嘅行程 所以七點就去排隊 但係其實都ok冇咩人

入邊唔可以用相機影相啲相都係電話影嘅 一陣post


跟住終於買到sim卡 終於可以用app call的士 伊朗嘅的士app 叫做Snap!
去伊朗一定要裝 又唔使同人講價 又清楚目的地 又平 除咗德黑蘭之外我搭咗咁多情都好似未試過多過一蚊美金
點知搭的士去下一個景點途中 部電話就收收地皮 已經有跡象個mon會死 搞咗好耐
好彩有帶部iphone xr 如果唔係真係玩完
搞好就費事咁掃興繼續玩


之後去呢個花園 重點係伊朗式大宅 近代伊朗好多有錢人佢哋會花錢將自己間屋整得好靚
好多博物館餐廳或者酒店之前都係伊朗有錢人嘅大宅


睇第一個覺得好新奇


伊斯蘭係單神宗教 所以同宗教有關嘅建築佢哋嘅壁畫都唔可以有人像或者動物 你見到嘅全部都係字或者幾何圖案
但係呢間係私人大宅 所以冇人理 同埋又合咗啲歐洲嘅元素有啲歐洲嘅畫喺度


伊朗大宅當然有水池


跟住被當攝影師人生開始 成日都行行下啲本地人見到我揸住部大相機 就叫我幫佢影相
跟住又whatsapp叫我send返畀佢


之後又snap去Tomb of Hafez 跟住部samsung正式收皮
Hafez生於Shiraz 對於伊朗人嚟講佢係一個好重要嘅詩人 都係佢哋民族嘅驕傲


但對我嚟講 冇咩特別


本地人好鍾意同我冇影合照 懷念爺爺feel


部電話壞咗冇咩心情 所以行多一個景點就返去
Imamzadeh Ali ebn e Hamze唔知邊個個陵墓


伊朗嘅陵墓都好靚 因為入面好多用咗好多鏡碎片 閃閃令
好似話係因為 宗教類建築唔可以有人面反射 所以要將啲鏡
亦都因為當年鏡係由歐洲搵過嚟嘅 咁長途一定會打爛啲 咁打爛咗又唔想嘥
所以就用咁嘅方式做裝飾


睇完就返去抖涼 又見到今日嗰隻貓


跟住之後去咗一間 前伊朗大宅食飯


間大宅係幾靚嘅 不過啲嘢食就麻麻
來伊朗之前 有個friend介紹我食koobideh
我就嗌咗但係呢間整得麻麻有啲乾遲啲再試


跟住去最後一個景點 伊朗嘅第三大聖地Shah Cheragh
但係入面唔用得相機影相 所以都係下個post再post
途中有人請我食蛋糕


睇完都成九點幾 夜晚唔使搭的士啦
一直行返去酒店順便睇下當地人生

跟住又有人搵我影相 影完相佢請我飲啲透明嘅液體 好驚係迷姦水
最後都飲咗 好似係透明嘅涼茶咁樣

你咁夠薑ge真係飲佢比你杯野

好靚，我都好想去，應該係唯一一個d人仲係文明人ge地方。

羨慕樓英文好，可以同當地人傾倒咁多

咁快玩完番香港

01-07-2022 Day 15 Shiraz

今日最後一日喺Shiraz 一早又去睇大宅


呢個大宅而家轉咗做博物館 曾經係一間大學


博物館有介紹 伊朗嘅馬賽克技術 技術係幾精湛嘅


仲有人即席示範


跟住嚟到呢度又畀一對情侶當咗攝影師 影完入面都未夠仲要行出去影埋個花園
差少少收錢幫佢哋影pre-wedding


中間有個戶外嘅位好多鏡幾靚


之後去第二個詩人 Saadi之墓


陵墓加群山


入到去 又係好多人同個陵墓合照 懷念爺爺


有好多石碑唔知寫咩 可能係佢啲詩


跟住周圍影下


呢個陵墓好過琴日嗰個 唔係淨係得個亭


行行下有個落地下個位 應該係以前畀人潔淨身體嘅地方
而家變咗cafe 好涼爽


跟住去咗一間喺呢度好出名嘅cafe食嘢
杯嘢飲係開心果奶昔好好飲
個意粉係伊朗式肉醬意粉 一食
同大家樂嘅焗肉醬意粉個味一模一樣 真係一模一樣


跟住我share咗呢個奇聞畀我啲friend
佢哋竟然跌到側邊嗰個QR code
本身諗住叫佢幫我喺香港落單
點知個QR code淨係用嚟睇menu 失望
食完就返咗去瞓覺 因為想去睇嘅地方都睇曬


之後夜晚又出咗去同一間餐廳食嘢
夜晚個景靚好多同埋都好多人
但係今次個嘢食就麻麻地 可能我一個人要食四件所以覺得好溜


食完就慢慢行返去


又hea左陣跟住坐夜巴去Yazd
大家喺伊朗買巴士飛一定記住買vip 係貴啲嘅class
但係唔係貴好多但係座位大好多 同舒服好多

喺伊朗 同埋條街咁多人應該冇死啩

其實放膽講就得 好簡單嘅英文都可以溝通到
佢哋英文都唔算話真係好好

Back to hell

02-07-2022 Day 16 Yazd

鏡頭一轉又去咗第二個城市
Yazd呢個沙漠城市對伊朗嘅歷史冇乜影響
但係宗教上嚟講佢就有啲特別
因為佢係伊朗其中一個仲有拜火教(Zoroastrianism)傳統嘅城市


朝早嘅巴士站


跟住又坐的士 經過一啲迂迴嘅窄路 喺古城中兜嚟兜去
就到咗今日嘅住宿


都係傳統伊朗建築咁中間有個水池畀四邊圍住


食完早餐等咗一陣導遊就嚟咗 今次呢個導遊會帶我玩兩日
第一日就喺市內行同埋去附近嘅沙漠
第二日就去附近嘅城市

第一個景點都係我市內最鍾意嘅景點 Tower of Silence
都係信奉拜火教嘅人天葬嘅地點
因為呢度係沙漠地區 所以水資源好珍貴
所以古時嘅人就起咗啲水塔喺雨季儲起啲水
但係一儲要儲成年 所以就加埋啲風塔加強流通唔好畀啲水壞
左邊嗰個建築物就係個水池同埋兩座風塔


拜火教嘅人 相信土火水係世界嘅能量 所以佢哋唔會土葬同埋火葬
淨返嘅選擇就係好似西藏咁天葬
我有問過導遊 其實拜火教嘅天葬同西藏嘅天葬有冇關係
佢話可能有 因為古代啲傳統習俗會經絲綢之路傳來傳去


天葬嘅地點 會喺山上面
因為佢哋要將啲屍體畀啲禿鷹食
佢哋就會喺山上面起啲天葬場 即係Tower of Silence
呢度有兩座輪流用


上到差唔多入去天葬嘅地點會有個last check point
會有狗做最後checking 睇下條友係咪真係死咗
跟住之後會有兩個祭司搬條屍入去 家屬係唔入得


呢度就係真正天葬嘅地點 想像下周圍都係屍體比禿鷹咬到支離破碎
所以淨係祭司可以入 嗰兩個祭司仲要長期住喺呢度
如果要出城 就要有人大鑼大鼓同所有人講 避免染到咩疾病
比禿鷹食完啲骨 就會推曬落去中間個窿


聽導遊講 呢個傳統去到二十世紀中先畀人禁止咗
好似話仲會見到骨 左下個白色一舊 佢話係骨


第一個景點朝早就嚟呢度個安排好好 因為有冇咁熱 又順光
有冇咩人 雖然係天葬地點 但係成個感覺好peaceful


呢個景點仲有免費凍水飲 順帶一提喺伊朗好多水機有凍水
同埋大部分廁所都係免費嘅


第二個景點就係拜火教神殿
導遊話拜火教個火1唔係重點 其實嗰啲人係拜緊光 朝早有太陽 夜晚有月亮
但係如果有時冇月亮嗰陣 就要拜火


呢個logo 之前喺Khiva都見過 其實就係拜火教嘅象徵


入面呢個火好似話燒咗幾個世紀 同埋會有專人加炭
講下講下好想燒嘢食 燒烤場都有人負責加炭


呢條友就係拜火教嘅創辦人


之後返返老城
導遊話呢個城市分為好多個區域 去到某一日每個區域嘅人就會分別一齊抬一嚿呢啲叫coffin嘅嘢
跟住喺個城區入面行一個圈


Yazd嘅象徵Amir Chakhmaq Complex
朝早逆光 下晝再嚟


啱啱講過因為沙漠地區 水資源好寶貴
所以呢個城市嘅水利做得好好
咁導遊就去睇water Museum


城市有好多Qanat Qanat即係地底下面嘅人工引水道
佢哋會喺城市附近搵地下水 如果搵到就會起Qanat將水引入城市
畀宗教場所 或者公共設施用 如果你夠有錢 你仲可以買用水權 直接將啲Qanat駁落你屋企


呢度就展示啲富豪用水權
含蓄講法 導遊話有時啲男人娶老婆個嫁妝係用水權
簡單啲嚟講即係有水有閪屌


睇完博物館又去另一個花園 呢個係全個城市最高嘅風塔


入面都有好靚嘅玻璃


同埋屋頂


風塔最厲害嘅地方 就係可以透過閂門窗 改變風鏡方向
唔止啲風可以吹入嚟 啲風都可以吹返出去
導遊就示範咗 放張紙巾喺度張紙巾會向上飛出去
都幾神奇


睇完一點幾 又係最重要嘅環節返酒店瞓覺


晏晝五點再出發去行舊城區


呢度第二個象徵性嘅景點Jameh Mosque of Yazd
佢嗰兩支宣禮塔 係伊朗最高
聽講左邊係師傅起單螺旋樓梯 右邊反而係難啲嘅雙螺旋樓梯
跟住師傅見到青出於藍 覺得好羞愧 就即席喺塔上面跳樓死咗
徒弟見到咁嘅情況亦都跟住跳


嚟裝唔算好特別不過導遊講咗好多 呢其實上面有啲字度嘅裝飾
就好似呢個馬賽克 其實上面有啲字 仲要係一首詩呢
都幾犀利


跟住行舊城區 呢啲就係類似今朝見到嘅儲水庫
有樓梯畀人落去攞水


繼續舊城區行


呢度有好多隧道 其實個頂係嗰陣時啲有錢人嘅屋企呢
有錢人屋企可以加大面積 施行人行嗰陣又可以喺陰涼嘅地方行 雙贏局面
不過近代因為要擴闊條路畀車行 所以呢啲隧道都拆咗好多


行行下有個nickname叫Alexander建築
唔記得點解 我淨係記得我講Alexander the great
導遊話伊朗人唔會稱呼佢做the great 因為佢係征服在伊朗Achaemenid皇朝


跟住我特登同導遊講要去屋頂睇風塔
最好嘅位置就係Yazd Art Cafe
可以睇到呢個千塔之城



雖然要買杯嘢飲先可以坐低
但係呢杯嘢飲唔係好貴同埋幾好飲係值嘅


臨出發去沙漠之前 再去Amir Chakhmaq Complex
順光靚好多


我去過幾個沙漠 寧夏沙漠 摩洛哥撒哈拉沙漠 美國Arizona沙漠
約旦wadi rum 所以本身冇諗過喺度去 但係見啲人話睇程序幾靚所以順便去埋


呢度嘅沙漠 同摩洛哥嘅撒哈拉沙漠好似 即係經典嘅沙漠面貌好似


導遊


足印


終於到頂


啱啱好可以睇埋個日落

02-07-2022 Day 16 Yazd

同今朝一樣好寧靜 成個感覺好peaceful
最緊要係Yard揸車過嚟半個鐘都唔使 所以係好值得去


導遊仲有帶埋哈密瓜


走嗰陣見到有人喺沙漠 用四驅車玩off load drive勁正


到去就聽到有介紹去一間好出名食本地菜嘅餐廳
仲有live表演


個飯成個柱侯牛腩飯咁


夜晚嘅Jameh Mosque of Yazd


最後行咗陣間睇下啲手信就返咗去酒店

Pish

買水飲定 水機照飲？

我都想知 中東啲水 errr

我通常買水飲
但都試過水機 冇咩問題

我覺得冇咩問題
純粹買水方便d