神火村村民
2021-04-21 00:55:01
【都係搵啖飯食】
聽到班仔冷不防咁問,你有啲愕然,呆左一陣。其實你都無諗住做獵人,只係一路走來,半推半就就以此為業,無話特別想通過狩獵追求啲咩,都係搵餐飯食姐。
「搵食姐。」你嘆氣,可以的話邊個想搵命搏。
班仔見你神情有異,圓碌碌嘅眼睛一轉,似乎又有鬼主意。
「主人,我地今次一定會搵到前人遺留落黎嘅寶藏!」佢拍拍胸口,語氣堅定。
「望係咁望啦。」你唔敢對此事抱太多嘅期望,因為你不嬲都無乜運。
「你睇下個到先啦~」班仔扯住你衣服嘅下擺,拉你到崖邊。
你見到眼前景象,驚訝到講唔岀說話,本應盤居係內湖天空上嘅翼蛇龍群,居然好似飲醉酒咁,有過半之數伏倒係岩石之上,更有部分墮入湖中,浮係水面一動不動,好似無左靈魂一樣。
你回想起啱啱自己失去理智,陷進幻覺嘅模樣,總係覺得同眼前嘅異象有關連。
「主人,我地行啦。」班仔一馬當先,扶住岩壁,兼跑且跳,轉息就來到巨石之下
雖然心中隱約覺得有啲不妥,但又說不出個所以然,就係你正打算尾隨班仔爬上巨石,到遺跡尋寶個陣,湖水突然起了動靜。
無數嘅氣泡係平靜嘅湖面湧岀,伴隨住隆隆作響嘅怪聲,失魂落魄嘅翼蛇龍群比突如其來嘅變化嚇得怪叫連連,到處亂竄。
風雲變色之際,你決定:
A:把握時機爬上巨石
B:留在原地靜顧其變
X:住水底下潛
Y:使用翔蟲騎上其中一匹翼蛇龍