我反而極少賣二手野,尤其是鏡頭,因為好怕撞到驗屍官,拎住支鏡左照右照,有粒塵話減二百、有條幼過頭髮絲花痕又要減二百... 心諗而家你係買二手野,有正常使用痕跡好正常,要冇花冇塵死去買全新啦!
試過兩次感覺條友有心借意壓價,立即收走唔賣,所以我d鏡閒閒地都跟我十幾年,最耐果支EF 70-200mm f/2.8冇IS係1997年買落..
至於外國網購鏡頭,保養本來已經係水貨看待,加上有一定風險,除非平香港行貨好多,例如平兩成,否則都唔會搏,所以從來冇買過,我人生連水貨鏡頭都只買過一次,仲係香港鋪頭買,係Canon 300mm f/4 IS,當時行貨剛好一皮野,水貨$7980,真係相差兩成,仲因為係定焦,比較少走焦問題,所以至買水貨... 反而攝影配件就成日外國網購,閃燈、柔光箱、燈腳、燈夾,甚至膠布,都係網上訂..