然後你講嘅係制度問題，唔係佢地問題，你宜家嘅感覺就同白人至上係一樣，當然，如果你覺得喺其他歐美國家白人至上係無問題，咁我都冇野好講，只能講他日你去到他國被歧視叫你go back to China果陣唔好怨，你都係用緊種族分階級。而制度問題係指入境把關問題，然後你覺得偷渡係咁大罪，我覺得你可以諗下好人好者做咩要偷渡，點解香港人要逃亡，係一樣嘅道理。社會福利係人權，我做緊嘅野就係喺既定環境下令哩班人可以自主生活，如果可以令到佢地真正成為香港人，企喺我地一邊，咁就係一份力量，而制度上係唔容許佢地向上流動、自立，果班你面對住，有公屋有身份證嘅南亞人連中文都唔識點打工點生產點貢獻？如果你認為佢地完全無貢獻，最近嘅可以睇下山竹果陣有幾多南亞人出黎幫手，亦係其中一班最早自發落街幫手嘅人，佢地係冇錢冇乜資，佢地出勞力。如果你想話社會福利制度有問題，你係可以研究個制度有咩問題，點解住滿七年可以有身份證，點解有綜援有公屋，點解香港有公屋，佢地嘅南亞冇，哩個係社會進步嘅問題，都唔係佢地可以改變。
點解佢地生咁多，係同佢地文化背景有關，先不論佢地宗教上可唔可以做家庭計劃，仔女就係勞動力，自古以黎漁農社會都係咁，你阿爸阿媽或者再上多輩都係咁，咁佢地發展只係到我地上一個階段，我地宜家咪拉緊佢進步。
當然你係可以覺得將人無限劃分，趕走所謂現時無生產力嘅南亞人，然後趕唔趕上流南亞人？然後趕哂之後，當然再一個目標可以係任何非法入境者，如果你係用非法入境者一詞，絕對無問題，佢唔帶任何種族色彩，唔係一竹篙打一船人；之後要唔要趕埋大躍進、文化大革命走佬落黎嘅人？再之後係咪再分到客家人潮州人鶴佬人海陸豐人全部走？而哩啲好可能係好香港人嘅老豆老母。我講緊嘅係你歧視嘅中心，你界線喺邊，你定義嘅香港人、南亞人係乜？你對準嘅點解係人民唔係政權。
如果鬧我傻西可以令你討論咩引致你歧視，我樂意之至。
仲有，我地哩班傻西就係話緊俾你地聽，現實仲有另一面，唔係你見到嘅就係100%，你可以選擇你見到嘅事實，我亦需要見到你見到嘅事實，去搵點解你咁唔中意佢地；可以不喜歡，但不要傷害；我地班傻西自己搵資源自己搞服務，係話俾佢地聽，黎我地地方我地希望佢融入社會，唔係自成一角，但我地要有足夠嘅渠道俾佢地學習、嘗試融入。上次九西安德魯出初選，佢就係想向大家證明，南亞人唔係只係想榨取哩個地方，唔同少數族裔嘅人都有自己開centre去引導番來港嘅同胞，點樣睇自身同社會嘅關係。
我意氣用事出言不遜係我一條傻西，在此向天下謝罪！
傻西敬上
