《香港傭兵》(39)

「花哈哈～我哋都一齊咗咁耐啦～而家仲會呷醋～」阿月又恥笑我～

『一齊咗幾耐都係咁大醋意～係唔鍾意其他人𥄫我個靚靚女朋友㗎喇～』我就扮晒霸道～

「係喇係喇～唔俾其他人𥄫喇～」阿月就冇我咁好氣咁～

『淨係俾我一個𥄫～』我就一路望住阿月...望實阿月...

阿月又望住我...莞爾一笑...

終於都...可以見返阿月...

然後個靚仔侍應就放低兩碟窩夫...

我立即怒視住個靚仔侍應！

今次個靚仔侍應感應到我嘅殺氣而立即行開！

算你醒目...

然後我就再望返面前嘅阿月...

望住阿月甜絲絲咁指住...窩夫旁邊...碟上隻...用朱古力醬畫成嘅貓貓：「你睇你睇～我隻貓貓幾可愛～」

『可愛～可愛～同你一樣笑到古古惑惑咁～』十足十又唔知有乜驚天大陰謀～

「咩古古惑惑吖？係好似我咁可愛～」阿月又對住我莞爾一笑～

嘩...就係你呢個笑容囉...可愛得嚟帶點古惑...

「你嗰隻都好似你吖～」阿月又指住我碟上隻用朱古力醬畫成嘅貓貓～「一樣呆呆毒毒～」

『有幾呆又有幾毒吖？係攰吖月月娘娘...』你都唔係唔知我連續OT咗幾多晚㗎啦...

你都唔係唔知我連續幾多晚未沖完個涼你就瞓咗啦...

唔係我唔想早瞓...

係我返到嚟都成十二點喇...

沖埋個涼洗埋個頭都成點幾喇...

瞓唔夠六個鐘就要起身準備返工喇...

人嚟㗎我...一日瞓唔夠八個鐘係會短命㗎...

仲要連續Keep住兩個禮拜都係咁...你好快就守寡㗎喇...

「我就係知你辛苦～所以咪帶你嚟食糖水囉～」阿月又對我莞爾一笑～

『呢個唔係糖水嚟㗎喎...』我望住面前兩碟窩夫...

真係大大碟...每碟都整晒四件...

仲要係鋪滿晒士多啤梨...朱古力...中間仲要有雪糕...

咁夜食咁飽...點瞓吖...

「哎吖～你唔覺得好滿足㗎咩～仲要有隻咁可愛嘅貓貓望住你喎～」阿月又對住我莞爾一笑～

『最重要都係有我陪住你呢隻貓貓食甜品...』真係會飽到上心口...

「明明就係我陪你啦好唔好～」阿月谷一谷塊面豬登～

『係喇係喇係喇～多謝月月娘娘肯百忙之中抽時間嚟陪我食甜品～』真係...未食已經心都甜埋～

「使乜講～」阿月就開始開餐～

望住阿月呢個滋味樣...真係乜嘢攰意都全消...

阿月...真係我嘅精神支柱...

只要有阿月喺身邊...同阿月一齊...就算幾攰幾辛苦都好...我都捱得過...

『阿月...』我雙手捉實阿月隻手，好認真咁望實佢雙眼。

「嗯？」阿月就眼仔碌碌咁望實我。

『唔好再...離開我...』

「哈～你講咩吖？我又點會離開你吖？」阿月帶住微笑擰擰頭～

『真係唔係講笑㗎...你知唔知喺嗰兩個幾禮拜裡面...原來沒有你...日子好難過㗎...』真係生不如死㗎...

「睇嚟你真係跌得太深...跌落Limbo...」阿月認真咁打量住我...

『吓？』咩...Limbo？

「Inception吖～你發夢發得太深啦～所以先會令本來只係瞓咗十分鐘左右嘅你，好似過咗兩個幾禮拜～同時好真實！真實到完全分唔到邊度係現實...邊度係夢境...」阿月好認真咁點點頭...

『唔好睇咁多電影啦...假㗎...』我冷眼打量住阿月...

「許～你唔好發咁多夢啦～假㗎～」阿月又回返個冷眼俾我～

唔好發咁多...夢？

發夢嘅嘢控制唔到㗎喎...

「係穿越時空，去咗廿年後嘅未來又好...定係發夢發得太深，跌落Limbo又好...你而家咪返咗嚟囉～係咪？」阿月對我莞爾一笑～

我...我而家咪...返咗嚟？

「嗯～好味好味～」阿月繼續開餐～面露幸福滿足嘅微笑～

都...都係嘅...不論係穿越時空定係發夢...我終於都返到嚟阿月身邊～

TO BE CONTINUED

今晚出完

三句預告

[Day 21－現在過去] PART 01

喺一個藍色嘅空間之中...

藍...四周都好似被一層薄薄嘅...薄薄嘅藍色所包圍...

Live

舉報飛揚借連登賣廣告

已經將[Day 20－遺址禁區] PART 12 Upload上Facebook同紙言

可能由細到大一有貓同老鼠就會諗起貓哭老鼠假慈悲

今日好早
一陣就要出去 好驚驚

冇開名應該唔算係賣廣告嘅
重點係對我都冇利益

黑貓鮑你真狡猾 老是常出現

有聲有畫

早
起身有文

金令早
咁早起身吖

仲有柏芝

制服誘惑

我媽媽叫張柏芝/謝安琪

一講到謝安琪就諗起旗袍

仲要瞓喺張木梳化上面