趕故書生
2017-04-14 06:27:28
「哈哈!好耐無見。」Kitty笑起上嚟,有一個淺淺嘅酒窩,依舊迷人。
睇嚟佢無記恨當年我對佢做嘅事,今日一見,對上一次已經係好耐之前嘅事。
但係感覺上,彷如昨日才相見。
沿路上,我哋閒話家常,傾下近況,大家過得如何。
然後我想起一個好重要嘅問題。
「點解你突然之間會返嚟嘅?」
「唉… 」Kitty輕嘆一聲,臉上盡是苦澀。
「講起上嚟一匹布咁長……」
「關於屋企?」我猜,十居其九都係咁啦。
「嗯。」Kitty點點頭。
雖然好仆街,但係我心入面真係暗爽咗一下。
因為如果唔係佢屋企有事,我諗可能呢世都無機會再見返佢,但咁樣諗好衰。
「你笑咩呀?」Kitty問。
死!俾佢見到我偷笑添,一定笑得好樣衰。
「無,我諗返起你以前啲衰嘢咋嘛。」今次真係認真咁笑。
「咩衰嘢呀!?」Kitty瞪大隻眼,唔相信我講嘅嘢。
「我以前明明就好乖!」
其實我都係亂吹架咋,以前嘅佢,就好似溪水一樣咁清統,邊有可能會搵到佢啲衰嘢。
唯一可以當衰嘢嘅……就係…
我從手機入面翻開舊照,搵出一張收藏已久嘅相。
就算換咗手機,呢張相都一路keep到依家。