怎料他拉著我的手,嘆了一口氣,一邊把事情娓娓道來一邊把我拉到經理房中,
「唔怕老實同你講,喺樂哥你走咗嗰日當日呢,有兩個pt同事辭職,你應該知道係邊兩個啦,因為我地唔夠人用所以佢地返到同全職差唔多時間,跟住到咗第二日,又有客投訴其中一個同事,話佢退機當新機賣畀人,於是畀人拎咗去祭旗。」
話音剛落,他推開了經理房的門,不過門後等著我的不是惡作劇,而是他示意我坐下,接著關上門後,他再搖頭嘆道,
「我地人手一直都唔夠,2日內無咗3個人,大不了我返早同收舖,點知到琴日下午公司個總區經理話要抽調其他舊人合共6個去旗艦店,喺其他分店派啲開始上手嘅新人今日過嚟做補充,直至另行通知,仲要係得4個人,計埋我都係得5個,咁你知道我地呢間舖頭雖然開喺地鐵站商場,但條數一直唔夠靚,我邊有討價還價嘅能力呀,唔摺埋都偷笑啦......」
我點頭回應,再聽著經理「訴苦」,
「咁我同個總區經理講,你抽晒我啲舊人走,得我一個點教啲新人呀,仲要連過渡期都無?可能個總區一直都唔妥我啦,於是佢就話:你有個停咗職嘅同事,HR嗰邊我會同佢講,你打畀佢叫佢復工啦!於是我好無奈咁就叫咗你返嚟。」
他一直說著一邊抹著額角的汗,我支支吾吾的說,
「即係.....」
他苦笑說著,
「無其他意思呀,樂哥,唔好誤會,我只係呻下.....」
「原來係咁。」
「唉,蜀中無大將......」
「下?」
經理望著我的眼神,有一種說不出的無奈,同時竟然令我覺得他有點可憐,同時他拍了拍我的肩膀說,
「我感慨下啫,靠你幫我手啦,樂哥!而家換制服幫我教埋新嚟嘅開舖,唔該晒唔該晒。」
就這樣,因為總區經理的一個決定,讓我意外的復工,而且我的待遇對比起昔日截然不同,一時之間,成為一眾新人的「大佬」,更備受經理的期望。
雖然指教新人有點辛苦,可是對我而言不用受到同事們和經理的指罵和冷漠對待,辛勞基本算不上甚麼!
這種逆轉已經不是單單的落差,而是天堂和地獄的對比。