順便講埋我更新嘅速度好慢，唔想等嘅可以直接去wiki
第一單 日本航空123號班機空難
出事前一年嘅JA8119，尾翼嗰隻紅鶴幾型
出事嘅飛機編號係JA8119，機型係波音747SR系列，係747-100嘅減油增加載客量版，可以載客超過500人，係嗰個年代嚟講簡直係超級巨無霸。
飛機喺1974年首飛，好快就交到日航手上，出事前機齡為11年半。喺1978年6月2日，呢架機降落大阪伊丹機場嘅時候出現彈跳，機師當時扯高機頭，令到機身角度太大，機尾因為咁樣而擦地，仲造成25人受傷，呢件事故被稱為日本航空115號班機事故。
事故導致機尾壓力壁受損， 由波音公司嘅維修員修理，但維修員唔知搞咩，冇按照規矩去維修，結果搞到嗰個位塊金屬蒙皮喺飛行過程入面大量受壓，出現金屬疲勞現象，但直到空難發生之前都未有人發現到問題。
上下分別係正確同唔正確嘅維修方法，呢個細節位決定咗成機人嘅命運
去到事故後七年嘅1985年8月12日黃昏六點，JA8119執行日航123號航班，喺東京羽田機場出發，，準備去大阪伊丹機場，航程大約係一個鐘頭。雖然呢程只係短途機，但適逢唔少日本人要返鄉下過節(日本盂蘭盆節)，所以上座率極高，一共有509位乘客，連埋15位日籍機員一齊上機。
呢班機嘅機長高濱雅己，副機長佐佐木祐同埋飛行工程師福田博，除咗副機長之外嘅兩位都有相當豐富嘅飛行經驗，機長嘅總飛行時數更加去到12000小時以上。喺當日6點12分，飛機進入跑道並且滑行起飛，厄運即將降臨。
涉事三位機師相片
