癌症患者(家屬)交流區，入嚟呻下交換下資訊乜都好啦！

我阿爸早上2個月份行左
到依家都好掛住佢

留名

每年做果d body check有冇話分咩plan 邊到做比較好
定求其行入一間私醫話做body check就ok

我呀媽而家係胃癌STAGE 4
因為佢個胃基本上已經冇晒功能，所以佢完全冇食慾，亦都消化唔到任何嘢，飲水都嘔，唔飲水都嘔，個人好虛弱好瘦，成身都係皮包骨，神智都唔係成日咁清醒，連起身都要人扶...
呢個月不停出出入入醫院吊鹽水吊葡萄糖水，腎功能指數低下，咁嘅情況醫生話做唔到化療，中醫嗰邊都話佢唔適合用中藥治療，所以而家基本上係咩都做唔到，醫生都講到明而家只可以做舒緩治療，等佢舒服啲

我媽媽上年8月發現有胃癌，其實只不過係6個月，惡化速度已經係快到我估計唔到
明明上個禮拜佢仲自己行到去廁所，今個禮拜就連自己坐起身都冇力
一切都估計唔到

我好天真，我以為我自己已經接受咗事實，其實原來係未，我一直都呃自己佢會有希望，一直都呃自己只要照顧好佢就會有起息，但係呢個世界永遠係咁殘酷，絲毫唔會對應你嘅期望

今日醫生同我討論如果呀媽喺醫院突然間出事，個急救程序要點做，同埋問埋我意願做唔做，我嗰一刻淨係識喊，答唔到佢，連嘢都講唔到

我以為我READY好呢一刻，但係其實我仲未READY到
明明呢個人而家仲生勾勾喺度，佢把聲同佢嘅皮膚都咁真實，你同我講呢啲嘢喺不久嘅將來就會唔存在，我覺得好唔真實
其實照顧佢呢半年嘅時間同記憶，都好唔真實，好似發緊個夢遊緊魂咁

我媽媽係好命苦嘅人，嫁著個衰老公，我細個又唔生性成日畀麻煩佢，各種各樣嘅壓力迫到佢有精神病，但佢為咗我哋幾個細蚊仔，依然努力咁去做佢能夠做嘅嘢，然而直到呢一刻，佢畀出嚟嘅愛永遠多過佢接收到嘅愛，明明佢咁努力，但係都冇回報... 呢一刻真係覺得自己好無能，畀唔到佢幸福，甚至連令佢笑嘅能力都冇

我其實好想問佢，佢有冇後悔同佢老公結婚，有冇後悔生咗我落嚟
但係我問唔出...

SORRY唔小心打咗千字文，同時都好多謝呢度畀個地方我抒發吓一直以來抑壓住嘅嘢，呢半年我一直都唔敢直視自己嘅感受，因為呢啲感受會淹沒我，令我企唔到起身繼續照顧我呀媽

2年前發現淋巴癌，做左8個月化療，中間試過肺炎入院以為覺自己就死，好彩全程阿媽同老婆照顧。盡量當自己正常人，啲營養奶冇飲過，食得就食
不過唔夠3個月復發，轉睇qm，原來當初已經係4期尾，宜家用免疫治療，都叫舒舒服服，行得走得

巴打加油
我老爸未期試左而家最勁果隻免疫療法但都冇用
慢慢見佢愈黎愈衰弱咩都做唔到真係好難受
真係想像唔到走果刻可以點面對
而家希望佢安安樂樂去

雞，燕窩，大閘蟹　＜　雌激素，雌激素，雌激素

其實見到屋企人咁辛苦
香港有安樂死的話
你地會唔會贊成佢地去？

屋企人有嚴重cancer，而家full time照顧緊佢。黎緊會帶佢去外國做臨床療法，做得好有機會downgrade做手術，起碼過到呢關先，
之後會唔會復發都後話

我已經好盡力去做，就算做唔到都迫自己去做，但係我好知道無論自己做成點都係做得未夠好....
我淨係想可以對媽媽溫柔啲，可以令佢笑多啲，令佢感受到佢係被其他人愛著嘅感覺，但係我做唔到，其實我真係好撚憎我自己呢種性格，明明心入面有咁多嘢想講，點解唔可以坦率啲直接對佢講？點解對人溫柔呢件咁簡單嘅事都做唔到？

巴打，時間真係唔等人，當你以為呢個人好哋哋，仲好似以前咁一齊生活嗰陣，你估唔到嘅事會隨時隨地發生
所以諗到乜真係要即刻去做，唔可以等

係...... 有時望住媽媽隻眼，覺得佢好似好多嘢想講但係講唔到咁
喺佢眼神我都感覺到佢其實好驚好迷茫
我知佢仲想醫好呢個病，之前明明嘔到仆晒街佢都仲好努力食嘢，好有決心想谷返起身體去做cycle 2嘅chemo，但係身體就一日一日咁虛弱落去，虛弱到佢已經冇辦法再努力
親眼睇住呢個過程真係唔好受，特別係佢呢廿年嚟嘅日子過得咁辛苦，你會開始想問個天點解仲要咁對佢，好似嫌佢未夠辛苦咁

雖然呢6個月經歷咗好多嘢，其實理性上suppose應該已經有咗心理準備
但係我想講，冇人會真係ready到自己親人走嗰一刻，無論你用幾多時間準備，想像幾多畫面，到嗰一刻都係會崩潰

老豆聖誕前確診肺磷癌4期，依家打緊第兩次化療，見住佢身體好虛弱又咩都做唔到咁

留名 我都想分享下
好長用手機好難打
只能講後勤們辛苦啦
爸肺腺4

巴打爸爸肺腺4有冇標靶可以食？我見依家d標靶藥都係針對腺癌既基因特變。

偏偏我老豆中左肺磷癌冇藥可以食，只有化療可以做，但呢種癌用化療既效果都係一般。問過醫生話呢種最大原因係吸煙引起，但我老豆已經冇食煙10幾年。

講講自己先
老豆兩年前確診，作為大仔既我擔心到成日匿埋喊，
網絡資訊爆炸，好易搵到個嚴重性，弟弟性格比較冷淡，
好似你唔講佢都唔會主動去關心，媽媽好依賴我爸爸，
所以我要講比佢地聽個嚴重性之餘又要保持正面，好辛苦。
不過爸爸好勁，其實佢Ｄ明顯証狀，如氣促，同咳之外，
個人都係精神既，做左化療後，腫瘤明顯細左好多，冇氣促，咳少左。
所以停左，因為錢。
10個月後復發，再次開始化療，暫時情況唔錯，係副作用會攰。
而我最擔心係抗藥。

我爸爸應該都係吸煙引起
吸煙都好多冇得用標靶...
都係得化療。。其實煙都唔易戒，可能你爸爸間唔中都食一兩口。。
最on9我老豆，而家襯我地唔為意都會食

辛苦晒巴打，我都係大仔而且有個阿妹，可惜我個妹唔生性，老豆以前最錫佢，但出左事個妹都係照佢有佢玩，連老豆跌到都冇理過個老豆。

老豆所有事由我打理，每朝要打針同分好晒d藥，老母因為老豆生癌加埋個妹唔生性搞到情緒有問題，要睇精神科。

岩岩老豆食飯都話食唔落冇胃口，一陣為有沖多包營養奶比佢飲，依家只係希望佢舒服過埋剩下既時間。

你都辛苦了
你爸爸而家咩狀況？
我爸爸仲係識行識走番緊工同正常人一樣。
我自己係一個悲觀既人，所以即使係咁我都仲係好擔心。
不過聽好多人講，而我自己都認同，要保持樂觀，當佢冇事，
爸爸剛確診我又係呢樣唔比佢食果樣唔比佢食，果期佢既體重
持續下降，直到有一日我爸爸同我表哥講話咁樣佢好大壓力，
自此我就冇管佢，咁反而仲好。
同埋唔好上咁多網睇呢ｄ資料，你當我阿Ｑ自己呃自己都好，
其實有好多人好番未必會上網講，好多人一直有癌，自己唔知。
好多人冇睇醫生又冇事，醫院冇數據（當然我唔係叫人唔好醫）。
但上得網講好多都係我地呢Ｄ家屬。。反而負面情緒會較多。
同埋又咁講，睇下你爸爸想食Ｄ咩，唔好擔心，比佢食（當然魚生果Ｄ除外啦）。