癌症患者(家屬)交流區，入嚟呻下交換下資訊乜都好啦！

半年前屋企人確診乳癌，依家我就冇返學冇返工淨係照顧佢，係一個非專業24hr看護
依家已經做晒化療，等下個月開始做電療

想開個post等大家入嚟一齊傾下，有咩唔開心都可以係度呻。有咩問題都可以問，大家交流下
無論你係患者定家屬，我都想同你講聲「加油」

拋下磚先
啱啱確診cancer/照顧患者，好多時都唔知有咩唔可以食，有咩要食多啲
唔好食:
全部中藥材 靈芝 雲芝 人參etc (會令肝酵素上升，化療後容易發燒)
任何生野 (包括沙律
紅棗 杞子 (好多人煲湯都會落，要留意
雞翼

盡量唔好食:
會連皮食既生果(例如藍莓)(如果真係要食，就用食水洗三次先食)
有激素既雞
街邊野

食多啲:
肉！特別係牛肉！(要食多啲肉先可以令啲血靚(白血球及血小板)，如果血唔達標，冇得做化療)
雞，記得買冇激素既
紅色既生果 (推薦車厘子，不過記得食水洗三次！
雞蛋(化療後有人會有指甲脫落既情況，食雞蛋都會好啲
蕃茄

*有啲化療針打完後會冇乜食慾，見到肉會想嘔，但都盡量逼自己食啲啦，嗰段時間通常食雞會冇咁想嘔
*少食多餐對患者會比較好
*如果真係食唔到肉，點都煲下湯(加肉)

推

繼續推下先，希望多啲人睇到，幫到人

做緊化療期間，白血球會偏低，即係抵抗力會比正常人低。萬一病左，就會比較麻煩，因為會令化療delay。所以出街記得帶口罩
感冒發燒已經係不幸中既大幸，我屋企人不幸細菌入眼，醫生都話好罕見，最後入醫院做手術，住左兩星期，化療亦delay
針對白血球偏低，通常每次化療後，醫生都會俾升白血針你拎返屋企打。通常係打完化療針後第七日，就要連續打三日，三日時間要係一樣。嗰支針只要唔打係頭，打係邊都得，通常打手臂同肚會冇咁痛

多謝你

加油啊 希望有更多人睇到呢個post

唔記得講 我屋企人都係私家醫院做切片手術(毋須切除乳房)，手術後住左大約一星期
化療就係私家診所做，打八針(4+4)，兩星期一針
而電療亦將會係私家醫院做，做六星期，星期一至五都要去
大家有咩都可以問

*化療針有唔同款，針對唔同既cancer&期，會打唔同既針，針數亦唔同
*據我所知，公立醫院通常三星期一針

亦想大家唔好太擔心，電視劇嗰啲都係假，化療除左打針嗰下痛，其餘時間都係坐/瞓係度，好似吊鹽水咁。

多謝你 希望幫到人

推

屋企人癌症過身十幾年
有時諗番起以前啲事 覺得好似發咗場惡夢
個時年紀太細 又或者係心入面接受唔到
由診斷到過身 所有細節好唔真實 但個種不安同恐懼係真真切切感受到

唔單止病人 家屬嘅生理同心理狀態真係好重要
睇得出樓主好有心 全職照顧屋企人 仲特登開po交流
你有咁嘅魄力 相信你屋企人都會好硬淨

祝所有療程順順利利
一家人平安快樂

冇乜人
就等我講埋化療副作用啦
好多人其實唔怕做化療，只係怕啲副作用
咁通常都係:
脫(毛)髮
食慾不振
手腳冇力
作嘔
指甲(有可能)脫落

睇到呢度！唔好驚住！

脫髮係因為化療針係白痴，唔識分好同壞既細胞，所以會打埋好既細胞 開始脫髮既時間各人不同，有人一打完第一針就甩，有人可以第三針先甩
好多人會買假髮，市面上有a)全假髮 b)全真髮 c)3成假7成真髮， 我地係買左C既，比較自然，買左大約4500蚊
每個假髮大約可用四個月，通常都夠用嫁啦，做完化療大約半年就會生返晒啲頭髮，時間各人唔同，depends on你平時生頭髮快唔快啦，而聽姑娘講，好多人重新生既頭髮係更加靚㗎！
*呢啲專業既假髮，好多人會叫佢地做醫療用假髮。放心啦，完全睇唔出！連頭皮都好似 仲可以染！編髮都得！如果冇安全感，就戴頂帽啦，不過唔好買太厚，始終戴假髮都有啲焗

係 自己係呢幾個月都有情緒好低落既時候，始終屋企人好後生，我亦冇諗過自己咁快要接受呢啲事，身邊都冇朋友有相關經驗，好迷茫。不過好多人都話對抗癌症最重要係心態，所以都要自己克服，唔好影響屋企人。
多謝你 亦祝你一家人身體健康

加油呀巴打！
完全明白你感受 我媽媽大半年前確診鼻咽癌
嗰陣我都係無返工照顧媽媽
雖然有請人幫手照顧 但嗰段時間都係好難捱
特別係心情 一定好低落
我嗰陣係成日留係屋企亂諗嘢 爭d有抑鬱
好彩有女朋友係身邊支持先可以同媽媽一齊捱過
放心啦！你屋企人一定無事
好快就會捱過依個難關㗎啦！

頭先淨係講左脫髮
咁食慾不振、四肢無力、作嘔，通常都係打針後出現，不過出現三四日就冇事，回復正常
食慾不振，上面講過啦，少食多餐，飲下湯啦
作嘔，私家診所既醫生俾左啲好靚既止嘔藥俾我地，所以幸運地屋企人暫時冇嘔過
而指甲脫落，聽姑娘講有部分患者的確會出現呢個情況，每人情況各異，有人甩一兩隻，有人甩晒，當然都有好多人係冇甩
我屋企人做晒化療都冇甩，但手指甲就變啡啡紫紫，腳指公既甲就變白，好似想甩咁
咁其實都冇咩做到，盡量吸收多啲蛋白質，食下雞蛋，盡量唔好整到佢地。我屋企人就會係屋企著襪(後跟得隻繩嗰款)，淨係包住腳指公。而出街就著厚襪加拖鞋。小心啲唔好俾啲唔睇路既人踩到
化療後大約半年，會生返靚
不過醫生都話，就算佢甩左，其實係唔痛既，唔洗太擔心
*指甲會變啡紫，係因為啲化療藥始終係毒藥，所以有呢啲變化係正常㗎

出入都記住戴口罩，因為做完化療抵抗力好弱好易瀨野

冇追post. 只係想同大家講，
咪撚信自然療法拖到末期先去搵返西醫

多謝你亦恭喜你 柷你地繼續健康快樂！
我媽媽過埋四月都捱完啦
我都好感恩有男朋友陪住自己
利申 絲

依家好多人病都唔戴口罩，咳都唔會掩
坐地鐵巴士一定一定要戴口罩

加油
屋企人有幾個cancer 不過以前好細個
所以我依家都驚有遺傳

每年去做一次bodycheck啦 我都打算過幾年後開始每年check一次

前排我媽媽都係確診乳癌 依家做緊電療
因為家族好多都有事
所以我前排都去咗check下超聲波
發現左有幾粒良性腫瘤(暫時)
依家出街都避免食雞

Btw 樓主都要加油

樓主加油！
之前老婆都經歷過化療 宜家好番了
期間病左發燒真係會比較麻煩
有時自己行開下幫自己減下壓 好快捱過

打左咩化療針？4+4我估係AC + T針？同埋有冇打埋標靶藥？

私家醫院&診所醫生，假髮公司，大家有興趣知我先講，唔想俾人話打手 (不過呢啲醫生/公司都好好)
至於私院(仁安)費用，淨係手術住院，大約21萬，唔計後來覆診檢查。
私家診所化療，每針20000左右。
私院(法國)電療，約9萬。
其實揀私家係因為想用錢買時間，由確診有canaer後，大約兩星期就做手術。我相信公立冇可能會咁快 診所就兩星期一針(公立三星期一針)，打針期間都係一人一間房，環境好。

上面亦講過，屋企人不幸細菌入眼(最大原因係化療後白血球低，俾細菌有機可乘 )，情況都幾嚴重，咁我地就去左養和睇&做手術，淨係手術住院(10日)，約20萬，唔計後來覆診 (不過住半私家房，即係私人房但2個洗手間4-5間房share，所以收費只作參考)，醫生都好好。都係有人有興趣知邊位醫生，我先再講

如果經濟負擔到，我都建議大家揀私家，特別係做切片手術，始終醫生姑娘都冇咁忙，會比較細心，照顧都比較全面(仁安姑娘非常好
題外話，養和啲大房(包括姑娘)好差，好似公立醫院咁 (入院做手術前一星期入去住過一日)。後來住樓上，環境態度180度轉變

做完電療好快就冇事，加油加油！
請問做電療期間皮膚係咪會好乾？有冇咩要注意？