坦白講,睇架車幾錢啦,如果係萬零兩萬嘅就唔建議上架,原因一句講哂就係唔符合成本效益
如果有錢買十零萬嘅話就一上無妨,不過新P就建議平平哋買架錢七操下車算,touch wood有咩事上嚟都冇咁肉赤
個人認為
試車係必需,你去買個足球都會拍兩拍睇下彈唔彈得起啦,何況買車!?
同埋
強烈建議搵個識車/揸開嘅人一齊去試
試車基本嘢:
油門:通常都行得郁嘅,可以試下個反應,例如會唔會lag得好緊要。如果架車高轉都踩唔去就有機會係極力子有事,可能跣咗(留意
自動波都係有極力子嘅)
迫力:
關乎你嘅性命,必需試!如果冇迫力嘅話基本上都唔駛考慮,揸車嘅,唔駛玩命
極力子(如有):特別試斜路起步,如果上斜起步踩唔去嘅話咁應該係跣極力子,要換
手掣:搵斜路試,睇下緊唔緊。特別係棍波車嘅話要試真啲,因為大斜路起步要佢幫手
錶板:睇下有冇啲特別燈著,例如engine燈、VSC等等
避震:試下會唔會好dun/好拋
軚盤:呢個要揸真啲,試清楚有冇虛位、有冇搶軚,如果揸到出街左搖右搖的話可能係和尚頭出事
指揮/迫力/夜行燈:睇下係咪正確地著,有時唔係賣家跣你,但特別車尾燈燒咗佢自己都未必睇到
水撥:睇下有冇「刮刮」聲,有嘅話係老化,換咗就冇問題,亦唔會好貴
波棍:
特別係棍波車,必試。試真佢有冇虛位,如果有可能導致入錯波
車身:少花少凹嘅話就見人見智,你接受到就得,主要睇睇有冇大撞過。望埋擋風玻璃有冇裂痕
頭冚:望清引擎、水箱(同埋車底、轆)等等有冇油漬,如果有,可能有滲漏。睇埋龍門架有冇肴/凹,如果有,可能大撞過,要考慮清楚。開埋冷氣望下個泵轉唔轉,入車試埋冷氣效果
冷氣:連風扇開到最大試,如果冷氣弱就要諗諗
,因為
整冷氣係全車最麻煩(熊王巴打應該好深感受
)。當然,如果問題唔嚴重可以「雪種大法」解決(題外話,雪種喉大槪$1XX,冇穿冇爛可用一世;雪種一支$30~$40)
其他:聽埋行車、轉彎、剎車有冇雜聲
錢七嘅話,咪數、手數個人覺得唔太重要
咪數嚟講,呢個世界太多開心錶(參考數字:一般車每年10,000公里);手數嚟講,車齡高嘅話手數高都唔出奇。最緊要係安全、機件精神就好
買二手車甚至錢七,
唔好諗住完美,自己接受到就夠