[Live] 一個人的朝聖路 Camino de Santiago

從來都無咁諗過, 越難行先越興奮, 反而覺得camino 真係太簡單, 無做開運動都適合去行

香港行開山個D人, 去行camino嘅話, 都係廿幾日就行完

睇嗰個鬼知咩
淨係見到日日行路識人好過癮

Camino其實又真係幾簡單
但就係咁先好 Chur得濟就無心無力思考

條路, 平平咁上, 又平平咁落, 超適合一路行一路諗野/同人吹水

而且可以望到好遠, 香港根本好少機會望到幾公里外

曾經有個Fd話想Join最後100km
佢又係住元朗嗰頭
依家好似又係喺日本

不過你話自己行就應該唔係佢
巴打是咪SJPP出發行全程

所以其實天氣好的話真係散步feel嘆住行咁濟

last100km, 佢要搭機去 madrid or barcelona, 再轉內陸機, 跟住再搭巴士

我一個人行個時, 一路大聲唱歌, 跟住畀對外國老夫婦聽到, 老婦人同我講唱歌好啊, 我想搵窿鑽

同我一鳩樣
不過我肯定前後無人先自己發癲

本黎我都肯定無人, 過咗個隧道, 轉角遇到人

係呀,不過唔知搭火車個度點,撞正罷工

可以搭巴士, 叫佢搵定

好似搭好耐

佢原本諗住點去?

好似搭十一粒鐘
好平 我有諗過搭巴士

我指Paris去Bayonne

Day 5
Puente la Reina - Estella 23km

隔離床韓仔鬧鐘五點半都無就響，但到我執好嘢出門都起床。睡袋暖笠笠一教就瞓天光窗外晴空萬里，天清氣爽，又係另一日行路嘅好天氣。嚟之前好想影一次歐洲嘅星空，但事實係十一點都未天黑，加上依家相機又壞咗，所以唯有暫時作罷。噚日用€1買咗六個牛角包，我自己食咗三個就好飽，其他朝聖者都唔食，唯有袋起上路。


一如以往只有朝聖者在清晨嘅街道步行。路過出城嘅小橋，有個乞衣喺橋頭乞食。噚日我喺同樣嘅位置見過佢，唔知佢係咪喺同一個位置凍咁成晚呢？見到佢嘅時候，諗起Guy講，朝聖路上唔係只有得著，仲有貢獻。於是我就將身上食剩嘅麵包俾晒佢。個乞衣多謝完我之後就，狼吞虎嚥咗食晒。衰啲講句，喺香港，施捨俾乞衣之前都要諗過佢係咪真乞衣。的確，我又無少咗啲咩，只係將的用剩嘅嘢分享出去，其實咁先係正常社會應有嘅樣。


Guy講嘅說話仲喺我腦海盤旋緊。諗諗吓，可能Camino de Santiago唔會改變到一個人嘅本性，怕醜嘅依舊會怕醜。佢只係將一個人最好嘅一面帶出嚟，然後用呢個自己最好嘅一面生活個幾月。現實嘅社會中太多限制，人一定要帶住面具先可以生存到。嚟到呢到可以安心除低面具生活，盡情同人交流互動。俾個例子，香港人唔會同路人互相打招呼，但我一直覺得同人打招呼只係好正常嘅事，但唔知點解喺香港總係唔想做，上路之後有理無理都Hi咗先，對方有回應的話其實都幾窩心。

清晨嘅氣溫依然有啲凍，朝聖者們繼續向西面嘅Santiago出發，被旭日初升嘅太陽曬出長長嘅身影。野外小路人影依然稀疏，偶爾會出現朝聖者嘅身影。沿途景色仍然是青草綠樹，間中會行過唔同嘅田野，放置一個一個木架嘅可能提子田，未到收成嘅季節，架上只得綠藥和長藤。今日嘅頭頂上只得藍天白雲，咩咗好多日咩太陽眼鏡終於用得著。





行到十公里外嘅荒野之中，唔知邊個前人喺平店建造咗一個朝聖者專享嘅休憩空間，平台上面擺放咗應該係手造嘅木傢俱，仲有木櫃放咗多餘嘅物資任人自取，擺設到好似一個野外嘅客廳咁，環境的確幾休閒。但唔知點解除咗我之外，無朝聖者願意註足欣賞，幾個同我步速差唔多嘅人望都無望就繼續上路了。





跟著貝殼標記沿路走，田野同村鎮嘅景色輪流進入眼簾。路邊一棵農田嘅櫻桃樹生到阻擋行人路，我前方嘅朝聖者伯伯隨手就摘咗一粒嚟食。見四下無人，於是我又多手摘嚟試吓。一口咬落去，嘩，爆汁，勁甜。我諗依家係車厘子當造嘅季節喇。



沿途遇上兩個已經見過見面嘅西班牙女生，今日突然心血來潮用九流嘅西文自我介紹，短髮嘅叫catherine，噚日喺山頂遇過，肥妹仔係Maria，前日瞓我下鋪。我哋交換完名之後就各自繼續自己嘅行程，無結伴同行。


經過幾日嘅經驗，我已經知道城鎮嘅教堂都有蓋印，於是每經過一個教堂，都會入去八吓，再睇吓有無印仔。雖然印仔嘅意義不大，但係我都想豐富吓朝聖護照嘅內頁。



自己再行咗一陣之後，西班牙肥仔Igor自己一個人前行。佢唔係自己一個人上路，沿途行過已經見幾次佢同四個西班牙妹一齊同行。我又一次拎出九流嘅西文同人傾計，佢聽明我噏乜，但我聽西文就聽唔明，於是佢就講完一句西文再講多次英文，我就用啲濕鳩西文答返佢。原來佢同啲囡囡係護士學生，唔怪就可以一皇四后嚟行路啦，講真我都有啲羨慕，啲囡囡真心唔差。但佢哋唔係朝聖者，只係因為住喺附近嘅城鎮，放暑假出嚟行幾日玩吓，行埋今日就會返歸。



同佢行咗一陣就話要停低等埋啲囡，我自己行多一陣就到Estella了，時間大概係12點半。Estella本來係我嘅終點，但噚日決定咗唔想停喺大城，但係嚟到之後發現前面十公里嘅albergue都貴Estella成倍，於是我為咗慳幾蚊就留底咗喺Estella喇。有氣有力，但就咁貿然停低，搞到自己有啲罪惡感。依家Michele同志汌應該已經領先我好多了。



Estella嘅albergue €6一晚，設施就應有都有啦，不好不差咁。

Estella嘅城市中心同朝聖路中間有一條河分隔，城市嘅另一邊有一個鬥牛場，但太遠了我又已經睇過，所以喺河邊hea吓，是但搵間餐廳食lunch算了。食咗一個Pizza，飲咗杯啤酒，埋單就€8.6。

話說我喺Albergue又返Guy，佢喺到睇緊稿，原來佢係演員嚟，一路行Camino都不忘背稿。噚日佢又無提起過，真係睇唔出。
食完就返歸沖涼洗衫打文，西班牙人兩點至四點係小休時間，條街都無嘢開，所以我都跟返西人時間表，等到四點先出去行啦。

間公司話部份班次會開,如果我搭個班冇開可以免費轉另一班

有氣有力，但就咁貿然停低，搞到自己有啲罪惡感。依家Michele同志汌應該已經領先我好多了。

其實行camino 好多時情況就係人生嘅縮影.

為咗錢, 作出取捨.

有能力做得更好, 但stopped.

曾經一齊嘅戰友, 已經越走越遠.

講得好中
幾句就總結晒我今日嘅感受

因為我調返轉

一直狂奔嘅關係, 第二日開始, 水泡陪足我全個camino.

一直狂奔, 好傾個D跟唔上腳步, 都被我甩低哂, 唯一一個同我差唔多速度嘅波蘭仔, 竟然係一個逃票撚,
入要畀錢嘅教堂, 佢由出口偷走返入去..
住albergue, 趁管理員唔起度, 自己入去霸床

Hea到五點再出門。Estella城內有三個教堂，最近albergue嗰個已經喺入冊前去咗蓋咗印。第二個喺山上面，行完梯級要兜咗個圈先搵到門口，入面黑媽媽一個人都係，正好可以俾我靜思吓。我坐咗喺前排嘅排櫈一陣，腦袋空白一片無咩諗頭，淨係留意到教堂入面好靜好靜，靜到耳仔嗡嗡聲。臨走之前對神像講咗一聲Thank you，雖然我無信教，但學習謙卑應該係每個朝聖者應有嘅心態。





第三個教堂喺城中心廣場，無開。廣場好多細路踢波踩車，四圍就係酒吧餐廳，啲細路唔驚兜腳踢咗個波去人哋杯酒嘅咩。我就咁坐咗喺廣場旁邊發牛逗，曬吓太陽，聽日啲塞豆窿又叫又笑。



坐到六點鐘，我又起身再行吓，行行吓見到Simon同德國妹同一班人喺路上嘻笑緊。我埋去搭嗲，Join咗佢哋一齊去超市。佢哋住喺Estella另一間albergue，一行有五個人德國妹同佢個Friend、Simon、仲有兩個Quebec人，即係有兩個德國人、三個Quebec人。佢哋好似已經好熟好開心，我加插埋入去反而有啲格格不入。同埋各位交換完近況之後，簡單交流吓我就自己走先了，始終夾硬加入人哋圈子有啲奇怪。

Bye咗之後就自己返廣場搵餐廳食飯，Paella+布甸+啤酒先€6。就喺我落完單無耐，就有個波喺我頭上飛過，落咗喺我前面不遠棵樹...


朝聖開始咗幾日，圈子都開始慢慢形成，韓國人自己一堆，Qecbec人自己一堆，西班牙人自己一堆。志汌同Michele離開咗之後，我好似成日都自己一個人，雖然好多朝聖者都吹水吹過一兩嘴，但其實只係hi and bye，就算同每個人嘅關係再好，但總搵唔到一個適合嘅飯腳。究竟識得人多好，定係識到熟人好呢？當人哋個個都識到啱節奏嘅朋友嘅時候，我仲係自己一個人，有少少開始感到孤單了。不過我哋每個人其實都係孤單嘅個體，正因為孤單先會聚埋一齊，令自己變到唔孤單。長路漫漫，我就唔信路上遇唔到啱傾嘅人。

有個連登巴打講得好好 (巴打請容我照Cop落嚟)，Camino就好似人生嘅縮影，好多時要因為金錢而折衷，明明可以做到更多但卻選擇停止，身邊嘅人唔係永恒，曾經共同進退嘅戰友總有離別嘅一日。我要學識嘅係接受現實，從呢個現實之中搵一個最適合自己嘅生活方式。現實如是，Camino路上亦如是。

我再次覺得，城市太大，沒有容納我嘅空間，小村小鎮反而有我容身之處。明日嘅原本計畫係21公里外嘅Los Arcos，但我想再走遠啲，搵一個啱我嘅小鎮。

話時話第五日我隻腳板底仲係好乾淨無水泡

lm

多謝你睇咗咁多咁悶嘅字