[Live] 一個人的朝聖路 Camino de Santiago

我早你一日到,1號番香港

O Pedrouzo - Santiago 19km

四點響鐘大大聲響，我諗嘈醒咗半間房嘅人。我起身嘅時候Helin同Mandy已經起咗身執好嘢。嘈醒完人我都嗱嗱臨走佬，驚有人起身打鳩我。我哋各自出發，獨自走入黑暗，向最後嘅目的地出發。

由起步開始就搵唔到朝聖者標記，但我知道前進嘅方向，所以走上馬路旁邊嘅道路，向西出發。馬路嘅街燈非常光亮，根本用唔著頭燈。但每當有車高速經過嘅時候，就會變得非常恐怖。

行行下發現右方不遠處嘅叢林，有幾點白光四圍亂照，嗰條應該先係朝聖者嘅道路。馬路上得我一個獨自前進都咪話唔驚，行咗十五分鐘左右就行番上朝聖者嘅行人路，有一大班朝聖者寫走入漆黑嘅叢林。

叢林入面伸手不見五指，樹木將頭頂嘅星空完全遮蓋。朝聖者們打開自己嘅頭燈電筒摸黑前進。

Helin係一大群摸黑前進嘅人之一，行行吓撞到佢，於是就一齊行，但行行吓佢又突然消失喺黑暗之中，行行吓又喺我前面出現返。

漆黑之中無景色可言，只見前方頭燈照耀嘅小光圈。路上我不停回想過去三十二日嘅點滴，嘗試蘊釀到達時嘅情緒。


我記起同每個人嘅相識經過。第一日第一個認識嘅志汌，佢已經好早就行完了。第一次見到Helin係第三日喺Pamplona。認識Paul, Sandra, Bernald, Helin呢班人係第五日喺Estella，嗰日嘅日記我話自己好似搭枱咁，同佢哋好唔啱傾。第七日Logroño嗰晚同Bernald傾偈，傾到依家晚晚聚埋飲酒。仲有同Guy嘅相處時光，第四日喺Puente la Reina同佢嘅Deep Talk，最後一次見到佢係Burgos之後嗰日，我同佢講我一定會爭到Sambol嗰十幾個床位，佢叫我“Run, Lee. Run.” 景色、艱辛、低落，全部都已經無乜印象，腦海淨底嘅只有同每個人相處嘅回憶。

心情出奇地平靜，仲以為會好唔捨得，好多情緒。


我同Helin一口氣行咗10km，然後先搵Cafe坐坐抖抖。清晨嘅朝聖者不多，日出之後路上就越嚟越多人。最後一日，路旁嘅樹林出現咗好鹿，之前日日都見到鹿出沒注意嘅告示牌，最後一日終於見到。



行過咗遊客景點Monte de Goto，餘下只有5km，從山上已經可以見到城鎮，嗰到就係眾星聚集之地，Santiago de Compostela。離城鎮越近我心情就越興奮，行咗33日，終於見到Santiago嘅入城路牌。心情還是只有興奮。

入城仲有行多大半鐘，由現代化嘅建築，行到入中心就開始見到舊建築，越行越興奮。我叫Helin跑，佢話已經跑唔郁。兜兜轉轉之後，終於見到主教堂嘅背面。我口噏噏係咁講Oh My God.唔敢相信終點在眼前，時間仲未到十點。喺拱門門口已經見到Quebec Lucius同Marina，佢哋已經歡迎緊我。



一行出拱門，見到大教堂個外牆，我就已經行唔到，直接累低咗喺地下。Oh my god。三十三日。我行咗三十三日、七百幾公里。就係為咗嚟呢個教堂。終於。終於都到了。



我就咁攤咗喺地下一陣，一起身就見到先到嘅人已經嘅到等緊我哋，Quebec Paul and sandra，荷蘭大叔Han。一見到佢哋就喺到亂叫，WooooooooHoooooooooooo。廣場有好多Tourist望住晒，WFC.


每個人輪住嚟擁抱，恭喜我哋終於完成Camino。每個人都好親切，好真誠。呢個就係我中途想放棄，但繼續行落去嘅原因。我想成班人喺終點互相擁抱，慶祝完成嘅喜悅。今日我做到了，我唔係孤令令一個人，有人喺終點等我


越嚟越多認識嘅人喺教堂前廣場聚集，越嚟越多人陸續到，每個人都互相恭慶。我哋大家都做到了。


我唔肯放低我個背囊，因為佢陪咗我三十幾日，我唔會喺到放低佢，咩住重量嘅感覺非常好。

跟住我就去Prilgrim office拎埋證書，時間仲早，唔多人。Office入面好好多未見過嘅面孔，大家都嚟自唔同嘅國家，完成咗唔同嘅Camino。


證書有兩種一種係免費，係拉丁文證書，就咁寫名，另一種要俾€3，會寫埋行咗幾多公里，喺邊到出發，我就兩張都要晒。睇住伯伯寫我個名，寫我行咗799km，突然有啲淚水湧上眼球，但我忍住咗。799km真係好遠，三十三日。

拎完證書就返廣場Hea，到達嘅人繼續陸續有嚟，有啲唔識嘅人都走埋嚟互相擁抱，呢種大家庭嘅感覺真係好。廣場上有兩種氣氛，一種係朝聖者到達完成嘅喜悅感，互相祝福擁抱。另一種係跟團嘅遊客圍埋領隊身邊聽講解，聽到牛吓牛吓咁。


本身都淨係得完成嘅喜悅同興奮，一坐低無耐就開始嚟料。有啲想喊。三十三日。我朝思慕想咗三年。終於用自己雙腳行到了。

巴西大哥Leonardo同我講，你成功喇，你無放棄到，你得咗喇。我同佢講過我想中途放棄，今日再聽到佢講呢句話，又有啲淚水湧上眼球，我又忍住咗。


可惜嘅係始終都見唔到Guy，Paul話佢可能已經上咗飛機返加拿大了。

過咗無耐我同Quebec Paul、德妹Sandra、Helin、Mandy去搵Albergue，因為Santiago嘅Albergue好易滿，所以要好早搵。行行吓先發現漏咗碌棍喺廣場，於是又折返去拎。

返到主教堂又不停撞到認識嘅人，喺廣場又撞返匈牙行利大哥Csabi，本來佢話今日會起行去Finisterre，結果佢決定停多一日。道別之後嘅重逢，感覺好奇妙。

拎完棍就去搵Albergue，Helin佢哋話搵到間€9嘅Albergue。Santiago好多Albergue，但好多都係超過€10。平係平，但好撚遠，從主教堂去要行成半粒鐘。


Albergue由一個華人營運，好多口水，淨係介絡附近設施都講成半個鐘。佢都幾搞笑嘅，但痴痴哋線，話自己好憎Chinese，但又話自己由心而發係Chinese。我話我係香港人，唔係中國人，佢仲同我拗。


沖完涼就喺Albergue花園Hea，想打文紀錄，但我太攰了，就咁喺長椅瞓著咗。


Albergue附近有兩個大商場，我哋去其中一個搵嘢食。商場有food court，有戲院。走入商場嘅感覺好奇怪，呢次係我呢個月嚟第二次走入商場。我哋買咗個Kebab返去食，返去仲要晾衫。


到咗Santiago，終於再用洗衣機洗晒全部衫。本來要俾錢嘅，但洗衣機唔係投幣式，我哋學識咗set機洗衫，於是就偷偷哋開機洗衫。

又返花園hea，瞓喺長椅望住藍天，回想過去嘅三十幾日，有啲記憶好模糊，有啲記憶好清晰，好似發咗一場好長嘅夢咁。

逢星期五晚上七點半有特別彌撒，我哋六點就出門，聽講晚上會fing煙筒，被煙薰過就俾祝福好似係咁。


我哋早半個鐘就去霸位。主教堂唔係特別靚，但反而舊舊哋仲有味道，中間就係金光閃嘅神台 Mandy讓咗個前排位俾我，我坐最前睇。老實講個彌撒全程西文，都唔知講乜，煙筒都無咩感覺，最衰啲西文唔夠好。



我突然諗起三年前發過嘅朝聖夢，夢入面我自己一個人喺黃土綠草獨自前行，越行越多同行者。又諗起朝聖嘅點滴，正正同夢境一模一樣。我喺夢入而生活咗個幾月，又有啲淚水湧上眼球，今次我忍路住流咗兩滴。夢想成真就係咁嘅感覺。


彌撒之後又有一班朝聖者嘅出口聚集，大家互相擁抱，不停道別，合照留念，好似畢業禮咁。有啲人已經完成自己嘅步行，有啲會搭車去Finisterre，有啲道別已經係最後一次。無論交情深淺都好，彼此認識嘅時間依然太短，真係希望可以繼續一齊行落去。一個正式嘅祝福道別，為一段關係寫上句號，為大家心中留下美好嘅回憶。



搞搞吓都差唔多成九點半，我哋趕去超市關門前去買啲酒。然後Helin話想去間素食餐廳試，我哋成班人去陪佢，最後我淨係食咗個薯條。返Albergue繼續飲酒，今晚係Mandy Last night，一定要飲多啲賀賀佢。


飲到點幾鐘，Bernald仲未返，其他人都去晒瞓覺。我又醉又攰，噚日瞓得三粒鐘。Bernald驚無門口入，叫我等埋佢，等到兩點先發現原來無鎖，頂。


Santiago唔係我嘅終點，但依家我覺得之後嘅旅程已經係額外。Santiago係終點，係完結之處。喺Santiago留幾日，星期一就會再出發，走去世界盡頭Finisterre。

恭喜巴打到埗

朝聖路走到呢到已經完結 但旅程仲未完
我會喺Santiago留三晚，星期一先再出發 行三日去Finisterre
今日全日都係hea、遇人、飲酒、食飯、吹水
無咩好寫就唔寫了，呢個post都到此完結了


好多人要多謝嘅
最初啟發我嚟嘅閃塵絲打
一路上俾好多意見我嘅馬戈巴、唔係咁呀巴
當然仲有多謝一路有睇嘅巴絲
特別係留言嘅各位，見到有人話睇到眼濕濕，有人話睇到發夢夢到自己行，有人話睇完之後好想嚟行
呢啲日記本來只係俾我自己回憶，無諗過會有人睇到咁大反應
開呢個po嘅原因都係想分享呢件事俾更多人知
我嘅朝聖路有好多巴絲支持 你哋講嘅嘢都喺我腦中思考過
謝謝大家


接下來仲有三日行程可能會開新Post？呢個post差唔多爆

睇到呢到嘅巴絲揮個手
謝謝大家

呢幾日有時間你可以睇返你開頭嘅post, 睇返自己嘅心路轉變。
camino畀機會人了解自己，點解我嗰時會咁諗，會有咁睇法。了解自己咩情況會出現d唔好嘅諗法，將會起以後幫到你。

好正，好精彩

今日再出發
Finisterre

加油

睇曬，多謝樓主

都係懶得開新post了
遲下喺到一次過po 3日啦
Live見到海了

行完曬了


我仲以為無人睇無再update

文就懶得打了
update少少近況啦

話說已經行曬離開咗Camino兩日
依家人在里斯本hea緊 好悶
呢兩日一靜落嚟就流馬尿
好掛住路上日子 好掛住路上伙伴
大家各散東西唔知幾時先有機會再聚再一齊飲醉發癲
不過人總需要勇敢生存
我都承諾咗返香港之後會努力生活 下次再見嘅時候唔會再係好sad嘅港仔

我依家嘅心情好似失戀咁
咁形容好奇怪但係最貼切

準備九月出發
多謝樓主

有有有

話說去Finsterra嗰日行咗無耐就見到分叉路一邊係去Muxia 另一邊個Finsterra



左邊！
再行一陣就見到藍色嘅大海 行咗成四十日終於見到海嗰吓勁興奮




再行半鐘就到沙灘 有啲鬼妹就咁露點曬太陽

咁又話說到Finsterra嗰日係小弟生日 呢個生日對我嚟講真係好有意義


有粒石仔我由第一日就帶住 到咗Santiago之後心血來潮喺上面寫咗幾粒字 生日嗰日將佢Dump咗落大西洋 嗰日成班FD聚埋一齊同我慶祝 諗起都開心到眼濕濕

Finaterra西面有個沙灘好大浪好靚

喺Finsterra hea咗三日
世界盡頭嘅日落
仲有兩個囡囡一齊睇




Finsterra城同世界盡頭仲有3km距離 最後一日朝早我咩埋背囊再上多次盡頭 我覺得咁先係真正完成







夜晚成班人攬埋一嚿講byebye
第二日搭車走嗰時自己喊到仆街
上車嗰吓先發現自己已經好攰好攰了
㗎車返Santiago兜咗兜上Muxia 都係Finsterra靚啲




我嘅朝聖路就咁就完了
都係嗰句 頹到仆街 完全無心情做觀光客
好似失戀咁 一停低啲回憶就Flash Back

依家我喺里斯本 聽日準備上一上英國探個朋友 過幾日再返巴塞




再一次多謝大家睇

再講多少少
超超超超超推薦廿歲頭嘅巴絲行一轉
你有sem break有時間 行一轉可能會發現自己前路想點行
出發之前我都好多香港人一樣好頹好絕望 行完呢程對我自己最大嘅轉變係對未來無再灰心
我同自己講 返香港之後一定會努力做人搵出路 下次再見到呢班朝聖朋友時候 唔會再係頹鳩港仔
完咗之後呢兩日諗咗幾諗 真係感覺到自己放低咗好多心結

如果有人想問問題 或者交流吓
歡迎留底tg
又或者留言講聲話我知我留tg
真心愛上朝聖呢件事 希望多啲人知道