Day 12
Atapuerca - Burgos 20km
半夜四點半真係起咗身睇星星！一開門見成天都係雲，屎都唔見唔到一粒，於是乖乖哋躝返上床。再醒嘅時候就係五點半。其他人都未醒，我搬咗個袋出房慢慢執，食晒早餐先出門。門外仲係密雲滿佈，而且仲好大風，仲有少少雨點，睇嚟都睇唔日出，於是就毅然起行。
一開段就係上山路，沿途烏雲大霧。無落雨已經係大幸，但我出門著好晒全副裝備，以免相機悲劇再發生。我發現我件雨衣有好好嘅防風性能，著埋嚟保暖防風都唔錯。
山頂係一片平地，仲有係大十字架，同啲石頭布陣。因為大霧嘅關係，山頂嘅景色好似Outlast邪教場景咁。山頂大霧到完全睇唔到前路，朝聖者們只能盲目向前。
行咗無耐就係落山路，霧無咁厚，但仍然好大風，路兩邊嘅稻田被大風吹成草浪。大風到成個人都吹得郁，好彩吹順風，逆風嘅話一定好難行。
落山之後就到Cardeñuela Riopico，係另一個好靜嘅小鎮。行行吓終於頂唔順眼瞓，入咗一間無乜人嘅café飲杯咖啡，電視播緊西文嘅多啦A夢。
飲飲吓聽到後面有人講咗句「Old man...」，轉頭一望，係兩日無見嘅Guy！！！我哋都無諗到會遇到大家，仲要喺個咁荒蕪嘅Café相遇。佢同唔少人嘅諗法一樣，早幾日開心過頭得濟，要搵個寧靜嘅地方沉澱吓。如果日日都喝酒作樂，就唔係朝聖嘅本義。佢前日會去咗Santo Domingo嘅下一個城Grañon，噚日去咗Atapuerca嘅下一個城，即係Cardeñuela Riopico，仲話自己噚晚一個人包晒成間Albergue。見返Guy堅係開心，佢係其中一個最好傾嘅Camino Friend。上次佢請我食飯嘅時候我應承咗要請返佢食三文治，所以我就埋咗佢張單。
出Café之後我哋結伴上路，一齊走到目的地Burgos。同Guy真係好多口水，講吓自己早兩日嘅經歷啦，講吓我瘋狂練習嘅法文自介啦，俾佢笑俾我講到1999。我哋無停過咁吹水一路行行行，唔覺唔覺就離Burgos好近。
後來有兩個意大利伯伯途經，我哋變咗一行四人向Burgos邁進。其間又講起咩係「朝聖者」。意十利伯伯分享咗一個故事，話朝聖者分三個層次。第一層，朝聖係為咗享樂遊覽，沿途吃飲玩樂。第二層，朝聖係為咗尋找意義，途中不斷思考點先係「真正」嘅朝聖者。第三層，宗教型朝聖者，乜都唔諗，只知道要做，純粹為朝聖而朝聖。伯伯講嘅嘢好值得思考，我諗我係第二層與第三層之間。
Btw，今日講起Google Search Guy個名Guy Jodoin，原來Guy有自己嘅Wiki同Imdb Page。原來佢喺當地行出街會有人認識佢，好難想像 個當地出名嘅演員會係我其中一個最好嘅Camino Friend。不過我會盡力唔諗住呢樣，Camino路上每個人都放低自己原來嘅身分孤身上路，我都唔應該用佢演員嘅身份標籤佢。
[url]網址[/url]
buen camino!
Burgos就走，睇下都幾多人分段行
你係咪會去巴塞, 啱啱隔離有個post 浮咗上黎
我會留意住
