[Live] 一個人的朝聖路 Camino de Santiago

巴打呢

喺到未死我
第一日行到roncesvalles
癱咗喺到打緊文
喺床wifi好差up唔到相
一陣打完落樓下再一次過po啦

上年5至6月一條友用左34日由SJPP行到Fisterra 巴打加油

有無落雨?

我今朝到左Santiago

巴打行完有咩感覺
會唔會去埋Muxia

落咗一陣過雲雨
時晴時雨咁

無咩特別既感覺，聽日會搭巴士去

有無啲經歷分享吓

做咩唔行埋去

主要係無時間，其次係想比對腳抖下

Day 2
SJPP-Roncesvalles 24.8km

五點半俾執嘢聲嘈醒咗，賴到六點先起床。個睡袋暖笠笠好舒服，不枉咁重都帶嚟，間房又靜，無鼻鼾無嘈，瞓得好足。早上起身執嘢，啲衫仲係唔乾，無辦法唯有照放入袋先。搞掂晒就喺albergue食埋早餐先走，就咁兩塊包夾牛油，加杯咖啡就起行。

噚日認識嘅志汌一齊行足全程。據說SJPP去Roncesvalles嘅路係全程Camino最辛苦，因為要上山上到海拔1450米，再落返950米。

一開始嘅路係普通上斜車路，一齊起步嘅都有半打人，跟住人行連地圖都唔使睇，大家無交換姓名，各自淡淡交會，氣氛好和諧。天氣算係唔錯，陰陰哋無太陽無落雨無大霧，氣溫涼涼哋，好似秋天咁。


沿住延綿山路向上行，沿途風景靚到爆炸，日出嘅晨霧從山上睇變咗雲海，藍天白雲綠草，成個組合無得頂。體力上又未攰到睇風景嘅心情都無，嘆住靚景一步一步向前行，越上高啲就睇得越遠，風景都越嚟越靚。




行咗個半鐘左右，去到Orisson一間albergue+bar補水，聽連登巴打教路，一停低就除鞋按按腳，抖咗十分鐘又再起行，一齊出發嘅其他朝聖者開始拋離我，我都要急起直追了。


沿路繼續上斜，陽光開始出返嚟，暖暖哋唔會太曬，風景亦都越嚟越靚，望落去可以睇曬附近嶙峋嘅山勢，睇極都唔厭，影極都唔厭。眼簾之內基本上只得藍色綠色白色三隻顏色，沿路上山淨係聽到雀仔叫聲同自己嘅腳步聲。雖然一路出緊力上山，但心境好平和，淨係需要留意前路同埋四圍嘅風景。其實我今次行都幾好彩，一嚟無落雨，二嚟無霧，之前睇片呢段山路總係大霧都乜都睇唔到。




山上嘅路大部分都係石路，都幾好行，只有少少泥路，行嘅時候要小心，一仆街就仆街喇。



就係咁一路盲目地向前行行行，行到個肚好鬼餓，志汌唔個幾時買咗個蛋糕分咗啲俾我。又行咗個幾鐘之後，山上面有㗎小食車，即刻俾咗€1買條energy，出發四個幾鐘都無食過嘢咁濟。小食車老細仲準備咗印章俾朝聖者。我見有位休息又坐底按咗兩嘢腳，志汌就自己行先了。

過咗小食車就淨返大約11km，1km上坡，5km平路，5km落斜。好多人都停咗喺小食車休息，所以路上嘅人明顯少咗。呢個時候我戴耳機就聽咗一陣歌，有巴打提過我話唔好沉迷自己聽歌，所以附近有人的話我都唔帶耳機了，亂鳩咁搭吓嗲其實都唔會悶。

上完嗰1km好濕鳩嘅亂石斜路之後，去返平路可以慢慢加速，但係好鬼多爛泥路，於是要慢慢睇邊啲位好行。過埋爛泥路就係森林路，兩邊有樹蔭，又唔斜，行得好舒服。


喺就嚟過法西國界嘅時候，有隊單車隊喺側邊經過，真係唔知佢哋點過爛泥路。



過咗界之後，天氣開始起霧又陰陰沉沉，行過樹林時好似The mist啲場景咁，呢個時候我都追上志汌了。


行上樹林無耐，就咁喺山上路邊有個緊急albergue，直接啲講就係有個瓦遮頭俾人過夜。如果天上唔係咁多雲嘅話，可能我都會喺到過一晚，山上面一盞燈無，睇星一定好精彩。沿途行嘅時候我都一路喺到諗，唔知喺山上過夜係咩感覺呢？


喺山上面越行越凍，體感溫度應該得15度左右，有風吹過就真係好凍，無預過六月嚟行都咁凍。呢個時候，隻腳已經行到無咩知覺，淨係借手杖嘅力一步一步向前行，心諗幾時先行得完，但係前面仲有三個鐘路程。

行多一陣終於開始落山，落山之前有啲位俾人休息，坐滿晒人。我個肚開始打晒鼓，諗住落山好快行完，於是坐咗兩分鐘就鳩衝落山了。

落山嘅路雖然係車路，但唔係特別好行，因為隻腳已經行到震晒，一唔專心好易仆街，所以要好小心。行行吓仲開始落雨，要立即著雨褸同笠雨罩。頂佢個肺落咗一陣又出返太陽，一陣又落返雨，又出返太陽。已經見到終點，但係好似行極都未到咁。呢個時候我個腦淨係諗住快啲落到山食嘢，沖熱水涼同埋好想飲杯熱朱古力。


咁落坡又落咗成粒鐘之後，終於去到一個小教堂抖抖，再出發行多半粒鐘，終於到咗Roncesvalles，時間大概係兩點。我已經行到手腳都痺痺哋，唔知係攰得濟定凍得濟。去到albergue一嘢dump低背囊嗰嘢堅係爽，第一件事唔係去俾錢入冊，而係去小食機兩包花生食，Total€2，因為真係勁肚餓。



今晚嘅Albergue係€12，成棟三層都係床位，應該住到百幾個朝聖者。我抽到上鋪，即刻要爬上爬落...樓下嘅朝聖者係法國叔叔Gi (讀嘰)，就係佢今朝嘈醒我。不過佢其實幾好傾，嚟緊應該會成日見到佢。


一放好背囊，人人第一件事就係衝去沖涼，我去嘅時候已經排晒隊。醒目嘅我上咗一層沖，無人排隊，但係啲水唔夠熱，嗱嗱臨沖完就洗衫，希望乾得切。洗完之後就躝上床攤吓，Gi仲笑鳩我咁鬼廢。

攤咗一陣，決定落樓睇吓撩唔撩到新朋友同行，因為志汌已經埋咗韓國人堆，我都應該識返啲朋友仔。喺前園認識咗意大利仔michele，先19歲就自己嚟行Camino。坐坐吓吹風吹到鬼凍，於是就去廚房望吓，原來有個販賣機賣三文治，同埋最重要嘅熱朱，又俾咗€3.2。同michele吹咗一陣水，佢啲英文麻麻哋，個樣鳩吓鳩吓咁，成日聽唔明我up乜。

志汌後來話我知啲韓國人搵到間cafe啲嘢食好平，叫埋我同michele一齊去，點知去到韓仔已經自己坐埋一枱，我同michele咪識做坐開。叫咗個Topas同啤酒先埋單€5.5，又真係幾平。食之後，終於有時間返床打遊記。

其實行完成日感覺依然良好，雖然係好攰，但起碼無周身痛，腳都無生水泡，都算係咗咁。其實同香港行山差唔多，只係呢程長啲，行一轉八仙嶺可能仲攰。

行嘅時候有咩諗呢。一路行嘅時候成日喺到諗點樣好好紀錄呢次Camino之行，即係會諗嘅遊記點寫啦，成日影相啦，諗吓如果拍片點整啦。但其實行完喺山上諗到嘅句子已經唔記得晒，行到一半已經無拍片，因為隻手已經揸唔到部機。後來連相都影少咗，因為成日停低影相好影響節奏。後來只係諗住快啲到終點可以休息。

今日喺路上聽到一個幾動人嘅Camino故事。話說出發初段嘅時候遇到個英文姐姐。
今次佢第二次行Camino，第一次係十年前同家人行。佢笑笑口同我講，當你去到終點嘅時候，你就會想再行多次，呢一刻我都仲未明點解。喺大概六年前，佢媽媽準備第二次出行，袋都執好晒嘅時候先發現患上癌症，無幾耐之後說過咗身。到咗今年年頭，姐姐突然醒起今年係佢完成Camino嘅十周年，二話不說就買咗機票出發。佢嘅行裝就係當年媽媽執好咗嘅背囊，繼承著媽媽嘅遺願一個人上路。佢仲話上次行完之後，影響咗身邊十幾個人出發行Camino，唔知會唔會我完成之後，有人俾我影響而出發呢。無錯，呢個姐姐我唔知佢咩名，嚟自邊到，但係呢啲都唔重要，重要嘅係佢嘅故事好值得紀錄低，嚟緊有機會嘅話一會同再撩佢傾吓偈。

個間bar 我好深刻
係個到識左好多旅伴

今日係咁多啦
好鬼攰無執相無proofread
我都想up多啲相 連登唔知做乜成日上傳失敗

睇緊嘅歡迎say個hi俾啲反應
篇嘢本來淨係預咗自己紀錄 有啲位諗住自己明就得

明天繼續 聽日想dump低韓仔上路 祝我撩到鬼妹一齊行

Orisson嗰間
我行嗰陣啲人全部裝滿水就走

我行咗一日已經攰到pk
巴打中間有無停留喺某啲城市玩

無呀手，行足咁多日

我本身預咗停四日喺大城市
依家又想一口氣行晒佢

又唔使刻意停留 去大城市個日早啲起身 行小啲 做夠時間參觀

wa你就正，你個天氣相比好多人已經靚到飛起...

我個日keep住勁大風, 又無限雨, 成座山就好似香港春天濕到出雨咁, 乜hi都睇唔到

我都覺得好好彩
之後keep住都咁嘅天氣就好

收到

報時 六點都未夠已經自然醒咗
今日目標係21km zubiri
有力嘅話行多4km去Lorrasoaña
聽日就可以行少啲去Pamplona觀光多陣