[Live] 一個人的朝聖路 Camino de Santiago

今日喺Monlinseca

呢到都好靚

Day 23
Astorgas - Foncebadon 25km

難得有得瞓細房，梗係瞓到晏一晏先起身。七點半起身，Albergue伯伯已經趕住趕人走，Albergue樣樣都好，係個Albergue伯伯好串。

同伙伴打聲招呼我就自己出門，出城嘅路唔難走，出城唔夠分鐘就到下個小鎮。路上有個小教堂，忍唔住入去坐坐，睇吓會唔會有啲咩靈感啟示。


放棄嘅念頭仍然揮之不去，一早上路就不停諗自己點解仲喺到。如果有人問我點解我嚟行Camino，我答得到。但如果有人問我點解我仲行緊Camino，我唔識答。

上路廿幾日，一齊起步嘅戰友越行越少。有啲人一早完成自己嘅朝聖路，有啲人行行吓消失咗，有啲人無機會同佢好好道別。之前荷蘭伯伯成日講笑，話人人都識得Lee。之前去到邊到都好，Albergue總有一半人係識嘅。餘下嘅路得返十日，短短嘅十日。我好似已經無心機再認識新朋友，反正十日之後就會各散東西。就算識到啱傾嘅人，十日之後就會各行各路。我諗呢個就係我近幾日咁頹廢，唔想同人講嘢嘅原因。

我仲係唔明自己點解要繼續行落去。如果話要認識世界各地嘅朋友，認識完轉眼間就無晒，儲咗廿日嘅旅伴一下子無晒咁濟，路上仲稱得上朋友嘅得返Quebec Paul and Bernald同埋德妹Sandra and Herlin。如果話要認識自己，我諗都認識夠了，我知道自己鍾意熱鬧，但同時都需要好多時間獨處。有樣嘢我今日先發現嘅，原來自己情緒低落嘅時候，會好想收埋自己。認識到自己負面嘅一面都唔錯。行落去好似為咗最後張證書咁。


行到九點幾我就停低咗食早餐，之前喺Burgos識嘅美國人Jonathan路過，佢同我嘅目的地一樣，都係Foncebadon，佢都想睇聽朝嘅日出，傾咗兩句佢就自己行先。

食完早餐諗住再坐坐先，但見到後面有幾組朝聖者食緊埋嚟，我都唔敢Hea太耐，立即上路。路上前面有幾個人，後面又有十幾個人，同之前獨身在路上好唔同。情緒仲係有啲down，唔明點解自己仲行緊路，但路上太多人搞到我思考唔到，於是就塞住耳仔聽吓歌。


今日係上坡路，要由海拔900幾米上到1400米。路只係緩緩上斜，加上天氣有雲唔曬無雨，唔算辛苦，風景就越行越靚。好似第一日由SJPP出發咁，見到自己俾好多座山包圍。


我塞住耳仔係咁向前爆，淨係想自己獨處吓。喺進下一個小鎮之前，有個隱蔽嘅休息處，我自己去chill咗一陣，望住好靚好遼闊嘅山景，忍唔住大叫「啊～～～～～～～～～～」鳩叫聲喺山谷中迴盪咗一陣。睇完景，鳩叫完，心情好似放鬆咗啲。


好多人停喺小鎮休息，我就繼續上路。路上依然好多人行緊，直路上眼線內至少有十個人。我無行上行人路，自己一個喺車路行，令自己舒服少少。



山景好靚，多謝個天無落雨，望吓景Enjoy吓，盡量唔諗腦內嘅疑問。雙腳仲係急步前行，經過一個又一個朝聖者，嚟到第二個小鎮。



要喺小鎮買支水，喺小店又撞到Jonathan，講咗兩句我又自己上路。雙腳繼續急步前行，淨係想快啲到目的地，搵個靚位坐晒成日，同埋想擺脫嗰班新面孔。




行行吓Jonathan又追咗上嚟，今次見面我哋就同行咗一陣。我分享咗我嘅煩惱，佢同Herlin噚日講嘅一樣，人人喺路上都有迷惘，唔知點解自己仲喺到，但人人都淨係知道自己要繼續行落去，行行吓就唔會諗呢個問題。其實我都知道自己唔會放棄，只係要搵方法處理呢個情緒。佢好似無點開解到我，但同人傾完，我又好似放鬆咗少少。



行到Rabanal del Camino，Jonathan想停底休息，我又再自己上路。Rabanal del Camino係旅遊書建議嘅停留點，之後嘅路上仲係有幾個朝聖者，但我故意放慢，行行吓就得返自己一個，但仲係可以見到其他人喺遠處嘅山路緩緩前進。


今日嘅山景真係好靚，相機影唔出嘅靚，突然又諗起之前Guy話相片只係無靈魂嘅紀錄，真正嘅只有親身睇過嘅雙眼。從山上望落去一大片綠油油，當中有唔少黃色嘅花。望去對面山可以見到好多山徑，同埋遠處嘅山頂有風車喺到轉轉轉。



山路唔算難行，同香港啲山差唔多。行到啲靚景位我就忍唔住停低欣賞，真係好靚。我諗眼前嘅都唔係咩名山，好多座默默無名嘅山丘交疊起嚟，得自己一個人喺山中漫步，唔係滿山觀光遊客，咁嘅景色真係好靚。然後又忍唔住鳩叫「啊～～～～～～～～～～」

邊行邊嘆，行到兩點半終於到達Foncebadon。山頂嘅小鎮無太多設施，但就有三、四間Albergue，我揀咗捐獻性質嗰間，點知去到話無晒床，問我喺教堂打地鋪制唔制。既然未試過又有機會，why not?


管理員俾咗嘅地墊我哋，成個教堂得兩鋪床，同我一齊瞓地嘅係阿根廷叔叔Leonardo。佢話喺路上仲遇過兩個香港人！仲俾咗相我睇！即係依家喺路上嘅香港人至少有6個。唔知總有一日我會唔會遇到呢？


沖涼洗衫之後我就照計畫，搵咗個開揚靚景位坐吓打文。思緒太混亂，一定要坐底靜靜哋整理吓。一坐就坐到八點，電話都無電。返Albergue拎個尿袋。Albergue有晚餐，人人坐埋枱準備開飯，我選擇咗離群，拎咗尿袋就走。啲人一定覺得我係死毒撚，反正入面叫得出名嘅得幾個，WFC。出去買個三文治之後又返我個靜靜靚景位，嘆住個靚景食包。


食完個包，Bernald到咗話嚟搵我飲酒吹水，晚晚佢都買一支紅酒要我同佢飲。兩條友對住個靚景把酒談心。


Bernald成日都好炆，成日話自己好仆街。話說去Burgos嗰日，佢join咗一組澳洲人+荷蘭長髮男Hue，之後一齊行咗幾日。佢好似鍾意咗其中一個澳洲妹。佢話，佢曾經向一個人許下承諾，永遠只愛佢一個，但依家佢又對其他人有感覺，所以覺得自己好仆街。喺Burgos嘅時候佢已經講過我知，但我今日先知，承諾嘅另一方已經過咗身。所以Bernald成日想自己行，避開嗰組人。Bernald份人癲癲得得，估唔到佢係一個痴心情長嘅浪子。

我都有講返我嘅苦惱佢知，佢明我嘅境況。雖然佢無放棄嘅念頭，但佢話識人都係隨緣，已經無心四圍Hi人。佢話：Lee，你以為你已經好清楚自己，但你唔係，你仲喺到代表你仲有啲嘢未搞清楚。可能佢講得有道理。

佢同西班牙情侶Dani and Daniela聯絡過，原來佢哋已經返咗歸，因為Daniela隻腳傷咗好耐都未好。呢個都係一個令我好sad嘅消息。我最後一次見到佢哋係喺Antapueca，即係11日之前，Dani問我要唔要一齊去飲啤酒，我話：今日不了，聽日去Burgos一定同你飲。估唔到Burgos已經見佢唔到，估唔到呢句就係我同佢哋嘅最後一句。

點都好，途中有個可以交心談心嘅人，感覺真係好好。兩個麻甩佬喺荒山野嶺把酒談心。

我諗我已經搞清楚點解我仲應該喺Camino路上，因為我仲有可以交心嘅朋友喺到，Herlin、Bernald佢哋同我傾過好多偈，當然仲有成日飲酒吹水嘅Paul and Sandra。我好想同佢哋一齊衝線完成，仲好想最後嗰日攬埋一嚿好唔捨得大家。呢啲人仲有好多Keep住嚟，仲有十日，仲有十日會認識到好多可以交心嘅人。呢個就係我繼續行落去嘅原因。

今晚瞓教堂地下，我如常同上天講聲多謝，多謝今日嘅晚上有人答咗我心中嘅疑問，多謝今日上山好好天氣風景好靚，多謝今晚有瓦遮頭。多謝。

落山之後第一個鎮
鎮口就有勁大條橋同小河流水

即係行多成10km
我行30km左右已經盡

前兩日嘅找咗數了
今日嘅請再等等
謝謝大家

就係呢到
呢個位望落去勁正

本身plan今日去大城Ponferra
落山路行到隻腳好痛 又見呢到好靚就停咗

放空我就日日都做 去啲小鎮無乜人騷擾一坐就坐五六粒鐘
整理吓思緒 然後打文記低 其實幾好

迷失感我諗每個朝聖者都會有
問題係點處理呢種情緒 同埋搵到啲嘢俾自己撐落去
低潮期其實都可以見到自己好多嘢
今日已經無down了

問題係點處理呢種情緒 同埋搵到啲嘢俾自己撐落去 低潮期其實都可以見到自己好多嘢

難得你都識咁諗
唔係咁多人面對逆境時能夠listen and embrace his/her feelings

多謝巴打打咁大段字分享

講真真係睇到我眼濕濕
睇得出巴打都好掛住Camino嘅日子
無論係同人傾偈 定係了解自己嘅過程
每一刻都好深刻
我日日提自己要享受喺路上嘅每一刻
我估我完成晒返香港之後都會因為咁Down好耐

近幾日路上係咁喺諗「為乜」
「咁辛苦為乜」「喺香港做到狗咁為乜」
巴打講得好啱 如果Camino只係為咗行而行真係太可悲
呢幾日我就係諗唔到「為乜」所以Down咗一排

同巴打素未謀面 性格同我又好唔同
但我哋諗嘅嘢幾乎一樣
呢個就係我成日講話朝聖者呢個群體特別之處
明明大家都好唔同 但心中都有啲嘢係一樣

有個問題想問巴打
如果有機會，你會唔會行多次Camino？

追左成日終於Live左
巴打好想講我睇左幾篇都好想喊
搞到我都好想去行。

前幾日同我行過嘅波蘭仔hi我。

睇返你呢兩日，feel到你越黎越燥。

其實每個人行, 都有佢嘅目的, 好似唔係巴咁, 佢一開頭嘅目的係為咗挑戰自己, 狂衝, 受傷都無有怕, 繼續頂上

我就係為咗試下受苦, 當係去軍訓, 所以我每日都keep住極規律咁, 6點行到2點, 遇人過人, 除咗單車...間唔中有D痴線佬仲快過我,
咩肌肉痛關節痛就無喇, 係腳底出咗好多水泡, 都係對爛鬼鞋同襪. 每日淨係煩D水泡已經夠哂, 未到Leon之前, 我已經問自己, 做乜行到成腳水泡咁折墮. 但路上聽到有個外國老人, 講佢膝關節退化, 趁仲行到路, 所以要黎行, 咁我呢D真係唔算得乜.

亦都有一晚遇過有糖尿病嘅, 條友仲hi野, 我問佢做乜黎行, 佢話佢係天主教家庭出生, 曾經都信過主, 但大大下就無咗件事, 慢慢變成依家咁, 周身病又hi埋野, 於是黎行下, 睇下搵唔搵得返主. 佢每日行十幾KM, 所以第二日都無再見佢.

多謝支持
真情流露 可惜文筆唔夠好

仲Keep到連絡真係好

早兩日堅係頹同燥
依家好好多了