Burgos - Sanbol 27km
隔離床唔知乜水鼻鼾聲勁嘈，飲醉酒都俾佢嘈鬼醒，唯有搵耳塞塞住耳仔再瞓。五點都未到就再次被執嘢聲再嘈醒。我開始對日日五點起床嘅生活有啲疲倦，已經好耐無瞓到中午先醒。朝聖最癲嘅唔係每日行二、三十km，而係每日太陽就未山就要準備上路。
荷蘭伯伯Herman已經完成咗佢今趟朝聖路，噚日同佢傾過偈，佢話兩年之後嘅某一日就會去到Santiago，每年遇見唔同嘅朝聖者，但每年都有回到大家庭嘅感覺。佢老友Paul一早就叫醒佢，同佢握手道別，緊緊一握，睇得出佢哋兩老只得一星期嘅情誼非常深厚。
朝聖者們陸續起行，我都唔敢怠慢爽手出門。出門時天都未光，Burgos Cathedral頭頂仲有幾粒微弱嘅星星。
出發時連目的地都未定好，就盲目前行，最少行20km去Hornillos del Camino，最多行31km Hontaña。
出城嘅路唔難搵，但出城同入城嘅路一樣咁長，日出被大廈遮曬，睇唔到日出嘅光芒，但天清無雲，又係一日好天氣。出城途中經過一個公園，一行過我就認出呢個地方，係The Way取景地之一。The Way其中有幕係吉卜賽父子送主角團出城，呢幕原來就係喺Burgos拍。
出城之後嘅風景依然嘛嘛，視線之內總有啲車路大橋，大車車聲破壞晒清晨嘅寧靜。路上認識咗來自美國嘅Lance。佢係一個高中老師，話教咗好多年書，用咗好多時喺教書，想搵啲其他做吓，於是就嚟咗行Camino。佢嘅口氣唔似典型美國佬，好踏實、好謙虛，同佢同行咗一段路。
行咗8km，就到咗小鎮Tradajos，唔少人喺到停停食早餐。我無停到繼續走，出咗Tradajos之後嘅景觀就好好多，見返如常嘅藍天綠草。
行行吓忽然諗起，以前自己旅行嘅時候，有個人形容我「好Yo」，嗰時我好大反應，我毒撚嚟㗎喎，「好Yo」？咪玩啦。但諗返呢兩個星期自己嘅表現，成日鳩Hi人，識唔識嘅都亂搭嗲，又真係幾Yo。可能只係香港嘅環境太壓迫，香港人太冷漠，可能香港嘅社會真係唔啱我，我做唔返最真我嘅自己。正如我之前咁講，Camino未必會改變一個人，但喺途中，你會見到最真誠嘅自己。
行多個零鐘頭，就到Hornillos del Camino，時間只係十點半，而且狀態不錯，於是就決定繼續上路。出鎮之前八卦入咗小店睇睇有咩買，一入就見到Guy同老闆吹緊水。Guy老是常出現，呢隻口水怪次次見佢把口都係無停。不過見到老豆Guy次次都好開心嘅。佢話老細有收集各國錢幣，於是我就拎咗一張十蚊港紙同一張一蚊人仔送俾老細。老細笑口噬噬好開心，堅持俾咗包送酒嘅欖俾我。
重新出發之後我無等佢就自己行先了。我要去嘅地方要行多7km，床位得12個，我驚遲咗無位，所以就自己加快腳步行先。
越行風景越靚，行到上一個一望無際大草原，視線中只有藍天綠草，綠草之中又有啲紅花點輟，遠處只見轉動嘅風車，不見山也不見城。如果喺到睇星星一定好正，可以的話我真係想喺到過夜，淨係幻想吓喺星空下步行就已經打晒冷震。
行咗個零鐘就見到遠處山下有間零丁嘅屋仔，俾無限綠草包圍。原來嗰到就係我嘅目的地。我本來以為Sanbol係個村仔，點知原來只係一間Albergue，附近無餐廳無超市無建築無人。一見到咁嘅情景我就好興奮，因為我諗都唔諗就決定咗今晚要留喺到，然後半夜出發，喺星空下夜行。
屌, 我睇咗, 行過都唔認得
身為正宗嘅死毒L, 我無乜野好DO
應該一齊行多幾日
