[Live] 一個人的朝聖路 Camino de Santiago

慢慢黎, 只要你有相, 實出得文, 不過有時候會唔記得咗個刻嘅feeling就真

Itero de la Vega - Cerrión de los Condes 34km

Herlin、Paul、Peter同我四條友三點半鐘就準時醒晒，十五鐘都唔使就執好晒嘢走人。本來佢哋叫我叫佢哋起身嘅，點知我起身嗰時個個到已經自己醒哂，睇嚟大家都對夜行好興奮。


今晚嘅星空俾噚日更清，但月亮都更圓更亮。我幫佢哋喺星空下留影，佢哋玩得好興奮，我諗佢哋唔係第一次見到滿天星星，但可能係第一次影星星相。我普普通通咁構圖佢哋係咁話好靚好靚。




月亮喺五點開始月落，銀河開始浮返出嚟，我哋都已經行出鎮外好遠。環境同噚日一樣，黑媽媽但唔使燈都見到路，但佢哋好緊張咁成日搵標記，我同佢哋講：跟住星星走就得，不要問，只要走。


太陽亮光又從東方浮現，月光消失之後，太陽漸亮之前，有大約十五分鐘天空全黑。我哋四條友就咁瞓咗喺路中心望天，唔知Paul定Peter講咗句：Lee, you are a legend. I am so happy. 然後黑夜之下就再無聲音，各人各自欣賞燦爛星空。聽到呢句，我感受到佢講呢句發自內心，好真誠，突然覺得連續兩晚早起都抵返。

晚風越吹越凍，攤咗一陣我哋就繼續上路。我一路行一路恰眼瞓，行咗兩個鐘，天空都已經光晒，一行四人終於行到下個小鎮，即刻狗衝搵早餐飲咖啡。

早餐飲咗杯大咖啡，食咗個包，個人已醒好多，但仲係眼瞓。Hea咗成粒鐘先再出發，行多一個鎮就係Paul同Peter Camino嘅終點。


沿途佢哋三個人講嘅話題都好歐洲好深，唔知係我仲太眼瞓定點，完全唔知佢哋噏乜，我就靜靜哋行我嘅路。


話說今日好似係咁多日嚟第一次組隊上路，平時都係路上偶遇然後同行。見佢哋傾得咁開心，我好似搭枱咁，我喺到諗，一個人行先係最啱自己嘅行法，唔使就人諗人，有嘢諗嘅時候自己思考，無嘢諗就放鬆心情，旅伴對我嚟講根本就唔需要。可能我就係咁毒撚格，有人喺身邊反而周身唔自在。

後來同Herlin吹水，佢話我咁鐘意Camino，應該行足一世。後來講講吓又講返完咗Camino之後返到現實就好壓抑，佢叫我諗吓計逃出香港，話每當自己計畫人生嘅時候就好興奮。講就容易，喺睇唔到未來嘅香港點計畫呢？

行行吓就到咗Fromista，即係Paul and Peter嘅終點。別離之前我哋再坐埋一齊，飲杯咖啡吹吹水，好似扮唔知以後都唔會再見咁。坐坐吓，德妹Sandra同Quebec Paul路過，吹咗兩句就走咗。


無耐，我都係時候出發，同佢哋握手道別之後，就頭也不回走咗。感覺有啲微妙，唔知應該咩心情，識咗佢哋先短短兩日，又唔算好熟，但又一齊夜行冒險過，又唔係唔捨得，好似覺得有少少可惜？Herlin話要去超市買嘢，我無等佢就自己上路。


單身上路最自在，一路直行就經過兩個小鎮，路面幾乎全平，但太陽越曬越熱，後來我停低咗喺個小亭休息。抖抖吓Herlin都追咗上嚟，簡單傾咗兩句之後，大家都決定行多兩個半鐘去Cerrión de los Condes，追返前兩日嘅進度，之後我哋前後各自聽歌前行。

行咗半個鐘就去到一間好特別嘅Albergue，有一片勁大嘅草原，仲有個大帳幕俾人瞓，最過癮嘅係好多動物，有狗、鵝、羊、驢，好似個動物園咁。Herlin想喺到抖抖我又Dump低咗佢自己行。



條路平到可以直望見到下個小鎮，仲以為呢個鎮就係目的地，行到先發現原來仲要下個鎮先係。呢個時候已經烈日當空，但決定咗要去Cerrión de los Condes，唯有頂硬上繼續行。


路上得我一個徒步朝聖者，間唔中有單車喺旁邊馬路經過。烈日當空之下行到成個人意志消沉，得少少微風吹過，曬到個人都痴痴哋線。無人之下大大聲唱歌，嗌歌咁嗌，激勵吓自己意志，啲力唔係行路行晒，而係嗌歌嗌晒。


行咗大半個鐘之後終於見到前方城鎮，仲呢個城鎮好似半夜天邊嘅銀河咁，行極都仲係好遠。我知道再咁鳩行唔得掂，於是調整步伐唔鳩唱，捱埋最後一段路。

又大半個鐘之後就真係到，時間係兩點幾。本來以為呢個大鎮會好多人停留，點知識嘅人我小貓三四隻，韓仔s、荷蘭伯伯Paul、Quebec Po+德妹x2，無喇。唔知其他人到邊呢？

行到嘅時候已經好肚餓，行咗成十粒鐘，34km，又破咗自己紀錄。入完冊參觀嘅時候見到韓仔s食緊Lunch，佢哋煮咗一大煲公仔麵同飯，揮手叫我埋去。我諗都唔諗就狗衝埋去痴餐，公仔麵其實好好食，唔小心又慳咗一餐。

沖涼洗衫之後，去行咗個鎮一圈，去咗超市買啲嘢，然後就搵位打文，補返噚日嘅日記。室外實在太熱，坐咗一陣頂唔順返Albergue。返到去見到人又掛住同人吹。

識咗韓仔踢喪好耐都無同佢認真傾過偈，佢一條友坐喺花園憨居居吹煙，於是就埋去撩吓佢。原來佢一口氣旅行全年，佢係做投資嘢嘅，返工返到個人痴咗線要離開吓，但更痴線嘅係佢一路旅行，一路睇住韓國個股市買賣，即係一路行一路返工。

後來意大利姐姐Sana坐咗喺附近。Sana姐姐已經喺路上見過幾次，佢係從Logroño出發，四星期要行到Santiago。佢講嘢語氣好得意，又成日大笑，都幾可愛。再後來好耐無見嘅荷蘭伯伯Paul又喺附近吹煙，於是又痴埋嚟交換近況。

坐坐吓啲人無啦啦走晒，得返韓仔s同一個女人喺alvergue。佢係南非白人Carlo，話呢到啲景睇到好悶，因為佢住喺南非農莊日日都見到咁空曠嘅景。講講吓佢講到自己今日去教堂喊咗，因為聽到一首叫I am enough嘅歌。佢話媒體係咁塞啲錯誤概念，搞到依家人人都欲求不滿，快樂唔應該從物質而來。

佢講得無錯，快樂其實好簡單，人與人間真誠嘅交流就已經可以令人快樂，朝聖路上嘅樂趣趣正正係咁，同物質享受係完全唔同嘅事。

後來我哋知道其他人去同隔離教堂朝聖者彌撒，抱住點都要去一次嘅心態我都去咗，成間Albergue得返班韓仔憨居居喺到。


彌撒過程講西文，唔知佢噏乜，所以無乜感覺。最後神父淨係召集咗朝聖者，西英雙語咁逐個國家講，問我哋邊到嚟，然後逐一上前受祝福。其間一part有個修女拎咗支結他出嚟唱聖詩，佢一開心唱嗰吓，無啦啦有啲眼淚水湧出嚟，完全唔知點解，忍住先無淚水流出嚟。唔只我一個，身識有啲人已經流晒眼淚。我又無信教，究竟點解會有呢個反應呢？我真係唔知。我一如以往，最後喺教堂講咗聲多謝就轉身走人。


然後到晚餐時間，Alvergue有聚餐，每個人帶少少食物，主餐由Albergue修女煮。我乜都無準備，淨係幫手拮咗啲Pincho，就厚面皮坐低食埋一份，又慳多咗一餐。成日Albergue坐埋食飯，氣氛幾好。食完就各自返房，間房勁熱，忍唔住落花園打埋文先瞓。




Burgos之後好似開始咗Camino第三階段，好多識嘅人走咗， 好似又要喺路上從新識人，中間嘅停點好多選擇，識嘅人都走散晒，Guy同Bernald呢啲啱傾嘅唔知去咗呢？

你哩幾日都會行馬路邊
亦係我極度建議時間唔夠嘅人 搭bus skip 嘅位。除咗平，直，無樹蔭。如果仲無水吹，都係成程路最悶嘅地方

呢個真 真係邊行邊瞓
真係捱住過

仲要曬到仆直 完全係苦行修練嘅一部份。

今日行嗰17km堅係on9
行撚咗三粒鐘

聽日PK了 突然落雨

Day 16
Cerrión de los Condes - Terradillos de Los Templarios 24km

兩晚都無瞓夠，噚晚一撻落床就瞓著。樓上一郁成張床就好嘈，半夜醒咗幾次，但轉頭又瞓返。如常五點開始就有執嘢聲，今日決定唔理照瞓，瞓到六點先起身。我起身嘅時候大半間Albergue嘅人都走晒。慢條斯理執好嘢，咬住個蘋果做早餐就出發。


今日一起步就係地獄路段，17km無中止大直路，全程都係平路無遮蔭，路上都好多人，成村朝聖者一齊挑戰呢個17km早晨挑戰。早上無咖啡飲就出發，一朝早就好多蟲仔嬲著晒，搞到個人好炆。行咗5、6km就已經好眼瞓好眼瞓，但又無位停低休息，唯有合著眼咁行，每隔幾秒開一開眼，以免行咗落草堆。就係咁一路行一路恰，行咗兩公里，睇一睇計距App，行先咗8公里，即係一半。隔離有人行過都無力講Buen Camino。我嘅步姿已經好似喪屍咁，個腦唔係諗住食人肉，而係諗住行多一陣就有咖啡飲。



行到10km左右，終於有第一個陰位，見到Quebec Po同Sandra坐咗喺地休息。我諗住快快行完，所以無停低到，有氣無力咁同佢哋打咗聲招呼就繼續。Po見我就死咁，就追上嚟遞咗罐red bull俾我，乜都無講就返去陰位。呢罐reb bull堅係救咗我一命，我即刻喺條路大叫I love you Po。朝聖者之間不問回報地付出，一方有難總有人伸出援手。


乾咗罐Red bull之後，明顯精神好多，起碼行路唔會合著眼行。太陽越嚟越曬，行到十點半終於完成呢17km濕鳩路，去到下一個小鎮。


一到埗，好多人第一時間衝去Cafe飲咖啡。我飲完咖啡歇一歇又上路，個人已經好醒，心諗今日最濕鳩嗰段路都過咗，之後嗰啲好輕鬆啫。

離下一個小鎮Ledigos仲有6km，太陽已經烈日當空，朝聖路都係馬路旁邊，隔幾十米就有棵樹仔遮一遮，比起朝早好好多。行咗個零鐘就到，時間係十二點過啲。本來Ledigos就係終點，但望咗望個鎮好似死城咁，風景又無乜，於是就決定行多3.3km去下一個鎮。

出咗Ledigos之後，明明跟住箭咀行，行咗十五分鐘就無晒標記，路牌又見唔到目的地點，一對地圖，果然行錯路，馬上糾正，到依家我都未知邊到開始行錯。行返正途之後十分鐘就到下個鎮Terradillos de Los Templarios。

鎮口有間好大好新淨嘅Albergue，但離鎮中心有啲遠，於是我就行入鎮睇埋另一間albergue再決定。去到albergue撞到韓仔團又啱啱到，於是就一齊入咗去。荷蘭伯伯Paul一早到咗喺到un un腳飲啤酒。碌架床位無晒，焗住比多€2瞓單人房細房，盛惠€10。是但啦，chur咗幾日，聽朝可以瞓晏啲起身仲好。


沖完涼洗完衫之後就喺albergue無出過門，因為真係太晒太熱，喺Albergue食口個火腿芝士三文治同兩杯啤酒就當Lunch，同Paul同韓仔吹吓水時間就過。Alvergue好多年輕西仔西妹行出行入，Paul話可能係類似學校旅行，啲西妹好嫩口，有啲仲巧令囡。


天氣熱到坐喺太陽傘都係勁熱，坐喺到都出汗，Paul教路搵凍水浸腳，於是每個人都浸著腳喺到吹水。

五點半我就去咗Albergue入面有間小店，成班西仔西妹迫晒入嚟，撩我講嘢，又同我講日文。我啲鳩噏西文仲應付到佢哋，不過最可惜識唔到啲靚西妹。

後來識咗法妹Vera傾吓自己旅程呀，自己背景呀都係嗰啲。講講吓佢同我講，佢個Long D女友想分手，搞到我都唔知點應佢。

天氣突然風雲色變，短短幾個鐘由陽光萬里變成烏雲密佈，仲開始行雷落雨，希望今晚落完聽日出門就唔落啦。


下晝個濕鳩三文治搞到我到晚餐時間都未肚餓，於是求其去買咗個杯麵做晚餐就算。無耐Vera就話Alvergue個Peregrino menu好大份食唔晒，我又厚臉皮坐咗埋去痴餐。同枱有墨西哥夫婦Antonio同Angelica，我哋交咗啲相睇。我有早兩日嘅星星故事，同任何人都好易有話題。世界盃踢緊阿根廷vs奈及利亞，我哋睇到半場就散水了。

返到Alvergue，早上出門前Hi過嘅Quebec老夫婦Robert and Janna。路上好鬼多Quebec人，好識同佢哋打交道了。佢哋一見到Guy張相就話識佢，睇過佢啲戲。Robert and Janna都一把年紀，睇唔出佢哋過兩日到Leon之後就行咗1000km。佢哋同我一樣，睇過人哋Camino嘅故事之後就一直朝思慕想，有一日佢哋終於決定要兩公婆一齊嚟。Robert話再揀多次的話，未必會行咁長路，但行咗咁多日，一啲都無後悔。

今晚住細房諗住可以瞓得舒服啲，點知同房幾個鬼仔好撚臭，打開門又嘈，唯有落花園坐多陣先，等啲人瞓晒我再返房開門瞓。坐坐吓個天又落雨，希望聽日出發係好天氣啦。


唔覺唔覺朝聖路都已經行咗一半，行到依家好似啲麻目，行嘅時候無再諗人生哲理，反而諗多咗朝聖之後自己會點。朝聖生活好似係我夢寐以求嘅生活咁，人與人之間無咩隔閡，簡單生活但日日都快快樂樂。每諗到行完之後要夢醒返回現實，個人就好負面好頹，好想學似噚日Herlin咁講，我咁鐘意Camino，應該行足一世。

聽日希望可以瞓到七點半，懶懶閒行十幾公里就算。

估唔到M3都影到咁既夜景

個個韓仔都識啲中文嘅
志汌係佢寫咗俾我睇
潤亨同踢喪係我自己音譯

rx100m3堅正 細細部啱晒旅行
夜景相我用Lightroom app執過先出嘅

行雷都被你影到

巴打有冇生水泡

你出水泡?

係 不過唔大

一不離二, 接二連三

你今日行咗幾遠, 同埋留意下你對鞋入面係咪濕咗, 如果backpack 太重, 就寄走D 唔用嘅野, 可以寄去santiago 或者 路上嘅albergue

so far仲未
濕水酷熱上山都做晒都無生水泡，應該行全程都無事㗎喇

只要唔係一日連續行太遠又無休息, 就應該安全

巴打你行成點 有無趣事分享吓

我想知條韓妹點

Day 17

Terradillos de Los Templarios - Calzada del Coto 17km

早上唔理其他人執嘢聲，合埋眼瞓到七點。起身之後慢慢執嘢，起步之後都無懶過，以前點會諗到瞓到七點已經算係懶。噚晚落完雨之後，早上天氣又回復晴朗，我起身嘅時候天都光晒。

執好嘢之後再懶懶閒喺Albergue食個早餐先出發。一坐低，早兩日識嘅德仔mark就行入嚟搵早餐，韓仔踢喪又喺房慢慢行出嚟，原來佢兩個都識。於是三條友神奇地組咗隊上路。Mark出發之前播咗一次“Hook on the feeling”，搞到我今日成日行都諗住首歌。

我哋出發嘅時候，噚日嘅學校Camino團都差唔多一齊出發，於是我哋好自然就混入咗人哋一大班人，撩咗班西妹仔傾計。原來佢哋先14歲，啲衣著好似十八廿二咁，有啲英文仲好好，傾咗兩咀就各有各行了。點解香港啲妹妹仔十四歲仲鳩吓鳩吓，鬼妹仔十四歲就咁正。


Mark同我同年，喜好又差唔多，行咗幾個鐘，吹水吹足全程。我哋乜都講吓，中國歐洲政治啦，人生方向啦。佢話佢完咗Camino之後會去酒店做散仔，然後轉去國際大酒店，再出差去其他國家工作。聽落佢呢個計畫又幾值得參考。佢提議我如果要離開香港，就儲一筆夠我用半年嘅錢，然後搵個地方出去闖，只要肯踏出第一步，其餘就交俾個天，好似行Camino咁。仲有一樣佢同我好似嘅，就係一路行會一路耍碌棍，兩條友喺條路on99耍棍，無棍嘅踢喪只能睇我哋玩。



行到十一點就到Sahagun，本來想同啲西妹仔影張相嘅，點知俾Miss見到，話要家長同意先影得，搞到影唔到。其實Miss都無錯嘅，學校旅行小心啲都應該嘅。



Mark提議話去飲杯咖啡食啲嘢，我今日就唔趕路，於是就是但搵咗間Cafe抖抖。之後嘅路有兩條路線，A路線行多1km但靚景啲無咁悶，B就跟大路行多啲人。Mark決定行A路線，踢喪行B路線，我就決定停嚟分叉路之前嘅小村。



今日嘅路段無噚日咁悶，仲有嘅樹遮吓蔭，而且我行得又短，所以全日都好似無出過力咁，但都行到1點先到。先後同踢喪同Mark分別之後，我就自己喺Calzada del Coto搵Albergue。雖然我鍾意自己行多啲，但如果搵到啱傾嘅旅伴，有人同行都唔錯嘅。

Calzada del Coto又係個小村，村入面得一間Bar。Albergue係捐獻性質，我到嘅時候一個人無。後來有個朝聖裝伯伯到咗，話佢就係負責人。伯伯同時係朝聖者同暫時負責人，聽日佢就同我哋一齊上路，但今日仲留喺小村睇住間Albergue。咁都得真係第一次見。雖然Albergue係捐獻性質，設施一啲都唔差，起碼唔係一百人大雜交房，而且空氣好流通，仲有咖啡包點俾人食。




沖涼洗衫之後就出咗唯一嘅Bar食Lunch，一坐就坐咗四、五粒鐘。依家無晒觀光心態，日日一到埗就搵位Hea足全日，甚至去到大城市都懶得行。啲時間就咁嘥晒？定係啲時間本身就應該咁用？

btw, 出水泡一定要吉穿, 一定要確定流哂D水出黎, 跟住消毒

萬一有水留咗起入面, 你行路壓下壓下個水泡, 個水泡會擴散, 越黎越大

水泡下面係可以再生水泡, 我試過, 超級攞命