[Live] 一個人的朝聖路 Camino de Santiago

好新鮮, 好淋, 但佢地調味麻麻地

多謝巴打打咁大段字俾我
今日行已經見到成村人一齊行
自己狂爆撇甩啲人先有一陣獨行時間
越嚟越唔想行落去

中國人煮海鮮係有一手，呢樣真係不得不服。

啱啱有人同我講佢12號SJPP出發
途中撞到一對香港人幾次
即係有香港巴打喺附近
暫時知有6個香港人喺路上(計埋我自己)

lm

巴打原本諗住幾多日行完全程,我唔想Leon嗰日行成三十七k,諗緊點調

人在Foncebadon
山旯旮地方無網絡up圖 albergue又無wifi
聽日一次過up返兩日嘅日記
謝謝大家

本身預38日到santiago 43日到Finsterra
我so far快過schedule 4日
你Leon嗰日點安排？

送嗰袋到leon然後直踩37K

請問，其實呢 d 運袋服務係點運作同收費呢？

據我所知係有個牌,喺上面寫好個人資料同送去邊到,再綁係個袋到同比錢。之後會有車過嚟收集再送過去

原來如此…謝謝！

起得唔夠早 成村人

唔洗諗, 係keep住都有人, 唯有等人影完, 攝埋去影兩張又到下一批

有一張靚仔

有一兩個人望住太陽, 個意景可能正D

呢個就係我依家嘅習慣
下晝食個朝聖套餐 €10左右 夜晚飲酒食少少就算
下晝2-5pm如果唔係仲行緊 就一定係搵咗個靚位打文

終於明巴打講咩 後日可能一日踩上去
一日行兩座山是咪太癲

Day 22
Villa de Mazarife - Astorga 30km

早上再一次遲出發，飲埋杯咖啡成七點先出門。出門嘅時候天空仲見到陽光，但從遠處就可以見到前方烏雲密佈，上路嘅朝聖者迫不得以要向住烏雲的方向前進。



好彩天空只有烏雲沒有落雨，不見太陽嘅早上有啲凍。孤身上路，諗起噚晚講起嘅"rr"震脷音。之前學咗好耐都唔識，挪威仔Thomas教我不停講"Ari""Ari"，兩個鐘後就可以練成。朝聖路把口最得閒，於是我真係講咗兩個鐘"Ari""Ari"，條脷終於識震少少，起碼講到"rra""rri""rru""rre""rro"。一路行一路玩自己條脷兩個鐘，仲唔小心咬親條脷，好痛。

行咗10km就到下個鎮Villavante，行到肚餓了於是停低食個早餐，唔少人都喺到停低抖抖，包括Quebec Bernald。Bernald話佢罐red bull喺背囊入面穿咗，搞到成個背囊都係red bull味，點解佢成日都發生呢啲柒事呢。


我無等埋Bernald就自己上路，路上繼續把玩自己條脷。行咗無耐就到Hospital de Orbigo，離遠就見到呢個鎮有條長橋好靚。食完早餐又開始眼瞓，於是又停低咗，飲罐Red Bull再行。


Bernald喺後面追咗上嚟。行行吓竟然又撞到廣東話德國伯伯！同佢講咗兩句就bye bye，老老豆豆，喺歐洲講廣東話好似有啲奇怪。後來bernald再停低食嘢，我無等佢就自己行先。

行出Hospital de Orbigo又出現命運分叉路，直行係行馬路旁去Astorga，15km；轉右係行山路去Astorga，16km。我諗都無諗就行咗右邊，行咗咁多日悶路，緊係要行山路。行行吓睇咗睇地圖，真係全山路咁濟，即刻有啲後悔，不過都照行啦。



入山嘅起點係小鎮Villarejo de Orbigo，又係一個靜得嚟好齊設備嘅小鎮，都係一個好好嘅停點。


行路嗰時諗返同兩個德國小朋友玩得好開心， 小朋友喊又氹得返。其實以前我好鍾意小朋友，但唔知幾時開始，我就決定唔會喺香港養育下一代，無謂要下一代受苦。

一出鎮就係緩緩上斜山路，路旁光禿禿，但起碼風景夠開揚。行行吓有一隊西仔西妹途中加入，身上著住白鞋白T，一睇就知成班傻仔嚟。Bernald都追咗上嚟，佢都係諗都無諗就揀咗山線。




行行吓開始落微雨，嚇到我即刻著雨褸，相機濕過之後真係好驚落雨。好彩落咗小小就停雨。望住前面嘅山路，心諗自己做乜咁憨鳩要攞苦嚟辛。不過景色都唔錯嘅，荒土之外有啲小樹林，如果陽光普照行一定好靚，而且行返呢啲路先有返頭幾日出發嘅感覺，好有幹勁要跨過座山。



山頂有個休息站，有善心人準備咗好多水果餅乾，免費俾人食。啲傻西仔話咁好都有，好amazing。對我嚟講Camino上嘅好人好事實在太多，呢啲已經見慣不怪，於是同佢講咗句Welcome to the camino.食咗個西瓜抖抖就繼續行。


抖完之後繼續上路，行多一陣就到山頂開始落山。天空不再烏雲密佈，雲隙之間露出小小藍天。行到山邊可以見到Astorga成個城市，原來Astorga係咁大，從山上就見到城中心嘅主教堂。睇到呢個景，行咗幾粒鐘山都即刻抵返晒。


山頂有個一大十字架，好多人喺十字架放石頭。同行嘅Bernald突然話係佢嘅moment喇，然後拎咗一塊心形石出嚟，話係由第一日開始帶喺身，然後喺石上而刻咗個名放低。佢話如果下次再嚟呢個地方，會返嚟搵返嚿石。


好多人都會由第一日起帶住一粒石仔，喺途中放低，代表放低咗心中一啲鬱結。我身上都有一粒，但我嘅moment仲未到，或者我仲未有心機專心思考自己嘅鬱結。我由得佢自己獨處吓，無問多句就自己行先。

Bernald好快就追上嚟，落山之後行多半個鐘就到Astorga。Astorga有好多景點，除咗主教堂之外，仲有朱古力博物館，同埋高第花園。但星期一好多都休息，錯過晒參觀嘅機會。




有間€5嘅Albergue，有164張床，未到之前我就同Bernald講，一定又係大雜交房。去到見到間嘢好新淨好大，竟然每間房得四張床！另外好得意嘅係每間房都有名，啲名就係朝聖路上嘅主流城市，例如Fromista, Estella。咁都仲不特止，房間仲係高層靚景！呢個質素嘅住宿，起碼值€15。



入冊之後沖涼洗衫，之後就自己出去食Lunch。套餐有得食八爪魚，點知都唔好食嘅。食完Lunch之後，就忍唔住凍返Albergue拎返件長衫。因為近返山，城市特別大風，而且又無太陽，所以特別凍，得17度左右。


著好衫就出超市買嘢，一出門就撞到Bernald,然後又推都Quebec Paul+德妹sanDra and Herlin+美國佬Jason。成團人一齊去超市Shopping。去超市買完嘢，我就去周圍影相。主教堂星期一休息，無機會入就圍有外邊影吓，其實我都係想自己一個行吓多啲，一大班人我就覺得自己好似搭枱咁 。行行吓唔見咗大隊，於是我自己返咗Albergue。



Albergue有個好靚景嘅露台，本來想開始打文，但對住個景又入咗思考mood。

上路都廿幾日，我開始覺得攰了，覺得行路好攰，撩人吹水都好攰。Bernald喺山頂休息站嗰時同我講：想要咩隨便拎。我好隨意就講：我想返屋企。我唔想跟大隊周圍行，淨係想自己一個孤單吓，想重新開始成個朝聖，睇吓會唔會有返最初嘅熱誠。

我嘅人生中試過主動同大部分朋友斷絕晒聯絡，完全自己一個人幾個月，思考自己係咩人，最後我得到答案，就係做依家嘅自己。但朝聖路上我又想再做多次呢件事，斷晒所有認識嘅人重新開始，但我唔知點解我想咁做。我唔係要思考自己嘅為人，因為我途中一早已經搵到真正嘅自己。但諗諗吓，朝聖路上嘅自己係咪真係真我？定係其實我始終都係鍾意孤單嘅毒撚？我唔知，思考唔到，思緒好混亂。

行Camino真係好似重新活一次人生咁。我攰了，想放棄了。

估唔到我竟然會想放棄，矛盾之處係之前每一日嘅快樂都係真心嘅快樂，真心鐘意路上嘅所有事。可能Leon之後嘅人都唔同晒，搞到我有啲頹。今日遇到另一組韓國人，韓國人依然圍埋講韓文，但佢哋唔係我認識嘅踢喪、潤亨、Kitsu，突然覺得好陌生，唔知埋唔埋去佢識佢哋好。

德妹Herlin都無跟大隊，自己返Albergue煮飯食，見我一個人憨鳩鳩咁就坐埋嚟。我同佢講我開始想放棄，佢話自己都有同感，唔想再行落去。佢又話呢個應該係正常嘅階段，唔好諗行落去就捱得過。但問題係我行落去都唔知為乜。人又來來去去，自己又好似越行越迷惘。傾傾吓有條友搭枱，打斷咗對話。

Paul叫我出去一齊食Pizza，我唔係好想跟隊就自己留咗喺Albergue。Albergue有好多人出出入入，見到有人埋嚟就吹吓水，但我覺得自己似係應酬，多過真係想同佢哋傾偈。最後我嘅晚餐係一個蘋果加兩塊麵包。

Hea hea吓都九點幾，Albergue伯伯嚟趕人返房。Albergue樣樣都好，係個Albergue伯伯好串。Albergue 10點清場，但11點先關門。於是一班夜鬼就出咗門口吹水飲酒。

我嘅思緒仲係好混亂，好多嘢諗但又唔想諗，未想瞓教於是跟咗出去再呼吸吓，飲飲酒。Astorga嘅晚空雖然多雲，但城市嘅燈光漸漸亮起，街上無晒人，係另一番好平靜嘅境象。Sandra叫我講吓自己嘅語言，我話：「今日係我上路嘅第廿二日，我想放棄了。」Sandra傻傻吓聽唔明，淨係話nice。

後來另一組人都出咗嚟Hea，喺出面隊草，傳咗一口俾我試。大麻同煙草嘅味道明顯好唔同，吹咗兩口都好似無咩感覺，又或者係有感覺我都唔知。

返房之後已經好眼瞓，但我都頂住眼瞓，重睇一次自己嘅日記，打多一陣文先瞓。情緒有啲低落，太多感覺一定要記低。