【一齊讀吓宋詞】尋尋覓覓，冷冷清清，悽悽慘慘戚戚——李清照

個人中意屈原 李白 李清照 同陶淵明
巴打好有學識
睇你d post好如沐春風
得閒會睇埋你其他post
加油

訓先 聽朝食住早餐睇文

新婚別離，無止境的反覆思念
悲讀李清照一剪梅(紅藕香殘玉簞秋)

它之所以成為一首知名度很高的佳作，被稱為「頗盡離別之情」、「結更淒絕」，正是因為詞人心中藏有無可比擬的政治塊壘。如果是由單純的離情所帶來的傷感，何至於嚴重到「此情無計可消除，才下眉頭，卻上心頭」！這一名句是由詞人獨特的遭遇、獨特的思想情懷凝結而成的，是其特定心理狀態的外化。
——陳祖美

正文第九篇

一剪梅

紅藕香殘玉簞秋。輕解羅裳，獨上蘭舟。雲中誰寄錦書來？雁字回時，月滿西樓。

花自飄零水自流。一種相思，兩處閒愁。此情無計可消除，才下眉頭，卻上心頭。

李清照新婚無耐，隨即寫出呢首千古名詞
寫得悲情，讀之傷心
究竟係咩情況，先會令李清照寫出呢首詞？
我地必須講返呢首詞背後嘅政治背景

李清照、趙明誠新婚過得好開心
有日突然聽到皇帝話要改國號
將原本「建中靖國」改做「崇寧」
即係崇拜神宗皇帝
一位昔日主張變法嘅皇帝

成個北宋時期，幾乎係黨爭嘅歷史
變法派，例如王安石
保守派，例如蘇東坡
兩派人不斷得勢又失勢
得勢留係京城，失勢者流放
東坡就曾經流放好多次，遠至海南島

李清照老豆李格非，同東坡好fd
咁呢個時候雖然東坡瓜咗，但都被攻擊
趙明誠老豆趙挺之係變法派嘅大官
李清照為救老豆，唔理自己身分
好勇敢咁寫咗首〈上趙挺之〉比舅翁

呢首詩已經散失咗，得返殘句
「眼看白璧埋黃壤，何況人間父子情」
雖然唔知全詩，但仍可見救父心熱
不過趙挺之無聽到，唔出手相救
「炙手可熱心可寒」
第二句殘句，可見清照之心熱
而對舅翁冷漠無情覺得心寒

「尚書省勘會黨人子弟，不問有官無官，並令在外居任，不得擅到闕下」
無耐連李清照都被趕出京城
唯有返去家鄉居住
同新婚嘅老公遠隔兩地，好鬼傷心



紅藕香殘玉簞秋。輕解羅裳，獨上蘭舟。雲中誰寄錦書來？雁字回時，月滿西樓。

玉簞：竹席

上半片先寫秋景，再有意象
秋天蕭索，紅色嘅荷花香氣已淡
詞人依靠係席子，意興闌珊
「香殘」二字，既係講花
亦係描述緊自己嘅心境

輕輕咁脫去外衣，上木舟遊湖
「獨」之一字，盡見寂寞
以前不覺孤獨，如今卻知
只因心中有人，觸起思情

「雲中誰寄錦書來？」
我嘅書信，你收到未？
你嘅字句，幾時先到？
係隱含無數遠距戀愛嘅悲問
「雁字回時，月滿西樓」
雁字，排成「人」形
既現分別時間之漫長，雁鳥都秋回
又有對未來與趙明誠重聚嘅期待，「人」回
「月滿西樓」，等書信等到月亮都出來啦
又係期望早日能夠係西樓重聚



花自飄零水自流。一種相思，兩處閒愁。此情無計可消除，才下眉頭，卻上心頭。

下半片直抒悲情
我地之前睇過兩首清景遊湖詞
水光山色與人親，說不盡、無窮好
常記溪亭日暮，沉醉不知歸路
同係遊湖，已經係兩個世界
正係景不孤生，因情而出

「花自飄零水自流。一種相思，兩處閒愁。」
「花」係自喻，「水」為境遇
李清照嘅兒女私情，又點會改變到政治命令？
飄零人生自飄零，風波仍是翻滾
同樣嘅相思，兩地嘅痛苦

「此情無計可消除，才下眉頭，卻上心頭」
何以「無計」？全因「水自流」
憑李清照才學之高，斗膽上詩
都係挽回唔到離別嘅結果
無止境嘅思念，來自一切嘅不確定
到底有情人幾時先可以見面？
政治局勢會唔會一直延續落去？
感性、理性互相交織
正係「才下眉頭，卻上心頭」

其實此一千古名句，化自范仲淹：
都來此事，眉間心上，無計相迴避
但係好多人都話李清照寫得更好
周頤：
真字是詞骨。情真、景情，所作為佳
無止盡嘅思念係全詞來回往返
全因李清照由心而發嘅真情

又同呢兩個字幾貼近...

都識咗巴打一段時間
陶淵明到李清照
都見到巴打愈睇愈深入
見到你成日係唔同文學post留言
言之有物，真係進步好快
不過我出post都已經用咗好多時間
唔係都想插口吹幾句

巴打鍾意嘅文人都係第一流人物
李白應該好快會講到
塵世間一位小小書僮
斗膽同大家吹吹水
大家平輩相交，咩都講得

得探長啟發姐
古典文學我仲慢慢學

中學讀一剪梅嘅時候，睇埋注釋都無咩咁感覺，同普遍詩人表達個人感興無大分別，重未睇到女詞人當中嘅婉約
經探長解釋返個時代背景，先再深入了解到李清照嘅仇緒。。。同埋呼應返開首講男人同女人表達情感上嘅分別，令到我地留意返手法同細節

探長嘅導讀真係一流

多謝巴打睇得咁細心
盡量力求寫得比大家以前上堂更好
李清照名詞仲有好多，一定會講哂
希望比大家重新認識李清照
向香港中文教育挑機

好出名
可能會好多古裝劇都會讀過
唔知而家教科會仲有冇

探長加油
得閒黎睇下你推文
真係好正

多謝長腿巴打支持
有你支持，一定會Keep住出文

星期一推一下

「此情無計可消除，才下眉頭，卻上心頭」

睇到呢首留名

「炙手可熱心可寒」
第二句殘句，可見清照之心熱
而對舅翁冷漠無情覺得心寒

李清照竟然咁大膽寫首咁嘅詩比人地直接鬧對方？

推

李清照之為李清照
係當時能夠領先群雌
確係有佢嘅不凡

細個讀書唔鍾意文學,覺得好悶,連中文堂都冇心機上
大個左出黎做番野反而鍾意番,而家好後悔當年冇認真上堂或者讀文學
睇探長D post寫得好好,解釋顯淺細緻得黎又有趣味
以前李清照淨係識聲聲慢,睇完你介紹就開始更欣賞佢其他作品
有冇機會講下李後主?次次睇親虞美人都好感傷

探長