【一齊讀吓宋詞】尋尋覓覓，冷冷清清，悽悽慘慘戚戚——李清照

Welcome

盡快

一面風情深有韻，半箋嬌恨寄幽懷。月移花影約重來。

其實呢到指既愛情對象並唔係特定某一個人？係普遍既愛情憧憬？

學到野
而家先真正知道桂花既特性，本身淨係識食桂花糕

有人將呢首唱成歌，都好特別

好正呀 留名重溫

文學有兩重讀者論
第一重讀者，可以假定為李清照寫比情人
第二重讀者，就係我地呢種普遍讀者
既然我地唔係李清照指定嘅讀者
不妨可以睇得更抽象、更大
其實個別嘅愛情，必然反映某一整體嘅普遍
好似睇李商隱嘅情詩，聽現代情歌咁
會覺得入肉，好中自己感情
係因為我地人生經驗都有相似嘅地方

新一頁啦喎

愛人注視：你講你愛我！
嘗讀李清照減字木蘭花(賣花擔上)

https://youtu.be/koiB1SHg1i4

是月季春，萬花爛熳，牡丹芍藥，種種上市。賣花者以馬頭竹籃鋪排，歌叫之聲，清奇可聽。
——宋·孟元老《東京孟華露》

正文第八篇

減字木蘭花

賣花擔上，買得一隻春欲放。淚染輕勻，猶帶彤霞曉露痕。

怕郎猜道，奴面不如花面好。雲鬢斜簪，徒要教郎比並看。

李清照雖然婚前已經幾出名
但呢段時期流傳落黎嘅詞作唔多
加埋李清照好長命，十八歲結婚
我地讀到嘅作品，多數係婚後嘅

不過當我地讀過幾首婚前之作
係好能夠攞黎同婚後比較
即係少女對愛情期望理想落實
到底會係開心、傷心，定係迷惑？
我地就由呢首婚後作開始啦！



賣花擔上，買得一隻春欲放。淚染輕勻，猶帶彤霞曉露痕。

上半片講詞人去買花
新婚李清照出街周圍shopping
見到有檔花店，就去幫襯下啦
「春欲放」，呢三個字好貼切
未完全盛開嘅花朵，春意盎然
似乎可以用肉眼望到即將展示嘅生命力
「春欲放」，唔係好似新婚嘅少女咩？

「淚染輕勻」四字，好鬼生動
將花擬作女人化妝
唔係用化妝品，係用「淚」
可以想像係晨間嘅露水沾係花瓣
露水嘅映照，往往令花更美

故有「猶帶彤霞曉露痕」之句
清照見到呢一枝花仲有「彤霞」、「曉露」
詞人之眼，係望到晨光刻印於花
露水留痕，咁靚嘅花點可以唔買呀？



怕郎猜道，奴面不如花面好。雲鬢斜簪，徒要教郎比並看。

下半片由花轉入人際
清照開始係到諗，朵花咁靚
靚過我，老公見到咪唔鍾意我！
我會唔會真係唔夠朵花靚架？
一如東坡詩曰：
人老簪花不自羞，花應羞上老人頭

詞人好少女口吻咁講：
哼，唔得，等我都扮靚先得
睇吓我黑長真嘅秀髮，斜插髮簪
等我問吓老公，邊個最靚
你講你愛我，等我知道對錯！

呢首詞作好簡單，又好生鬼
如果我地用女性主義嘅觀點睇
用花去同自己比，咁care男人嘅目光
好可能會被批評為女性嘅自我物化
不過我地必須知道宋代根本無呢種意識
而且文學之美，唔係得女性主義

係愛情入面又有邊個唔著種愛人嘅目光呢？
因為愈愛對方，先愈緊張佢嘅睇法
用呢種心情去睇，可以連接當下
我地每一個人，都會驚「奴面不如花面好」
我地又點先能夠確定係對方唯一嘅花？
清照此問，唔係我地千百年不斷重覆緊咩？

中學讀書睇過好多宋詞

新年大把有得食

最緊要巴打鍾意
一頁一新文
出到爆post睇吓到時完未

留名支持

細個好鐘意中國文學亦讀過唔少
但奈何受屋企人影響揀左商科
擺低左好耐 都忘記得七七八八
見到講李清照馬上追哂
多謝巴打咁有心分享
學到好多野亦令我想閒時睇返

另外上一篇巴打提到屈原離騷
以前聽啟蒙老師略略提過但冇細讀
想問下巴打有冇寫過屈原

好歡迎巴打咁有心支持
如果本身鍾意文學，到最後都會睇返
咩科都唔緊要，有心足矣！
除咗李清照，我仲有講過其他主題
巴打有興趣可以追埋

屈原、陶淵明係中國文人兩大心靈支柱
陶淵明我已經大致講過佢嘅重要、特色
但係屈原仲未講，其一係因為好難講
本科嘅人都未必睇過
我之後會盡量再諗諗點講好
多謝哂巴打提議

真係博大精深
兩種說法都通用到
BTW，嬌恨<----好正，兩個字就好能夠表達到女性嘅嬌柔

Google 嬌恨 竟然出咁嘅result

細嚐左幾首，睇到呢度，真正感受到女性文學嘅婉約嬌柔，同之前睇果幾位分別好大

我重要係最近幾年先睇文學

屈原你之前未提及楚辭天問、離騷之前，我淨係知道同端午糭有關 (中學好似無提)