記得唔同人唔同季節唔同國家啱用嘅護膚品都唔一樣
正所謂甲之砂糖乙之砒霜，睇其他人推介嘅時候要考慮埋對方人種、年齡、膚質、所在地，調整番件事，唔好直接複製貼上
歡迎大家補充，會定期更新置頂
睇完整合仲可以留言自己想解決嘅皮膚問題、用緊或者想買嘅護膚產品，一齊分析下用咩好
（一）成分篇
減少皮脂分泌
維他命B3、水楊酸、維他命A
吸附油脂
礦物泥、竹炭、硫磺、金縷梅萃取
抗菌消炎
鋅、壬二酸、過氧苯甲醯、抗生素、茶樹精油、甘草萃取
改善暗粒粉刺及毛孔粗大
果酸、水楊酸、壬二酸、維他命A、酵素、柳樹皮萃取
保濕
甘油、透明質酸、維他命B5、氨基酸、PCA因子、蘆薈萃取、海藻萃取
舒緩退紅
尿囊素、維他命E、膠體燕麥、積雪草萃取、洋甘菊萃取、綠茶萃取、金盞花萃取、甘草萃取、
修復屏障
神經酰胺、角鯊烷、酵母萃取、益生菌萃取
美白祛斑
維他命B3、維他命C、熊果素、間苯二酚、壬二酸、麴酸、傳明酸
抗氧化抗衰老
咖啡因、兒茶素、富勒烯、輔酶Q10、補骨脂酚、阿魏酸、玻色因、寡肽、藍銅胜肽、維他命A
（二）配方篇
萃取≠精油
精油含多款常見致敏物，建議購買含精油產品前先進行皮膚測試
喺成分表排得越前，濃度就越高，就算添加咗活性成分達唔到起效濃度都只係空談
但唔係排得後就冇用，有啲成分只需要零點幾%就可以發揮功效，加得多唔會更有療效之餘副作用仲會強咗
活性成分更高濃度唔代表一定更高強度，產品效果強唔強有幾個因素
1. 保存期間活性
出廠落足10%唔代表屋企開封使用有10%，用到樽底都有10%
2. 皮膚運輸率
搽咗10%唔代表有10%抵達皮膚底層，穿透皮脂膜同層層角質會有損耗，而有啲成分基於化學及物理性質穿透力又強啲，揸GTR同tesla都唔同
3. 轉化使用率
補充蛋白質為例，一磅豬腩肉連皮連肥連骨未必有半磅瘦肉，而半磅瘦肉又不如一杯蛋白奶粉，量多大份唔代表勁啲
4. 輔助加成
1+1>2，複方組合就算隻隻低濃度加埋都有機會療效強勁過單一高濃度，同時副作用控制到最低，好似牛腩麵舖辣椒醬惹味過指天椒蓉之餘唔會辣死人
所以點解有時候某牌子0.5%產品可以勁過人哋1%產品
而計啱條數做到好嘅配方係需要好多研發資源，成本會轉嫁至售價
控制成本嘅同時保持產品效用嘅策略就係追高濃度，滿足追求性價比嘅消費者做到抵買抵用
$10買到7分同$100買到9分，人人都有得揀
喺呢四項條件差唔多情況下，濃度越高就越強，不過任何情況下都有個臨界點，過咗之後療效無差異而副作用增強
雖然複方較為全效，但產品成分越多，累計致敏風險就越高，建議敏感肌選購護膚品以簡短成分表為主
室溫存放嘅含水護膚品係必須必須必須添加防腐劑
香精同防腐劑並非妖魔，喺發達國家正規生產嘅護膚品添加物係有監管
香精致敏性一般較精油低，但人人致敏源不同仍須自行測試
值得一提，對防腐劑不適人士不宜使用大包裝紙面膜
（三）膚感篇
水基
清爽補濕、較難留住水分
油基
有效鎖水、快速吸收唔黏笠
蠟基
強效鎖水、最黏笠有膜感
矽基
有效鎖水、微黏有膜感、霧面防油光
高卡波姆、大分子膠類
有效鎖水、較黏笠易起屑
高酒精
快速揮發唔黏笠、成分高滲透、有刺激性易乾燥
黏笠：蠟>膠>矽>油>水
鎖水：蠟>矽>油>膠>水
霧面：矽>膠>水>油>蠟
成分表頭五個成分大致決定係咩基底，可以係以上幾款嘅混合，根據排列次序能夠推測膚感質地
不過最實際都係親自落舖試用，實測質地、吸收速度同埋殘留膚感，同埋一定要試清楚會唔會敏感
（四）常見問題篇
Q：買咗新護膚品點用好？
A：如果含有酸類、維他命C、維他命A，建議先隔日使用，一週後再每日使用一次，再過一週後可早晚使用
期間若有不適暫停使用直至恢復正常，然後重複以上步驟
建議每次加入新護膚品相隔至少三天，給予肌膚適應時間，出現敏感反應亦可準確剔除產品
Q：水楊酸可唔可以同維他命A一齊用？
A：通常建議早晚分開使用，敏感肌建議隔日分開使用
耐受程度較高可搽完水楊酸半個鐘後再搽維他命A，耐受程度更高則可待水楊酸吸收後直接上維他命A
Q：冇甩皮係咪維他命A冇用？
A：起乾屑甩皮係不良反應，係副作用
設計良好嘅配方能夠抑制副作用同時達至理想療效
判斷維他命A是否起效嘅標準應為暗粒粉刺狀況及皮脂分泌量
Q：搽酸搽維他命A搽到爆拆紅乾痕點算好？
A：首先停用所有酸同維他命A
用清水洗面，簡化護膚，用低敏保濕修復乳霜保濕
搽物理防曬或者戴帽同留喺室內
好番先再重新慢慢搽酸同維A，由少量低頻率用起
平日加強保濕可以避免不良反應
Q：Differin 0.1%邊度有得賣？
A：香港任何Rx藥房，$160-180 30g
Q：護膚品可唔可以去凹凸疤去皺紋？
A：有一定改善，但只係輕微程度
嚴重凹凸疤請諮詢醫生進行激光治療
深層皺紋請尋求Botox或其他醫美手段
目前冇護膚品係所謂搽嘅Botox或透明質酸針，有都只係商家市場宣傳
Q：爆緊荷爾蒙瘡/濕疹/癬/玫瑰座瘡，搽咩好？
A：去睇醫生
唔好信護膚品Sales都唔好信美容院
護膚品只係維穩唔可以治療，病情減緩穩定後先再討論搽啲咩
Q：點解搽咗乜乜乜都冇好？
A：皮膚更新週期28-40日不等，要搽夠一兩個月先可以作準
每個人對唔同成分反應都唔同，如果搽咗成支都冇改善就建議轉用具相同功效嘅另一成分
（五）討論篇
希望呢個po可以幫到新接觸護膚美容嘅後生妹豬或者脫毒巴打，有咩唔明歡迎發問
如果想深入討論，可以留低想改善嘅皮膚狀況同目前用緊嘅產品
講番自己嘅膚質，有冇濕疹或其他皮膚病，以及已知過敏成分
想了解某啲特定護膚品種類都可以講下自己追求咩質地同使用感
希望連登巴絲人人都皮膚光滑健康
你有冇用過SKII/Genifique/ANR？
我都有聽聞新嗰枝et Advanced Night Repair
可唔可以形容下硬定軟有冇凸起
同埋應該擺入邊個step
