[鐵膠多圖]16日由北海道搭JR返九州瘋狂鐵道兼紅葉遊

咁真係差少少就睇到

我第一次去都好似唔洗排，唔知係咪武肺又要消毒又要限人數先等咁耐

再繼續行就到車飛展覽


展示嘅車飛有8層櫃桶咁多，由昭和時期到2022年、硬券、記念車飛都有收藏

再隔離就有啲遊戲玩吓

呢個區域就俾大家估吓究竟呢一個係咩嚟呢

呢一樣嘢又有乜用途

呢支螺旋形狀嘅棍又係用嚟做咩架

玩完問答遊戲就有獎品，可以睇吓唔同時期唔同地方嘅便當盒

最後就睇埋二樓一個相片展覽就返落一樓

呢個展覽啲相就比較Update，2022年9月23日伴隨西九州新幹線通車而運行嘅特急ふたつ星4047嘅相都有

亦都有2022年9月11日大村車輛基地發佈西九州新幹線N700S列車嘅相

以前はやぶさ都係屬於九州地區列車常用名稱，不過東北新幹線2011年引入E5系開始營運後就從此變成東日本列車名


返到一樓後有1個位置都好值得大家去睇一睇，就係自動販賣機前面呢一張吧枱，呢一張枱係1992年到2003年於787系上面真實用過，拆除後擺放喺度


離開本館後就想去迷你鐵道公園玩迷你列車，九州鐵道記念館係全日本第一個遊你鐵道公園，行到過去先知因為天氣問題冇開

冇得玩迷你鐵道公園唯有去影埋真實列車車頭，最後睇埋車頭展示區域就真係行晒成個記念館

首先就睇EF30 3運轉台，EF30系屬於九州專用機關車頭，當初設計時為咗對抗關門海底隧道嘅鹽害而用不鏽鋼製造

另外除咗九州鐵道記念館外，亦都有一架完整嘅EF30 1靜態保存喺潮風號另一邊總站関門海峡めかり站旁邊嘅和布刈公園，但頭先正正就係趕車冇睇到

第二架就係ED76 1運轉台，呢一款同樣都係九州專用機關車頭


最後就係481系列車，第一次可以睇到飯煲頭型列車運轉台，我喺度爬高爬低睇咗好耐先捨得走

你就快返去福岡機場走，冇 post 追喇點算好

有其他人遊記嘅

離開九州鐵道記念館之後就去門司港レトロエリア(懷舊區)

門司港入面可以乘搭每小時1班嘅關門海峽周遊船，船程20分鐘收費1000Yen，好似會有景點介紹，但如果要過下關的話關門連絡船已經睇到風景，唔需要再花多1000Yen


每日早上10點到下午4點20分都會睇到藍翼橋開啟，由00分開到20分

上一次同今次去門司港最大分別除咗車站已經維修完畢外，就係香蕉人由室外搬咗入室內，一開始我見唔到香蕉人有啲失落，但竟然因為避雨入到海峡プラザ東館後見返佢地

同親愛的香蕉人影完相就繼續圍住懷舊區行

好快就行到門司港其中一座著名建築物，北九州市大連友好記念館，後面就係門司港レトロ展望室，不過咁嘅天氣都唔洗俾300Yen入場，留返下次好天氣先再上去

喺北九州市大連友好記念館對面就係另一座著名建築物，北九州市舊門司稅關

旁邊亦都有MOJIKO個名牌連埋藍翼橋做背景被人打咭用

打完咭就穿過藍翼橋返去門司港站走啦

咁啱行到上橋就見到剛才出發嘅關門海峽周遊船回程，出發時周遊船會等藍翼橋升起然後起航，回程就直接穿過橋底返碼頭

藍翼橋另一邊就會有升降控制室、藍翼橋介紹同升降時間表等等

返到門司港站又影多次正面，今次明顯多咗人熱鬧啲

原先想再早一班車搭1點24分班車，不過趕唔到就慢慢等2點03分鹿兒島本線直通福北ゆたか線嘅車，為咗唔想旅客問邊班車停唔停小倉，JR九州直頭整埋大字話俾大家聽全停呀

又返到咁懷舊嘅車站月台，要搭嘅車已經停咗喺1號月台啦

回程就搭821系，821系同YC1系都喺2018年登場，所以兩者係十分相似，兩者都係直排座位行近郊路線

搭到返小倉站就轉山陽新幹線

2點03分班普通車去到小倉站就剛剛好搭到2點24分嘅さくら555號

再見啦小倉


今次太臨時劃位就冇得坐Green Car，不過N700系7000、8000番台嘅指定席其實都係2+2設計，一樣好舒服

20分鐘後又返到博多，出閘後張JR Pass就完成咗佢14日嘅任務，大約計過買張Pass要72000Yen但我總共搭咗210000Yen

唐戶靜到

返到博多站之後就拎返行李，然後又再次搭福岡地鐵空港線

上一次嚟到就係飛去新千歲機場開始我嘅16日旅程，但今次就係離開日本啦

不過今次同上次一樣都係先去國內線大樓

由於事前已經知道國際線大樓冇咩鋪頭餐廳有開，而根據上次搭內陸機嘅經驗知道呢邊好熱鬧，就決定喺呢邊食埋最後一餐先上機

最後一餐就揀咗國內線大樓3樓ラーメン滑走路入面嘅博多一幸舍，揀佢純粹因為佢冇人排


都係食博多豚骨拉麵同餃子，味道就一定冇博多一双咁好但都唔差

食飽後就搭國內線國際線接駁巴士去國際線大樓

接駁巴士12分鐘一班，會停國際線大樓、貨運區、國內線大樓南同北出入口，由於太多人搭所以2021年4月就換晒掛接巴士，不過好多韓國遊客明明車尾有位都逼晒喺車頭

睇相唔覺喎，唐戶市場ok熱鬧啦
下關驛就真係靜到hihi，基本上無咩人去

回程搭6點起飛嘅UO669，前後被4班泡菜機夾住，成個機場都係泡菜人

香港快運係L行Check in，排隊前已經有地勤叫你Show個健康申報QR Code俾佢睇，睇完就可以排隊，Check in時遇到一團東瀛遊旅行團，霸晒4個Check in Counter慢慢搞手續同玩現場執行李，搞到其他人等咗起碼30分鐘先埋到Counter

好在而家福岡機場國際線大樓係冇鋪頭開，Check in完就可以直入禁區，同埋Check in搞耐咗反而安全檢查避開晒之前3班泡菜機啲人，不過入到禁區都不能幸免，唯一一間賣手信嘅免稅店除咗接近冇晒存貨外，就算有嘢揀啱都要排好長人龍先俾到錢

冇得買手信又冇其他嘢好行就直接去閘口附近休息

回程都係搭A320NEO，而且搭到快運第一架A320NEO B-LCL 鯊魚

上到機就做一做西客屌一屌福岡機場地勤先，Check in時東瀛遊個領隊已經好似航空公司職員咁每個團友Check in都行埋去幫佢地慢慢揀座位，又要前啲又要窗口位逐個逐個慢慢揀
到我Check in時已經知道冇課金都唔好有咩要求，唯一就係希望一齊坐即係你派BC或者DE位都好啦，點知佢話班機好滿加上頭先有旅行團所以安排唔到連位，我嗰一刻都真係相信佢，兩個座位隔幾行都硬食啦
上到機後，我嗰行3個位都係單丁，被夾喺中間竟然係一個女士，嗰位女士已經好好心地同我講不如調一調位
然後到閂機艙門見到機中間有4-5行完全冇人坐，要課金咪出聲囉洗乜講大話話班機滿安排唔到

最後空少非常好人地見機尾太逼就叫大家坐返鬆動啲，我就坐前一行窗口位，其他人都行前嚟坐咁就唔洗每一行都坐到貼一貼

再見啦福岡，再見啦九州，再見啦日本；我一定會再返嚟架


要講多次，飛福岡好處係好快就到，就算回程逆風都係3個半鐘就返到
落機後就要排隊做PCR，我返香港時已經由撩鼻改咗淨係撩喉嚨，基本上排隊埋位撩一撩，完成後就可以去拎埋行李搭車返屋企，係每日都要快測同埋第2日要預約做PCR麻煩啲

我去時唐戶都算多人，特別係落雨冇得坐室外，啲人逼晒係二樓食嘢都要等先有位

用咗22日終於完成16日行程遊記，今次旅行係日本開關後第一次旅行，出發前前所未有咁緊張，每日擔心行程Plan得好唔好同埋出發前會唔會中招，甚至出發前會整一個Check List檢查自己有冇帶漏嘢

今次出發後旅程大致上都順利，行程Plan到咁緊好多時都好怕遇到突發事情例如天氣、交通問題而令行程延誤。幸好16日入面只有位於高山、門司港兩日有雨，當中更加有好多日都係非常好天嘅藍天白雲

旅程中好多安排好嘅景點、列車、路線都如預期一樣去到，但札幌電視塔、函館山纜車算係當中嘅遺憾。而去完旅行後返嚟打遊記要做更多資料搜集，發覺自己錯過咗好多嘢，希望下次再去日本可以補返呢啲遺憾

最後就係多謝大家22日以嚟一直支持，有時自己打錯嘢或者懶冇做資料搜集時都有巴打幫忙補充資料，亦都好開心喺呢個遊記見返好多以前有傾過偈嘅巴絲打

以我所知呢個Post有幾位巴打都已經去完或者去緊旅行，希望咁多巴打去旅行都順順利利，期待咁多位嘅遊記

如果大家有嘢想傾或者想問都可以繼續喺呢度討論，但完Post後大家可以去其他巴打遊記或者其他集中討論區

日本地勤係好盡責唔加錢就真係無得你揀
歐洲個啲仲嚴 始終接近廉航始祖 真係唔會蝕比你

Btw好睇Thanks for Sharing
樓主Merry Christmas

第一次唔可以連位，都唔係要求窗口定走廊、機頭抑或機尾

同埋我今次都有即場課金加行李，真係要課金先有連位咪出聲

每日都唔同地區咁想問下d酒店係咪要逐間搵？

係呀，知道自己去到邊個地區就再搵

成個trip plan 咗幾耐？

2日

不過Plan完有執過嘅

福岡機場架shuttle終於換車靚咗勁多

坐Ryan air 唔加錢想一齊坐嘅機會係近乎0

好多年前開始講想喺日本搭 Citaro （嗰陣得京城有），去到而家唔同地方都買咗我都未有機會搭