[鐵膠多圖]16日由北海道搭JR返九州瘋狂鐵道兼紅葉遊

行完平和公園之後就過旁邊原爆落下中心地，1945年8月9日上午11點02分，原子彈就喺呢度500米上空爆炸

由於浦上天主堂需要重建，唔能夠原止保留經歷過嘅舊浦上天主堂遺跡，因此爆心地亦都有豎立舊浦上天主堂其中一條柱

行過少少會有一條樓梯可以行落下之川旁邊

呢個位置有啲原子彈爆炸時被炸爛嘅房屋、物品等等被泥土覆蓋住

喺1997年7月時，呢度都有新嘅被爆50周年記念事業碑揭幕，本身喺想用記念碑取代原爆落下中心碑，但最終兩個碑一齊留喺爆心地

由爆心地行去原爆資料館途中會經過幾個記念碑，其中一個就係不戰平和之塔

好近

我要去再搭都唔知幾時

你行程係點

btw Safe Flight

都係填埋部份未去過嘅地區，例如鹿兒島同羽越本線，雖然唔知落雪會唔會搞到要改行程
主要係九州嗰部份坐嘅車同你有d似

咁我襯聖誕假期完埋個遊記，等睇你嗰個

由爆心地向上行一段小樓梯後，就會到達長崎原爆資料館嘅正門入口

作為依山而建嘅城市，好多建築都會利用山勢去做一啲特別設計，資料館都唔例外

當你好辛苦地行咗上山去到資料館正門入口之後，原來要行返落去下層先喺展覽入口

由資料館入口開始係2022年，行到落去展覽入口就回到1945年，一個令長崎人唔會忘記嘅年份

相信每一個長崎人、每一個日本人、甚至每一個人都希望長崎會係最後一個被核武器攻擊嘅城市，當我睇晒廣島同長崎兩個被原子彈炸過嘅城市，感受更加深

1945年8月9日上午11點02分，展覽入口嘅呢一個鐘，永遠停留喺呢一刻

展覽第一部分會先展示一啲被原子彈攻擊前嘅相片，包括有舊浦上天主堂

長崎站同站前商店，當時所有市民都過住好普通嘅生活

但當原子彈喺長崎上空掉落爆炸一刻開始，長崎已經變得唔一樣，喺度生活過嘅每一個人都被歷史記錄低

睇完相同埋片之後就會進入一個大空間，入面展示咗好多長崎市被爆後嘅物品或者建築物損毀情況，仿如置身1945年嘅長崎市咁


1945年8月嘅兩個重要時刻，8月6號早上8點45分同8月9號上午11點02分

資料館入面都有個模型模擬長崎市地形，同埋原子彈爆炸後受災地區

胖子，美軍投下嘅第二粒原子彈

睇完兩個模型後，就會到一啲災害圖片，當中有啲太震撼唔敢影，但呢張冇咁震撼都可以睇到原爆嘅爆風係可以幾大威力，令到啲樹咁樣折斷

最後就會睇到第二次世界大戰嘅時間軸

同埋二戰過後國際關係點樣令到核武器進一步威脅全球


每1個蘑菇雲圖案代表1次核試驗，由1945年開始都可以用手指數得出，到1965年打後多到數都數唔晒

最後嘅部分資料館用模型代替文字去表達咗一啲數字資料俾大家，首先係唔同國家擁有嘅核彈頭數目


第二個就係唔同地方發生過核試驗嘅次數，黑色波波愈大愈核突代表進行過核試驗次數愈多

離開展覽前重會望到廣島原爆ドーム嘅模型


雖然睇完展覽，但資料館入面重有好多地方可以睇，不過我就因為趕時間冇留低慢慢參觀，睇完展覽就離開啦

下一個目的地就係世界新三大夜景之一嘅佐稻山

離開長崎原爆資料館後，我冇揀到搭長崎電氣軌道而係選擇先由竹岩橋橫過浦上川

然後喺竹岩橋巴士站搭巴士到淵神社，不過巴士遲咗成10分鐘先到，爭啲以為冇車搭要行過去

稻佐山纜車站所在位置好特別，係建築於淵神社入面，如果有足夠光線大家可以直接由神社正門穿過鳥居行上去，如果係晚上就可以由鳥居右邊馬路行


稻佐山纜車來回收費1250Yen，以纜車價錢嚟講算係平

買完來回車飛就去等車，纜車係2011年由奧山清行設計
https://youtu.be/tIuKCcwKQKI
纜車車程大約5分鐘，喺長崎搭纜車由地面升起再喺山坡嘅屋頂上穿梭，感覺真係唔錯

上到稻佐岳站，影返落去長崎市

稻佐山，2012年世界新三大夜景同2015年日本新三大夜景，就去睇吓係咪咁把炮

稻佐山同之前去過嘅函館山或者藻岩山有少少唔同，纜車站同展望台唔係同一座建築物，係要再行200米先會到達展望台

離開纜車站後要先經過一段幾十米長嘅光之隧道

過咗光之隧道後就會望到有3座超大嘅發射塔同遠處嘅展望台

未行上展望台前已經可以睇到少少夜景

呢度有放世界新三大夜景記念碑

稻佐山展望台設計好特別，一個圓筒形咁有螺旋斜路向上行，不過斜路就通唔到去天台，去到2樓就要轉電梯或者到室外樓梯行上去

稻佐山展望台內部，得一間好好好細間嘅Cafe，手信鋪就欠奉

由展望台天台望返去纜車站方向就會睇到3座發射塔

展望台唔算好大，好在都唔係十分多人


最重要嘅主角夜景要出場啦

暫時日本之旅睇咗3個夜景，首選會揀函館山、第二就係札幌藻岩山、最後先係長崎稻佐山。函館山係兩邊有海，中間好似鏡咁對稱延綿出去(第9頁)；而藻岩山就係一個大平原，好似砌圖咁鋪滿眼前成個畫面(第5頁)；相反稻佐山只係一個橫向冇縱向嘅夜景，視線就困住咗喺最中心地方，冇其他景色可言

另外就配套方面，函館山同藻岩山都有好好配套包括山下有明顯易搵嘅纜車站，但稻佐山就收埋喺神社入邊；函館山同藻岩山喺山上纜車站同展望台都係處於同一座建築物內而且有手信鋪有餐廳好熱鬧，但係稻佐山除咗要露天行200米先去到展望台外，山上纜車站同展望台附近完全冇手信鋪

離開展望台後返到纜車站時見到另一邊有得搭スロープカー，當時就唔知會搭去邊就冇坐到，後來返到香港再Google返，原來係坐去稻佐山公園，不過公園就冇夜景睇，只係一個普通嘅山上公園

纜車站入口暫時只有電梯可以用，如果人多就要等一等啦

落山時都幾多人等車，所以落山就冇拍片

落到淵神社站再影多次由奧山清行設計嘅纜車

纜車站會有免費巴士來往長崎站、出島同纜車站，但係去程由晚上7點開始而回程由晚上8點半開始，完全夾唔到我個時間，最後我係搭的士返長崎站

本身只係打算喺長崎站內買便當或者外賣上車當晚餐，但係稻佐山可以逗留嘅時間不似預期，咁早咗落山就可以多啲時間坐低食飯，我地兜個大圈行咗去長崎AMU Plaza食飯

喺日本已經逗留咗15日，但咁多日好似一餐蛋包飯都冇試過，呢個蛋包飯都唔差

食飽後就返去長崎站搭車，食埋飯都有鬆動時間可以搭7點47分嘅かもめ56號

再見啦長崎


再一次搭西九州新幹線嘅N700S，今次終於可以慢慢影吓架車外觀

一開始諗住搭第1卡方便去到武雄溫泉站轉車時行最少路，不過後來我就後悔啦

就快到武雄溫泉站時，我先醒起第1卡係車尾，如果要去影車頭即係要行足一抽列車長度嘅距離，最後我決定先係車內行咗先，行到去第6卡先落車，咁一開車門就已經對準車頭

去到武雄溫泉就轉特急リレーかもめ56號，特登揀搭かもめ56號就係要坐885系，885系於2000年開始投入服務，一開始已經係特別為かもめ而設計，係かもめ嘅代表列車

不過只從西九州新幹線通車後，885系反而從長崎本線退落嚟，大部分特急リレーかもめ都由787系代走，幸好今次都夾到時間坐埋呢一架曾經叱吒長崎本線嘅885系

影完車頭又行返一抽列車距離返去車尾嘅第1卡

第1卡有一半係Green Car而另一半係普通車廂，Green Car只有4行12個座位

座位設計同普通車差唔多，只係坐距多啲同埋有獨立枱

885系車廂連接處有好多書法、水墨畫裝飾，整到好似小型藝術館咁

1個鐘頭左右車程又返到博多，之後都冇特別地方再去，直接返酒店


反而喺酒店就有去大浴場浸浴，再用埋按摩椅舒緩一整日嘅疲勞，準備明天第16日最後一日旅程

[日本深秋] 失戀療傷8日瘋狂遊
https://lih.kg/3225716
- 分享自 LIHKG 討論區

你哋講嘢唔 post link 嘅

我以為大家對我呢個亂黎嘅行程冇興趣

對你點搭車有興趣，行程編排就...

來回飛東京就合理得多 但偏偏成程見過最靚嘅紅葉喺京都

去過幾次廣島同一次長崎但咁岩都排唔到兩個原爆館落行程

對唔住

多謝你幫手補返

我一出纜車站有架的士喺度，跟住懶唔想行落去就直接上車

你呢啲行程先正，不過好多人見到坐咁多車就話怕怕又話你走馬看花

日頭應該正過夜景，始終夜晚山上啲屋冇燈就黑媽媽

你應該大阪入函館內陸機返東京走

原本諗住南下嘅時候去八食市場