[鐵膠多圖]16日由北海道搭JR返九州瘋狂鐵道兼紅葉遊

喺トロッコ嵯峨站落車後就可以行埋站房入面嘅ジオラマ京都鐵道樂園，入面有京都場景同火車模型睇同玩，不過我就興趣不大冇課金入去

另外亦都有個免費嘅SL展示館，入面展示咗4架蒸汽火車頭


最右手邊就係C58 48



中間前面就係被Cut短咗嘅D51 603


右邊就係C56 98


最後一架就係收埋係D51 603後面嘅若鷹號

其實伴遊友人係咪就係你

BTW 網絡規則第37條，網上全部人都係男人，我係唔會信你

去到嵐山時都已經12點幾都開始有啲肚餓，係時候食少少嘢先

第一樣食嘅唔係飽肚食物而係雪糕，係嵐山最出名倒轉都唔會跌落嚟嘅豆腐雪糕


不過唔係全部味道嘅雪糕都可以咁玩，一開始我想食芒果加豆腐，職員就提我呢個味道唔可以倒轉架，最後我就揀返芝麻加豆腐

食緊雪糕時見到隔離鋪頭超多人排隊，所以我都一齊排埋一份


呢間鋪頭有牛肉串同醬油糰子賣，我就淨係叫咗兩串牛，分別係牛舌同Outside Skirt，即係崩沙腩
大家買完之後都好守規舉咁喺鋪頭附近搵個唔阻住人嘅位置企定定食埋先走，希望遲啲再多啲遊客嘅時候都保持到呢個質素

朝頭早都有新po

食完少少嘢就繼續行，喺係嘢個位再向去行就係嵐山竹林小徑

作為旅遊區嘅嵐山當然會有人力車，喺竹林小徑入面有兩個地方都專為人力車而設，第一個就係為咗避開遊人而設立嘅人力車專用通道，入面都寫明立入禁止但仍然有部分人會偷偷走入去影相

行到第一個路口經過野宮神社就會到達小徑同山陰本線嘅平交通


人力車師傅都好有經驗咁會等平交道上冇人，然後一口氣衝過對面，減少喺平交道上停留嘅時間


過咗平交道後遊客冇頭先嗰邊咁多，呢邊人少少影相都唔錯

個變態連結原來可以咁連
之前就諗係唔係一定要車頭對車頭

第二個專為人力車而設嘅就係竹林步道，不過呢度就普通人都可以入，只要大家留意返唔好阻住人力車就得



入面係圍繞住竹林行一個圈，雖然唔大但竹林夠密而且遊客唔多，所以行落都幾舒服


行行吓見到有人力車行過，原來竹林步道入面有啲位係Set好咗等人力車停低影相打咭，甚至有啲位好貼心咁停兩部車都夠


行完呢邊，又返去竹林小徑最多人嘅路段，沿住竹林一直行到盡頭

去到盡頭準備行入嵐山公園時，見到有可愛嘅柴犬，忍唔住做咗痴漢影佢相

入到公園就向上往頂上展望台行

唔洗5分鐘就可以上到去，唯一係行上斜辛苦少少



去到頂上展望台就可以望到嵐山同保津川風景，某啲時間重可以睇到嵐山小火車或者保津川遊船經過


由頂上展望台再行前少少會有另一個展望所，不過呢度望出去角度就冇頭先咁好


嵐山公園內都有1-2個角落有超紅嘅紅葉，都有幾多人會圍住呢1-2個角落影相(包括我)

唔洗唔該，不過呢架車我都係第一次坐

(反而電車Go揸過好多次)

因為勤力啲員工要上班了

一般嚟講火車至少要1個動力單元先可以運行，電車大多數都2-3卡為1個單元，編成會比較固定(N700S就打破呢個傳統，可以隨時自由編組)；但柴油車其實每1卡就係1個單元，鍾意點編成都得，換句話講，如果中間車卡有簡易運轉台的話，其實可以冇車頭都能夠行駛，又或者全部都係車頭都冇問題

敦賀，新幹線月台同特急月台上下式

即係特急會搬去新幹線站舍嘅下層，然後乘客行上一層轉新幹線?

行完竹林同嵐山公園，就由天龍寺北門進入天龍寺參觀，順便當行捷徑去渡月橋嗰邊


500Yen入場費，重要係紅葉見頃







500Yen只係包天龍寺庭園，但入面紅葉係超靚，我行頭段時配埋藍天直頭係一流

不過行到曹源池後，個天竟然開始多雲



最靚嘅曹源池喺陰天下變到有啲失色

睇完曹源池之後都已經行晒成個庭園，於是就由中門離開

由中門到庭園入口之間，其實都有部分位置睇紅葉幾靚，如果大家想睇吓紅葉又唔想課金，行入呢個位置睇吓都幾好

離開天龍寺後就沿嵐山長辻通行去桂川


超級多人嘅渡月橋


行上去渡月橋過對岸，由橋上面睇返嵐山同保津川風景

喺嵐山公園中之島地區Hea吓影埋渡月小橋


然後就再次踏上渡月橋返去長辻通


去到呢度都開始又有啲餓，見呢間賣腐皮芝士魚肉串咁多人排隊，又排埋一份，重叫多一串蝦肉餅同一串章魚餅，果然真係好好味，難怪咁多人排

食飽後就開始京都市西向東大長征，首先去京福電氣鐵道嵐山站搭嵐山本線

搭到去嵐電天神川站雖然只係短短13分鐘車程，但由於旅遊旺季實在太太太多人，呢程車逼嘅程度誇張過頭先山陰本線

落車後就行過隔離轉京都市營地鐵

搭東西線坐12分鐘去到三条京阪站又轉車

最後一程就係坐京阪電鐵由三条站到出町柳站

用咗50分鐘左右(連埋等車同轉車)就由最西面去差不多最東面

但呢度其實未係最終站，重要行去轉搭叡山電鐵


叡山電鐵都係出町柳站，去到咁遠其實就係為咗搭呢架展望列車「きらら」

不過一入站首先見到另一架叡山電鐵觀光列車「ひえい」

等咗一陣展望列車「きらら」終於都到站


去程時由於係總站上車，於是就揀咗一個面向窗口嘅座位坐低，然後就周圍影下相

當列車經過市原站後，就係今次搭叡山電車嘅重點紅葉隧道啦
列車首先會熄燈，然後喺全黑情況下減速進入著咗燈嘅紅葉隧道
但去程時未預計到紅葉隧道嘅情況，我將電話放喺窗邊完全影唔到任何嘢

去到鞍馬站就落車，而家先影返架車嘅車頭


喺鞍馬留咗一陣就上返同一架車回程

回程時就揀咗企位，企喺一個望到全個車廂嘅位置，準備好電話拍以下一段影片
https://youtu.be/1QTxfLQZaA8

搭到返去出町柳站又影多一次展望列車「きらら」車頭

返到出町柳就轉返京阪電鐵走人，原先以為特急洛樂係觀光列車，但後來先發現記錯阪急嗰架


搭到去祗園四条就落車，又行返去河原町一帶食晚飯



原本諗住食早一日食唔到嗰間雞白湯拉麵，不過今日又係冇開到，最後喺附近揀咗另一間拉麵試吓，好在呢間都好好味
食飽後喺河原町行多一陣街，去吓Uniqlo同其他地方，行到咁上下今次直接搭的士返酒店，執行李準備第二朝一早離開京都

住咗兩晚之後，第三日朝早食完早餐就搭的士去京都站

酒店知我搭新幹線，一早已經同司機講明係去八条口，一落車就可以買埋便當入閘

今次會搭到去岡山，由京都出發最快又最直接就係搭ひかり，不過都要睇清楚邊班車，有部分ひかり喺山陽段會停好多站，今次搭呢班ひかり535號就好啲，只係停3個細站


再一次搭到N700A

同樣嘅Green Car


離開新大阪後向左望就會睇到宮原綜合運轉所，呢度停泊JR西日本休息中嘅列車

見到幾次但都係搭唔到嘅N700S
https://youtu.be/X79goTuwr4g
最後貼多一段喺姫路站待避列車嘅片

東海道直通山陽嘅ひかり唔係京都後各停嘅咩？

去到岡山之後，其實我得14分鐘轉車，所以事前已經睇定邊度有Coin Locker同要行邊個月台

由1972年新大阪到岡山段通車到今年2022剛剛好50周年，不過我冇慢慢睇，因為要趕路

要搭嘅特急やくも7號喺2號月台，好在2號月台好近新幹線改札口


特急やくも由1982年開始已經用381系，381系曾經係中央西線、阪和線行走，不過現時只剩下伯備線嘅特急やくも

雖然381系已經投入服務40年，但列車喺2006年至2011年期間為所有列車進行翻新，所以唔算太殘舊

特急やくも要搭差不多3個鐘車程，所以舒適嘅Green Car非常重要


開車冇耐後就先休息，重有差唔多1個鐘到達前就開始食便當做午餐，便當係京都站買嘅松阪牛便當

去到米子就見到超級多キハ47系，不過都代表我差不多就要落車

臨到達松江前，喺連接宍道湖同中海嘅水道中間竟然有間神社

列車到達松江站後就落車啦

有少部分會飛站，但原來我班535都冇飛到站

到達松江後就由北口離開，向松江城方向行


由車站去松江城會經過松江大橋(或者可以行隔離宍道湖大橋睇埋宍道湖)


松江市入面仍然有好多保留得好好嘅水道同護城河，呢度亦都設有遊覽船，可以搭船慢遊呢個日本水都

位於山陰地區嘅松江同朝鮮半島非常近，當然亦都係最接近位於日本海、同南韓有主權爭議嘅竹島(南韓稱獨島)，所以松江市內會有宣示主權嘅竹島資料室


由松江站大約行15分鐘就會到達松江城

睇返資料得531同533會喺山陽段飛站，但都唔係東京始發