[鐵膠多圖]16日由北海道搭JR返九州瘋狂鐵道兼紅葉遊

SL人吉架DE10真心型

佢特登為SL人吉配色，好正

出站後先去熊本站旁邊都係新開嘅AMU Plaza行一陣，商場喺2021年先開幕，雖然商場內嘅鋪頭同其他九州AMU Plaza大同小異，但搭車前後行吓都唔錯

行到商場3樓會見到有一個露台，行出去就見到有個小型遊樂設施


喺露台望出去就係熊本站白川口新站房同埋附近街道

商場內重有一個2層樓高瀑布，行過影張相打個咭都幾好


自從武肺疫情後，日本餐廳明顯多咗好多外賣，雖然我行完AMU Plaza都只係7點多啲，但已經有啲攰唔想再搵地方食嘢，就決定喺熊本站內嘅肥後よかモン市場買壽司外賣返酒店食


買完壽司準備返酒店先見到熊本熊造型嘅熊本站入場券，如果你係熊本熊Fans或者想入去熊本站影熊本熊甚至影車，其實都可以用80Yen買呢一張咁得意嘅入場券

喺熊本站坐熊本市電去酒店

搭1個站去到祇園橋就落車，然後行一個路口就可以去到ANA Crowne Plaza酒店



今晚住熊本熊主題房
熊本市有3間酒店有熊本熊主題房，原本想Book最近熊本站嘅新大谷酒店，不過一早已經Full咗，位於辛島町嘅三井花園酒店又住過兩次，最後就揀ANA Crowne Plaza啦

Check In後就食埋晚飯，呢個壽司都幾好食，其實重有喺Family Mart買咗啲嘢食不過冇影出嚟
之後都冇特別行程，留喺酒店房休息準備聽日一早又出發

長崎去熊本的另一種方法

部機車係靚嘅

張DE10 紀念乘車證 仲罕有過原本嗰張

個蛋糕應該係慶祝一百週年，我早你幾日搭乜都無

張入場券寫明小朋友用

對唔住，咁大家買嚟收藏好啦，影車都係用返普通入場券

可能係前一日賣唔晒

起身後由房望出去見到好好天氣，原來出面個風景咁靚

Check Out後又搭熊本市電A系統返熊本站，開始第13日行程啦

一早嘅熊本站冇乜人，藍天白雲下心情都特別好

再次返到肥後よかモン市場，不過朝早只有部分餐廳同Family Mart開門

冇咩選擇下就揀咗吉列豬扒三文治做早餐，好似幾好味咁

買完早餐就入閘去月台，準備迎接9點11分開車嘅特急あそぼーい！到站

特急あそぼーい！係用キハ183 系1000番台，同JR北海道常用嘅キハ183系唔同，1000番台專門製造用嚟行走九州觀光列車，包括オランダ村特急、ゆふいんの森II世等等，所以將駕駛台設置喺二樓，配備車頭展望大銀幕

特急あそぼーい！由2011年開始運行，車輛吉祥物就係くろちゃん呢隻可愛嘅狗仔

影完車外就上車影車內啦，特急あそぼーい！最有特色一定係車頭/車尾展望席，每邊9個位總共18個座位，只能夠喺綠色窗口預約而且要額外加210Yen，不過都係一位難求


第3卡有好多受歡迎嘅設備，包括因武漢肺炎而暫時停用嘅波波池同圖書室

另外亦都有親子座席，呢度就唔需要額外課金但同樣要經綠色窗口預約

小賣部同記念乘車證吸印嘅位置同樣喺第3卡

第1卡、第2卡、第4卡其他座位就係普通座席，上網都可以劃到位

但唔知係咪坐得Green Car多，坐返普通座席竟然覺得好逼

吸埋張記念乘車證就返位坐低

然後準備開餐，我特登揀咗豬柳同免治豬雙拼，但都係覺得豬柳好食啲

九州好似架架車都有紀念乘車證，我嗰陣一次過攞幾張當明信片用

官方鐵膠明信片想買都買唔到

去咁多次都未試過買便當上車食

搭特急あそぼーい！最好就預約C/D席，呢邊望出去可以睇到阿蘇山嘅風景

列車經過肥後大津後就會不停咁向上爬升，經過15分鐘車程後就到達立野，立野站喺熊本大地震之前係連接JR九州豊肥本線同南阿蘇鐵道高森線，不過地震就震斷咗立野大橋，而家暫時只得JR列車到達

呢幅圖就可以睇到豊肥本線同南阿蘇鐵道剛剛好形成一個圈可以到達阿蘇山嘅南北兩面

立野要去到下一站赤水要喺短短8公里路段爬升190米，所以興建時就用咗折返式路線登山，列車喺停靠立野站時運轉士就要由第1卡行去第4卡準備反方向行走

我就趁呢個時間影吓特急あそぼーい！，剛才我地由左邊路軌駛入嚟，一陣間列車就係轉向右邊路軌離開

經過折返式路段後，去到較高處開揚嘅位置就可以望到新阿蘇大橋，原先嘅阿蘇大橋因為地震而損毀，地震之後4年就重新起好新阿蘇大橋從新連阿蘇同熊本

去到赤水站，見到反方向行走嘅九州横断特急2號，九州横断特急用車係キハ185系，キハ185系屬於國鐵最後一款特急列車，本身設計俾JR四國運用，但因為JR四國接手後冇耐就成功研發2000系而將部分列車讓渡俾JR九州

搭咗1個鐘20分鐘後就到達阿蘇站，雖然個站嘅名稱係阿蘇，但如果要去著名景點例如阿蘇神社等等，其實要喺宮地站落車

阿蘇站內重有一間車輛吉祥物くろちゃん嘅小屋

2019年秋天去時見SL人吉背後都拖住架DE10
係咪常規設備的?
人吉個便當好鬼靚

過咗阿蘇站同宮地站後其實都冇乜特別景色，不過大部分乘客都落咗車，列車上冇咁逼所以我就去車頭企一陣影吓展望景色

經過3個鐘頭多啲車程後，終於成功橫斷九州，由熊本搭到去大分，落車後都係第一時間影返架車先

影完自己架車後，我嘅視線被對面月台一架好掁眼嘅火車吸引住

快快手影埋大分站個站牌就過對面月台，大分站牌好特別地其中一個方向有3個站名跟住，其實係因為大分站係3條路線交匯站，包括日豊本線、豊肥本線同久大本線

剛才見到嘅掁眼火車就係大名鼎鼎嘅九州七星，九州七星由水戶岡銳治設計，係日本第一列豪華寢台列車

九州七星喺2013年開始營運，7卡火車分別代表九州7個縣，由特別設計嘅DF200牽引，有2日1夜或者4日3夜兩個不同行程，但不論邊一款行程都係一位難求

九州七星今次到訪大分站應該就係行走2日1夜中嘅第2日行程，由鹿兒島出發經日豊本線到大分然後再經久大本線返博多，當中大分站因為要調頭所以停留比較耐，咁我有幸見到九州七星真身

原來豊肥本線已經全線再開，我18年尾去仲係得熊本至阿蘇，要一早喺熊本巴士 center 搭去别府

其實一人只可以拎一張

(不過我都試過吸印衰咗拎多一張)

點解呀，搭車食便當好正，慳唔少時間

應該唔係常規，正常去到人吉之後58654會進入轉車台換方向，DE10只會回送時出現

我17年去係得阿蘇到大分，嗰一年久大本線都唔通連由布院之森都兜大圈

你情況趕車就要，我好少趕坐好耐車

我試過唔趕車都買嚟坐低慢慢食，啲便當好好味