日月空曌
2022-11-20 17:55:47
在此之前先簡單解釋吓一啲故仔入面嘅問題。
有好多人都問點解唔直接賭波/投資賺錢,主要三點。第一,始終如果成日中都惹人注意,尤其係啲賠率極高嘅比賽。
第二,投資或賭博返嚟嘅錢係浮財,對未來發展唔算特別大幫助,只可以攞嚟作為第一桶金。舉個例子,我當你要搞軍隊,咁唔係你掉完嚿錢出嚟就成事㗎嘛,你之後後續人員、裝備都係一筆持續開支,所以經濟上最好都係能夠有一個長期提供穩定收入嘅來源。
第三點,其實主角嘅認知範圍係以小弟自己做藍本,本身我冇睇波,所以都淨係略略記得南韓德國巴西贏咗世界盃,至於邊界打邊界,其實我唔係好記得。至於投資的話,始終啲錢唔係主角自己揸手,只能夠委託他人代勞,所以呢部份會有一定風險。
同埋有關於60萬嘈嚟嘈去呢件事,其實喺香港嘅政治、社運入面,為咗呢啲小小嘅錢屌晒老母係經常嘅事。莫講話60萬,你諗吓DGX單嘢講緊3萬咋,咪一樣嘈。
日月空曌
2022-11-20 18:43:24
夜晚八點
隨住時間去到高登在線人數最高嘅鐘數,參與一人一post嘅人亦越來越多,亦開始越嚟越有規律。
又最開始單純屌Admin Ban會員舔共,去到後來成個吹水台清一色「admin 扼殺言論自由!」,加上喺部份大口組成員嘅推波助瀾之下,越嚟越多人喺自己個鋪入面放埋連登條link,吸引啲人過檔。
至於點解大口組會落水幫手?咁就要從呢件事嘅前因開始講起。今次高登Admin激起民憤,係因為政治因素Ban咗「無鋒慧劍」同「買家甲」呢兩個會員,「無鋒慧劍」係大口組成員之一,有個分身叫左仔專家。
而「買家甲」即係林忌,同黃世澤一齊加入咗45條關注組,即後來嘅公民黨,而佢喺高登有個分身叫「專家左仔」,兩者關係之緊密可見一班。
雖然後世嘅公民黨以專業形象、中產離地著稱,但其實喺其前身45條關注組嘅時候,有唔少奇行種都參與其中,就例如啱啱講嘅黃世澤同埋林忌。
呢個亦都係點解係今次高登呢件事上面,要拉埋45條關注組一齊郁手,原因就係想利用佢哋係高登嘅呢批網絡力量。
時間好快就去到夜晚11點,雖然時間已經唔早,但洗版嘅人依然有增無減,而湧入連登嘅人亦越嚟越多,從最初嘅幾十去到上百,而家註冊嘅人數已經去到四百幾人。
至於高登方面,從來商業宣傳都係一樣必Ban嘅事,更何況係宣傳另一個同類型嘅討論區?於是乎唔少post咗連登條link嘅高登會員,冇耐就比Admin Ban埋。
而喺咁嘅風頭火勢下,呢一個舉動亦被認為係政治審查嘅一環,進一步激起民憤,令更多人參與一日一post當中,甚至開始唔單只係吹水台,連其他台都開始出現同類行動。