「各位同學,尋日『我的志願』張工作紙大家做咗未呢?有冇同學仔可以同大家分享吓?」
隨着老師發問,唔少小朋友都舉起隻手,爭住發表自己嘅「偉論」,但係又有幾多人嘅夢想,可以堅持到大個?
「我大個想做醫生,因為….」
「我想做老師⋯」
我抬頭望一望窗外,見到接放學嘅家長陸續去到幼稚園門口,見到人群當中自己父母,我知道係時候到我啦。
「老師!我,歐陽健峰!未來想做個警察,同爹哋一樣,除暴安良,維護法紀,捉晒啲壞人!」
我特登用一個較大嘅聲量,等喺門口嘅父母聽到我講啲咩。呢個就係呢幾年我一直扮演嘅形象,一個憧憬父親,一心想做個警察,智力上比起同年人較為優越嘅小朋友。
只有咁做,先可以為提前接觸警察系統一事作鋪墊,畢竟一個想做警察嘅小朋友,叫老竇帶佢見下「警察叔叔」,一啲都唔出奇,你話係咪?
喺返屋企嘅路上,老竇抱住我,好開心咁同老母講:
「老婆,你話我哋難得放假來接仔仔,竟然聽到阿仔話想做警察,『除暴安良,維護法紀』,睇吓講得幾好!」
然後佢露出一個得戚嘅笑容。
「阿仔不嬲都叻仔㗎啦,不過你呀,阿仔想做警察,你就要做個好榜樣俾佢睇,知唔知啊。」
我老母就咁樣回應。
就係咁,我哋一家三口就返屋企,但兩老唔知嘅係,我的而且確係想「除暴安良」,不過同佢哋諗嘅可能有少少唔同啫。