赤柱監獄 飯堂
「各位香港市民大家好，以下係新聞報道」
「行政長官李文龍發表新年講話，指來年2047年將會係「一國兩制」嘅最後一年，作為行政長官，將於最後一年繼續帶領香港，保持經濟以及民生各方面穩定發展，並希望能夠與中央政府穩定過渡⋯」
我抬頭望一眼電視機，睇住嗰個令人聯想起朝鮮廣播員嘅CCTVB主播，不由自主嘆咗一口氣。
「2047….話咁快已經入冊25年，時間過得真係快…」
冇錯，2020年《國安法》通過，當時我因為推動香港獨立運動，俾政府以「顛覆國家政權」名義拘捕，2022年被判終身監禁，去到今年已經係第25年。
就係咁，我大概有一半嘅人生喺監獄裏面渡過，由25歲嘅後生仔慢慢變成一個50歲阿叔。當然，有類似經歷嘅人唔止我一個人，當年有唔少人都同我哋一樣，曾經為咗呢個地方去付出，然而失敗收場。
「睇咩啊，反正呢世人都出唔到去，嗱嗱臨食完飯出去放風好過啦」
喺我身邊，一個年齡相若嘅阿叔捧住裝住飯餸嘅鐵兜，坐喺我身邊，一邊食一邊講。佢係阿傑，遲我兩年入嚟，原因係持械殺警。
「阿傑，你甘心就咁咩？」
「屌，唔甘心你可以點，出到去咩？出到去又點，你同我都五十幾，打得郁咩？更何況而家咩世界你又唔係唔知。」
「…」
「話唔定下年我哋就送去長城監獄打靶呢，唔好諗咁多啦。」
我冇答佢，枱頭再望多眼電視機。
「來年就真正回歸了，咱們作為中國人自然是非常感動…」
睇住電視機入面嘅「街頭訪問」，見到一班十幾歲嘅小朋友講住一口流利嘅北京腔，熱淚滿盈咁表達自己對「祖國」嘅熱愛，再諗起下年。唔甘心、憤怒、絕望…本來以為多年嘅牢獄生涯已經抹走咗呢啲情緒，但係呢一刻卻連同過去嘅回憶不斷湧現喺心頭。
諗起當初第一次走上街頭，對香港未來嘅憧憬；諗起後生嘅時候嘅鴻圖壯志，誓要通過自己雙手完成香港人共同嘅悲願；諗起嗰個改寫香港未來嘅炎夏；諗起曾經喺茫茫人海入面相遇過嘅嗰個人⋯我心入面突然之間有有一個決定。
