7月1日
我坐喺電視機面前,準備睇電視台有關於七一遊行嘅新聞。
其實可以的話,我都想去現場睇吓,始終話晒都叫做近代香港抗爭史嘅開端,亦係我改寫香港命運嘅開始。但可惜同前世帶住我參與遊行嘅兩老唔同,老母要返工唔使講,而老豆亦有參與遊行,不過係去維持公眾秩序⋯
「而家嘅時間雖然只係晏晝兩點半,佢嚟遊行出發仲有一個鐘頭,但係銅鑼灣一帶已經人頭湧湧。警方甚至一度因為人潮過多,喺地鐵站一帶進行人流管制,現時亦呼籲市民可以利用天后或附近其他地鐵站前往銅鑼灣。
喺維多利亞公園,今日係同一地點有團體發起活動,慶祝回歸六周年。而參與遊行嘅市民已經迫滿咗中央草地,有部份參與者要企喺外圍或者附近地方等待遊行開始⋯」
睇住電視機嘅新聞,同前世零三年七一好似冇乜分別,但無論係人潮管制定人流聚集嘅速度都比前世快少少,相信人數應該會多過五十萬。
1530 維園足球場
「今日我哋遊行嘅目的有三:要求董建華落台!反對23條立法!追究沙士失當!感謝各位香港人今日願意行出嚟!我哋而家宣佈遊行正式開始!麻煩大家請向怡和街方向出口出發。」
大台宣佈咗遊行開始,遊行隊伍亦開始出發,一路上唔少人帶住自製嘅橫額、紙牌,上面寫住「董建華下台,好事自然來!」、「反對廿三 (
https://zh.m.wikipedia.org/wiki/%E9%A6%99%E6%B8%AF%E7%89%B9%E5%88%AB%E8%A1%8C%E6%94%BF%E5%8C%BA%E5%9F%BA%E6%9C%AC%E6%B3%95%E7%AC%AC%E4%BA%8C%E5%8D%81%E4%B8%89%E6%9D%A1),還政於民」等各種口號。
參與遊行嘅人,大多都響應主辦方嘅呼籲着住黑衫,而除咗喺主要幹道上嘅遊行隊伍,喺地鐵站、附近其他道路入面都可以見到黑色嘅人潮向着大隊會合,喺電視台嘅直升機畫面下,就好似百川赴海,黑色嘅河流滙聚成奔騰嘅大江,不斷咁衝擊高牆。
同時記利佐治街作為由銅鑼灣站前往維園入必經之路,每次遊行各大組織都會喺度有街站嗌咪,今次都唔例外。而喺民間防疫工作小組嘅街站前,有唔少人選擇停喺度聽,因為講緊嘢嘅,正正係其中一個有份入去病房抗疫嘅醫護,徐承恩。
「各位香港人,好感謝大家今日願意行出嚟參與遊行,表達自己嘅聲音。」
「唔知大家有冇聽過一句說話:上醫治國,中醫治人,下醫治病。呢句說話亦係今日我會參與遊行嘅原因。」
「沙士疫情,喺香港人以及一眾醫護嘅努力下終於告終。冇錯,醫生可以醫好病人,但如果今日病嘅唔係一個人,而係一個制度,一個政權,又有邊個可以醫番好佢哋?」
「就係靠各位香港人。只有大家願意企出嚟,向政權表達我哋嘅不滿,用民意去打低嗰班禍港官員,先可以醫返好香港。」
「所以今日企喺度嘅大家,同當日參與抗疫嘅我哋一樣,都係對抗緊病菌。我哋對抗嘅係病人身體入面嘅沙士病毒,今日大家所對抗嘅係,喺香港政府入面嘅紅色病毒。」
天上艷陽高照,台下觀眾鼓掌,而稍遠處嘅街道上,香港人奔流成河,匯聚到遊行大隊當中。