日月空曌
2022-11-03 23:15:16
正所謂財帛動人心,呢句說話係政界、「社運圈」當中亦適用,一直以來唔少爭拗嘅起因都係因為一個「錢」字,今日所發生嘅情況亦唔例外。
一如既往,拜託練Sir打開電話,等我聽到會議嘅內容。今日嘅會議由司徒華召開,出席嘅人全部都係民間防疫工作小組嘅成員,亦包括部份參與其中嘅泛民中人。
「呃⋯各位,首先七一辛苦晒大家,唔好意思要大家百忙之中出嚟開會。今日呢個會,主要就係傾一傾工作小組未來嘅方向。」
司徒華對住其他人講。
「在我睇嚟呢⋯民間防疫工作小組嘅主要目的就係應對沙士疫情,咁疫情已經過去,其實工作小組都完成歷史任務。唔知大家點睇呢?」
果然,臨急臨忙叫人開會一定別有目的,原來係想過橋抽板。不過以司徒華嘅經驗,冇理由七一啱啱先過,官司都未完就嗌解散,始終咁樣對外形象都好肉酸,一定係有其他原因。
「華叔,其實我哋都冇意見,不過工作小組而家剩低嘅資源點樣處理?」
我認唔出開口嘅係邊個,但呢種一唱一和嘅口吻,明顯係事前已經傾掂數。
「呢個亦都係今日開會其中一個原因,想大家傾一傾呢一批物資同資金點樣處理…」
司徒華繼續講。
唔得,唔可以俾佢咁樣繼續,好明顯而家佢係想將成個討論方向由「到底應唔應該解散」變成「解散之後啲錢點處理」。
正當我諗緊點樣通知練Sir嘅時候,電話突然之間收咗線,我嗱嗱臨打返俾佢,當電話接通嘅時候,我聽到練Sir講。
「唔好意思,我有個電話入,可能要出一出去先。不如咁啦,始終事關重大,不如先休息15分鐘,等我聽一聽電話,順便等大家諗一諗,大家點睇?」
「好,就咁話。」
司徒華亦冇拒絕,語氣當中略帶輕鬆。咁又係嘅,現場唔少都係泛民中人,喺佢眼中今日個會經已成定局,又唔使急嘅。