他居住的木屋位於山林綠野,不時有鳥兒哼歌,如同我的隱居生活,生活非常寫意。
不同的是,劉吉有個老婆。
「阿吉!哈哈,佢哋又踢咗我下。」
聽見屋中老婆的呼叫,劉吉轉身回到屋子去,蹲下來把手輕輕放在其妻懷孕的肚子:「你兩個精靈鬼,咁快想出嚟?」
劉吉顯示出前所未有的溫柔,此時的劉吉容貌尚似壯年,並沒如今飽歷風霜的滄桑。
「你仲整緊個稻草人?」劉吉老婆問。
「嗯,最近啲鳥係咁偷菜,係時候要防守。」
「記住整可愛啲,驚佢哋出世後睇到會嚇親。」
突然,外面傳來敲門聲。
劉吉握起一把農具,靠到門前謹慎地問:「邊位?」
數秒後,一把幽幽的聲音亮起:「我。」居然是湯婆。
「湯婆?」
「咁急退休都唔講聲,仲以為你已經死喺南區。」
「都無咩好講……」劉吉出神幾秒,臉上寫著心灰意冷:「我哋都已經輸咗,生存嘅人……同死咗無分別。」
「我特登嚟,係有件想搵你。」
「出面講。」
劉吉行出屋外,與湯婆並肩看著夕陽。
「你代協會叫我返去?」
「我想邀請你參與一項計劃。」
「……」