【香港人畫的新派漫畫】OKAMASE漫畫專區(2)[內有學術交流]

多謝你哋
我都唔知我畫啲人咁有辨識度
靚唔靚就見仁見智，等菊巴分析喇

真島老師又開班

漫畫故事篇
https://www.youtube.com/watch?v=mdNztEt2fHk
角色創作篇
https://www.youtube.com/watch?v=CGMnPuhTTao

今日會講解東老師的MK POP與日漫的面相對比
首先多謝東老師比呢個機會我，滿足我既廢UP心
由於圖片同字數比較多，希望大家唔好QUOTE

我地今日會對比五官大細、分佈同畫法
而我地點樣比較五官大細
我地會係角色塊面上面劃圓打十字黎比較
對齊既準則係耳仔旁邊既面線
之後兩張圖放大到圓圈一樣咁大黎比較



點解準則唔用眼做十字線既橫線
因為咁樣做誤差好大
係耳仔旁邊既面線都會有誤差，但無眼咁大

我知道呢度有漫畫初學者睇緊，但我唔建議你地搬我呢個方法黎對比90度側面同45度斜面，因為對比呢兩個角度要識頭骨殻構造
唔係照搬就比較到

輕輕講解下日漫五官既作用（女角篇）
眼（由上睫毛，眼珠，下睫毛3部份構成）：表達神情
眉：表達個角特色及感情，由於眉對表達感情尤奇重要，所以有畫家會畫眉係頭髮上層
好多時我地以為一個表情單靠眼球同口就表達到，其實需要眉毛同睫毛既幫助
鼻：由於日本文化，鼻係代表男性生殖器（唔好問我點解，但GOOGLE真係好多日本關於鼻同JJ既研究）所以女角盡量會畫得簡單D，突顯女性可愛
口：表達感情
耳：作用不大，盡量低調以突顯其他五官

然後我地黎了解下東老師既畫風有乜特點

東老師無論陰影定反光，都會用人手畫線
而鼻都唔係一條直線，而係複數線條

就算京子同WENDY，都比較強調鼻
京子既腮紅面積都較大
分辦東老師角色主要係靠髮型同上睫毛
因為老師筆下角色眼珠同鼻都大同小異，所以好易認

好啦，咁我地進入比較環節
首先我想請個台妹黎幫手

呢位係台灣藝人林妍柔

我地睇下ANGLE姐同台妹既分別

係，ANGLE姐既五官大細同分佈位置
居然同女藝人有九成相似
即係話ANGLE姐都係一個靚女
點解我會拎漫畫同真人比較，唔係想做例子
而係東老師既畫風特式係極偏向寫實
唔信？一陣對比完其他漫畫你就知東老師既畫風寫實到你唔信

電鋸人

DANDADAN

金田一30週年

少年JUMP既坂本DAYS

有份係呢個POST做YOUTUBER講畫漫畫，真島ヒロ既
妖精尾巴-百年任務

SPY FAMILY（我應該CAP黑白，懶得濟做完先發現CAP左彩圖）

少年JUMP既魔女與使者

栗毛灰姑娘


最後我揀左兩本唔係少年誌，而係大眾誌既日漫黎比較（一陣會講點解）

今日もカレーですか？（今日也是咖哩嗎）飲食漫畫黎

いとなみいとなめず（我都唔識譯）夫妻相處漫畫黎


我諗大家都發現，除左DANDADAN之外，其他角色同真人比例都相差好大
所以東老師畫風似真人比例係一個特徵黎（特徵唔係優缺點，唔好誤會）

首先講左我之前話同日漫有出入既位
1.耳仔比較高
除左SPY FAMILY一樣咁高外，ANGLE姐隻耳高過曬其他人
雖然東老師無強調畫大隻耳仔，但係高度上同眼睛一樣，如果無用頭髮遮住耳仔會搶左眼既重要性
2.鼻用「排線」形式黎畫
就算DANDADAN用筆劃黎畫鼻，佢都係畫三角形既形狀
而東老師強調既係側面既陰影，係上面既例子無人咁做
大家唔係畫三角形就係點鼻
唔係無漫畫用排線黎畫鼻影

我之前係呢個POST介紹過既アオアシ（連載中既少年足球漫）
都有用排線方式黎畫鼻，但留意返，佢既排線係不同長度，而唔係條條一樣長

至於對其他漫畫對比後，發現左D乜野呢
1.東老師畫眼比較細
原因唔單止係眼珠細，而係上睫毛加眼珠加下睫毛成隻眼既構造，完成之後佔既面積細
其他漫畫就算眼珠唔大，眼白都會大，除左金田一之外，其他普遍都眼大
2.頭/頭髮的體積細
全部漫畫的頭髮頂點都高過ANGLE姐
頭髮加大體積可以令臉變細
但做呢個行為好麻煩，因為頭既體積變左，頭身比都要跟住改
係一個好麻煩既工序
3.頭髮的反光
日漫既頭髮反光多數係用面積同線條兩樣組合而成
而MK POP既反光係一筆筆，得條線而無面積式塗白
4.太強調腮紅
彩圖時候既腮紅既面積係無問題，但黑白既時候腮紅既線條相對日漫長，會變得搶眼

同埋我發現，MK POP角色既眼珠（甚至應該話東老師而家既畫風）係全部一樣，睫毛或者可以再強調D用黎分辦角色只係個人感想，未必有用
仲有一點，東老師畫女性既手，大小同男角差異唔係好多，好似有少少大日漫特別萌漫會將女性既手畫細D用黎表達女人味

好啦，至於點解我會拎兩本大眾向既飲食漫畫同夫妻相似漫畫黎講
我知道香港人好避諱漫畫角色眼大，會覺得係少女漫或者廢萌先會咁做
但係日本開始將眼大放係大眾向既漫畫
所以我覺得青年向既港漫，會唔會試下加大返少少隻眼呢？
當然啦，畫風要就返個故事性質
（係啊，MKPOP對我黎講似青年漫多過少年漫）

講完ANGLE姐講總監
本身想用總監同ANSON LO比教，廢事得罪人就打消左呢個念頭
唔吹咁多水，直入分析

總監都係接近現實既比例
特別係髮型完全係現實流行既髮型
其實有D對唔住總監，總監唔係男主角但係比我拎去同一班男主比









同ANGLE姐一樣
總監都係偏向現實畫風
同日漫比教
1.雖然唔及女角，但男角都係頭較細
2.五官對比全部漫畫都係細，無日漫個種誇張化。特別係眼，除左釣眼系角色外，可以加大隻眼
3.大部份男角都有畫鼻窿，東老師都有
4.日漫文化，鼻愈明顯既男性愈有魅力，男角鼻可以畫得更放手


只要強調返眼神，同調整返五官大細，總監應該同日漫分別不大
但係要面對既問題係
東老師由男女角畫風接近，變成男女角各自一種畫風

大致既問題係女篇寫曬，男篇真係無咩野寫
並唔係我偷懶

綜合整體：
1.頭（或頭髮）可以畫得更大
2.五官可以畫大D

拿，有覺得我講得唔岩既地方大家拎出黎講
一齊討論交流下，唔係我話我講長文就一定岩曬

廢人戰隊嘅畫都俾你分析到缺點都唔似缺點
菊生真係omakase首席打手

我覺得MK POP既角色設計偏向真實既香港
例如總監既頭髮真係D偶像團既髮型黎
如果東老師成功將日系畫風MIN落本土設計，我諗會好正

呢點有少少off topic
我係連載期間第一眼見到總監已經確信，mk pop既角色同真人比較一定會好相似
林妍柔張相並唔係我千挑萬選搵出黎同angle姐比
我係由我個台妹圖庫求奇拎一張相出黎比
畫得太似現實呢一點可以話係港台畫家比較多既通病

港台既文化係，學好美術既基礎再去畫漫畫先會進得好
而港台讀者既審美觀的確好多時是基於美術基礎好唔好
例如光影要真實，透視要正確

但係日本既角度，漫畫文化由美術而生，經過六十幾年既演變，已經變左另一門既藝術
佢地會重視變形畫出黎既美感，大於現實既正確性
例如廢萌漫女角隻眼打直 違反現實 但係睇落靚就無問題
當然動漫呢門藝術，入面好多既美都係基於現實而建立
但係係動漫中，美係最重要，比現實性更重要
而呢份美，係日本用六十年，上千上萬既畫家建立而成

好多時港台漫畫家想由美術基礎去畫動漫
就好容易變返六十年前由零開始建立一門藝術
所以我睇到好多港台畫家，加入現實流行既要素落自己畫入面
就好容易因為佢地既美係黎自美術既基礎，需要畫到好現實先靚
所以我望到總監既髮型係現實流行既偶像頭
我就知道mk pop既畫風好大機會，因為美術既基礎而滲入現實既要素

我唔係話叫大家放棄美術既基礎，直接去畫漫畫
但係日本動漫已經經歷左六十幾年先有今日既美
要一個人由識美術既基礎，去嘗試發展成日本既動漫美
其實好唔現實
由於動漫已經係另一門藝術，所以要學識點平衡學曬兩種藝術既美

(超級1999)

菊巴真係好有心機
其實我畫人係不知不覺就畫成咁
睇你嘅對比先發覺
我無意中會畫得似我鍾意嘅面相
例如dandadan係你舉嘅例子中我最鍾意
嗰種寫實同圓潤感
對一對比例亦同angel最似（我覺得

同真人比嗰度笑咗

有一樣嘢我幾驚訝你竟然留意到
就係我畫女人手係好大
因為⋯我自己隻手都好大
係同男人手差唔多大
好多時畫手都會抄自己
抄抄吓就變咗女人大手
啱嘅，如果畫柔弱女角大隻手係怪
好彩我女角暫時冇邊幾個柔弱
我會慢慢改吓

有樣嘢想問
我畫男人同女人嘅面相其實分別唔算大
只係女人眼稍大
男人面稍為棱角同鼻長(側面可能明顯啲
女人身，比起男人身，我都唔會畫特別瘦小
但我見好多日漫
男女直頭畫到兩個物種咁
其實你覺得邊樣好啲？
男女分別大係咪突顯到女性媚態？

我有時想畫一啲突顯條女係靚嘅畫面
發覺有啲困難
畫極都唔會有「哇」一聲嘅感覺
唉畫靚女真係千年難題

我都唔知點解
畫畫吓就偏寫實
其實我冇正式受過美術訓練
一直以嚟都係抄吓日漫啲畫法
見到有啲嘢幾好用就加落自己度

我都驚自己會愈畫愈土
呢樣嘢係畫手本人好難自覺
所以我希望讀者見到我啲畫柒要即刻屌醒

我見你講DANDADAN我專登搵黎比較架
可惜男主角見到眼既畫無正面，唔係我都會用黎同總監比
DANDADAN的確係最似係呢堆例子最似你畫風
特別係頭同眼差唔多大細，其他漫畫差異好多

手大個方面，其實我畫女仔都有手大既傾向
因為現實要手大先會手指長，手指長先會靚，所以有時唔小心會畫大左

男女分別個面相我係總監篇分析都有講，要唔要畫成男女異相
我就覺得無乜所謂
SPY FAMILY 3個主角都唔同面相，佢一樣可以爆紅

我知東老師無學過美術啊，其實我都無
但我FOLLOW左你IG一段時間，我發現你STORY分享既畫傾向現實系
而我地共同FOLLOW既畫家有個畫開現實系我見你LIKE佢好多畫
再加上你好鍾意加入現實要素落自己既畫
我就知你審美觀傾向現實多於日漫個種誇張
所以我專登同真人比較，等你重新審視下自己既畫，其實好傾向現實
咁先可以同日漫有效咁比較
同真人比張圖唔係用黎搞笑

今鋪總算UP得真係有料，希望大家唔好再當我廢話製造機
（好快又會UP返廢話）

用圖可能簡單D
好多人以為學左紅色部份，就會識藍色部份
但其實藍色個部份係好多人用幾十年黎演化出黎
如果學識左紅色就可以自行摸索到點畫藍色，日本人用幾十年先成就出黎既部份
你一定會係名留千古既大畫家

強調多次，我唔係話學傳統美術無用
但唔好以為學完傳統美術就一定識畫動漫
最好就有能力學曬兩味啦

關於我之前問畫男女差異大到底好唔好
同埋點畫靚女嘅問題
有個mon po嘅朋友覆咗我
我覺得係幾啱幾實用
可惜佢冇連登acc
所以我轉貼出嚟
有意畫靚女嘅朋友可以參考吓

男女未必要分好開，要睇作品目的同個人風格，有分別變相係強調雙性，百合就無必要，搞笑重點唔係男女外形差異到就唔洗做好多描寫

「哇」一聲，突顯靚，就係對比。細節既對比，量既對比、精細既對比、構圖既對比

例1




漫畫前面1頁7格，後面3格引入，再比1頁強調靚既重點。


例2




前面無咁精緻既，頭髮一pat得個型，眼可能係1個黑部加1個灰部加高光。靚果格比滿髮絲，眼比多2、345層灰，當CG咁畫。前面都精緻，果版上埋色。

例子都係前一頁後一頁對比
前面兩張《明日同學水手服》，用格數量、作畫完成度黎對比
後面兩張《戀上換裝娃娃》，用格數量、主要角色人物大小、背景深淺黎對比

即係話
要表現一條女係靚
畫到個樣靚唔係唯一做法
仲可以利用分鏡去營造氣氛
同埋仔細度或質感唔同嘅作畫
去表達果吓「哇」一聲嘅靚

我記得曾經有人同我講
漫畫中要畫一條女係靚
唔一定真係要「畫」出嚟
你個故事入面講得到佢係靚就得
同埋同其他角色對比起上嚟，係靚就得

呢個可能就係漫畫同插畫唔同之處

其實我覺得有美術底係好重要
我呢啲連素描都冇學過嘅
真係打個陰影都唔係好掂
動作都畫得生硬
有好多技術上嘅嘢，真係唔學過係唔識

不過漫畫係好自由嘅
即使冇畫底都可以畫出一個好故事
但要更上一層樓，始終都唔可以冇根底
有時間我會再深造一下

素描最大作用係練觀察力，同埋隻手可唔可畫返見到既野
陰影係漫畫同美術素描有D分別
漫畫陰影一般分淺灰深灰黑色三個階段
漫畫對影既形狀要求都無咁仔細，正常就得
相反素描唔單止陰影要塗黑，有D漫畫會留白既淺色位都要油，例如啡色頭髮會輕輕力塗灰
雖然睇落好似，但實際運用起上黎技術有D分別
學左傳統美術當然會畫漫畫更得心應手
但要識分邊D技巧岩用落漫畫度，邊度未必岩

利伸：兩範都唔掂

同埋傳統美術同動漫美術之間真係唔少位重疊既
上面兩個圓圈既重疊位係畫少左

https://twitter.com/palmie_oekaki/status/1550103078099107841?s=21&t=5uDqEc7evc8ebpx436T-Qw

我覺得呢個講男女分別幾適合東老師參考
因為我覺得東老師男女分別都唔算太大
唔知岩唔岩用

估唔到呢個post都咁多人mon
好在D有用野無hide

其實係多人mon㗎
但真係上嚟傾嘅人唔多
可能冇acc、或者怕咗連登
真心想多啲人，尤其漫畫作者
上嚟傾吓偈

死我畫啲女人好似仲man過佢啲男人!!
唔怪得有人話我畫啲女推唔落