【香港人畫的新派漫畫】OKAMASE漫畫專區(2)[內有學術交流]

之前嗰話見你講咁多隻人魚，又識變腳行，以為條人魚係有料到
點知你跳返落海就算鳩數
真係估你唔到

你想人魚公主再次出場?

唔想
只係以為條魚係第三人

Post過動物台另一個post
直情冇人理 插都冇插


不過我都係唔係好在意畫得靚唔靚
興趣起Story telling嗰面多啲
即係假設我依家想用火柴人嚟畫日漫了
畫布設定 分鏡 上字幕嗰啲點應該點搞

第三人?第三主角?

我都以為人魚係重要角色，點知閒角黎

我同朋友開嘅班
不過最近冇開新班，都係啲舊生黎畫自己作品
我地同佢地傾故事、分鏡，教佢地點可以再好啲咁

link？
我啲唔專業意見…如果只係要火柴人級數
諗定個故事係做乜，知道做乜就安排班人大約有乜對白
然後開張A4紙打六格，第一格畫個大景，第二格畫近景，之後出人你講一句，佢又講一句
似畫ux storyboard咁，不過解說變咗對白

客串下兩話咋
因為出場果陣佔咗一頁？

多謝峽菊吧幫me置頂

去到星期一5點咋，到時我會PIN MK POP 6

都好

視乎咩劇情啦
咁樣分唔完全可以話你錯
但概念唔岩

唔建議用呢個心態去諗
冇一定畫功，你嘅分鏡曉飛天
你都唔會畫到個感覺出黎

我晏啲睇完寫個簡單漫評比你

想喺呢兩日出篇文章解釋返頭身比，同埋點解我話龜頭生野郎畫既MK妹唔係日系
圖連字應該都幾長（不是重點）
而係我怕解釋完會比畫師大軍殺入黎洗版，成個POST大亂
你地希望我係出面開一個POST講飽佢定貼係度
我自己係想開係創意台藝術討論

我唔係專業編劇，但想講少少自己意見

你嘅作品類似常見嘅boy meets girl故事，出於某啲原因男女主角相遇，經歷一啲事件之後兩人互相改變，最後墜入愛河
你畫嘅百合故事，故事結構正正常常，冇咩特別之處，起承轉合都有齊晒。如果想再執下，可以由故事情節方面著手

我最近睇緊富野由悠季嘅 影像的原則，引用少少：

述說故事需要時間
⋯⋯即使是短篇故事，一樣必需以具體的故事，使得觀眾感受到寓意。短篇之所以比長篇創作更困難，就在於要建構一個可以簡單道盡、卻又留存觀眾記憶的故事，倘若其內涵不夠強力，將難以達成此任務。
⋯⋯有想述說的故事，但卻沒有找出敘事手法，那就不應該創作影像作品。
⋯⋯不只如此，故事敘述本身，也必需擁有隨時間一同發展下去的趣味才行。
我們經常可以聽到觀眾對於細節趣味的讚賞，不過大家請注意，那並不等同於對原本作品整體的真正評價。

影像作品需要精彩橋段
影像作品是一種以影像來取閱觀眾的內容，因此必需要精彩橋段才能掌握觀眾。也就是所謂的「賣點」。
此處所謂的影像的賣點，便是影像上最為高潮迭起的部分，可能的話，最好還能夠提示出後續故事的背景，或者作為核心價值的主題。
創作「精彩橋段」的第一重點，便是「先點出整體故事的重點部分」。
假設是特別的機械人會登場的故事，那麼我們就要在一開頭便展示出該機械人。同時，還要「先說明故事輪廓，讓觀眾瞭解觀賞的大方向」。

按照富野嘅講法，一個故事應該用適當嘅敘事手法表達寓意，同時加入精彩橋段吸引觀眾。而精彩橋段需要同故事寓意有關連

我認為"為妳跳舞"可以作為寓意嘅部份，大概係「用一生去守望別人，係一件帥氣嘅事」
不過故事嘅高潮位「靜研打走mk仔救妹豬」似乎唔夠扣題。「用一生去守望別人」意思係長時間、喺背後默默守望/支持對方。「打mk仔」只係單一事件，而且「保護人身安全」同「守望」意思上有少少出入
想改善依部份，應該畫成横跨一段時間嘅多件事件，妹豬每次遇到困難/失意靜研都會低調地出手相助。維持故事原意嘅改法係最好，因為本來靜研為咗啊媽去相睇就係一種低調嘅付出，成個故事由故事背景到結局環環相扣
但考慮到故事篇幅，可能好難畫到表達長時間嘅多件事件。想由故事寓意改嘅話可以改成「為咗別人不顧自己安危，係一件魯莽但帥氣嘅事」，例如靜研(同佢老豆)平時開豬肉舖好易斬親手好危險，但為咗啊媽都會繼續做；結局靜研為咗保護妹豬畀mk仔打傷之類。故事情節冇咁繄密，但都係一項選擇

另外，靜妍同妹豬喺練舞室嘅爭論作為第二大精彩橋段，坦白講我唔太睇得明
一開始兩個人爭論緊「喜歡嘅事嘅定義」，靜研覺得「唔討厭就算喜歡」，妹豬回覆「可以一天到晚、一生鍥而不捨去做，先算喜歡嘅事」。其實開頭依兩句已經有少少雞同鴨講，妹豬講唔出「喜歡應該係"主動追求"、"渴望去做"」，只講到「需要長時間堅持」。照妹豬所講，如果靜研由朝到晚斬豬肉，已經等於佢真係鍾意斬豬肉。咁妹豬點解要反駁靜研
然後由於妹豬扁低斬豬肉，所以靜研話鋒一轉，以老豆為例子解釋斬豬肉嘅可貴之處係「可以守望他人」，妹豬再次離題指「有單打獨鬥嘅覺悟先算夢想」。留意返妹豬嘅回答其實完全唔關事，因為斬豬肉都可以一個人斬賺錢養全家；而跳舞都可以一個人跳娛樂觀眾。兩者都係一個人為多個人付出，冇高低之分，妹豬根本反駁唔到靜研
之後妹豬跨頁跳舞完，最後重提自己「會一生堅持喜歡嘅事」。雖然總結部分冇問題，但問題在於跨頁跳舞冇辦法承上啓下。明明跳之前講緊「跳舞係單打獨鬥」跳完後係講「自己決定會窮一生跳舞」，但跳舞嗰兩頁最多只表達到「妹豬跳得好好睇」，同前後兩頁同咩關連，直情cut咗佢唔跳舞都唔影響故事內容。依段要改嘅話應該要展現到一個人練習跳舞嘅孤獨、同埋妹豬已經跳咗好多年將來會一直跳落去等等

提到跳舞，我覺得故事名叫"為妳跳舞"有啲難明。因為妹豬一直講緊"跳舞"係一個人跳，冇提過可以跳畀觀眾睇，所以讀者好難理解到點樣"為妳"跳

有讀者話劇情兒戲， 我估可能係因為結局發展太突然。感覺上係「因為係百合故事，所以妹豬鍾意咗靜研」而唔係「因為xxx，所以妹豬鍾意咗靜研」
故事入面，妹豬幫靜研化妝後突然表現出鍾意對方，唔通只係因為外表鍾意佢？可唔可以舖排多啲，交代清楚緣由。
前面有提過妹豬冇朋友，其實可以配合返妹豬話自己一直以嚟都係孤單咁跳舞，而認識到靜研依個容易相處嘅大姐姐，有機會同佢互訴心事自自然然產生好感。講多少少妹豬嘅感情就會合理好多
而靜研對妹豬嘅感情都可以再講多清楚啲，如果唔想直接畫出嚟，可以用靜研同宅男嘅相處方式做對比

另外情節上重有少量沙石位：
例如靜研傷疤係因為被卷入附近劈友事件，結局豬妹畀mk仔撩都可以改成被卷入劈友事件，前後呼應更明顯；
妹豬嘅故事背景講得太少，既然有佢冇朋友嘅設定，可以講多啲前因後果；
故事名叫"為妳跳舞"，但跳舞相關情節太少；
我知"為妳跳舞"本書係喺"出走"展推出，所以故事入面提到兩個女主角屋企都考慮緊移民。但依部份感覺同成個故事好割裂，如果可以講埋兩個女主角嘅夢想同香港環境之間有咩關係就更好；
最尾妹豬請靜研「一直陪伴自己(拍拖)」呼應唔到靜研「守望他人」嘅夢 想；
妹豬跳舞、靜研同宅男相睇可以加頁數；雖然好難揾地方減頁數，但如果要減，靜研同妹豬相遇前、靜研同妹豬餐廳食飯嘅笑位、幫靜研化妝都可以減頁數

暫時諗到嘅係咁多，雖然好似一直批評，但只不過係冇講到優點出嚟，因為批評係容易過讚賞好多
其實我好鍾意睇你作品，係拎住你本書打依篇感想
希望老師繼續努力，畫多啲好作品畀大家睇

重生巴

我絕對認同日系畫風廣泛
但其實部份日本畫風後面有佢既理念，佢既中心思想，佢想表達既野
例如美少女遊戲同廢萌既中心思想係「靚」
而佢地既靚 其實係有份日本價值觀係後面
大眼鼻細大波腿長，呢個係浮世繪留落黎既美感
如果你係呢一刻畫到細眼大鼻細胸短腳既女角色好靚
我都唔會覺得佢係日系美少女
(純粹個人意見)
咁當然我都覺得唔係全部畫風有佢既理念
同埋隨著故事需要畫風唔同，我好同意

程況有啲似「iphone背後嘅理念」
我唔反對巴打講嘅有理念
但同iphone一樣
寫ios app同用iphone嘅人通常都唔係好care
而日本畫風，讀者同作者相信都冇乜人理
使用者同學術研究嘅分別

我自己覺得，中港台好多畫圖既人，就係無去理解同分析過人地點解咁畫，導致畫出黎既野變成四不像
呢個都係點解我會話龜頭生畫既畫唔係日系
而比大家放上FB燒既原因

我自己唔係好同意日本人畫既漫畫就叫日系畫風
唔通日本人整舊紅豆軍艦，紅豆軍艦都算日本壽司咩
我同意有巴打QUOTE，個畫風持續到十年有一個流派，咪成功囉
如果紅豆軍艦係日本KEEP到十年，我都會認同紅豆軍艦係日本壽司

上面有位巴打做左個好長嘅漫評
巴打講嘅我就唔重覆
我會講相對技術少少
首先呢篇漫畫我係幾鍾意的，呢種淡淡地，唔使驚天動地嘅愛情，係好舒服的
然後絲打嘅畫功個底打得好，畫風都好穩定
有背景嘅位都畫得好足，冇hea做
係角色線條可以試下多少少變化同幼返少少(唔係must，但可以試下效果會唔會好啲)
背景上可以落多少少黑/排線，灰/網點見你冇用開，就唔特別講

故事上，我見你喺收錄喺同一冊入面，我以呢篇係一整片咁去講，唔當係三話連載
因為得50頁左右篇幅
我覺得頭15頁交待兩個主角性格同主線係唔錯的
但妹豬嘅性格交待得好清楚，有少少浪費左篇幅
中篇嘅部分，劇情我覺得唔夠到肉同太長，可以凝造多少少兩個人之間信念嘅衝突，或者將感情更加升溫，咁去到「轉」嘅部分(打mk仔)，個感情可以更加提升

而下篇，mk仔個位我覺得可以長啲，將妹豬嘅危機升級，令個張力提升
到主角救美果陣，讀者嘅情緒會更加提高
然後結局，就係我鍾意個結局

分鏡上，如果係印紙本，而唔係條漫
我覺得格嘅運用可以再好啲，而家有啲太吉，冇充份利用成頁，令節奏悄為慢左，篇幅都有少少浪費
雖然有背景嘅地方有畫足，但始終都係少左啲，令到睇落好吉
如果因為人力同時間不足，可以試下用多些少效果線去填補，令到個畫面唔好咁白

不過講到尾
我係鍾意呢篇的，只係有進步空間
加油～

btw原來你就係smalltung
我地漫畫班都有推介你套mk pop比學生睇
都有買你本書

我明巴打你出於文化保育嘅角度好希望區分唔同國家嘅畫風
但你可能有少少太鑽牛頭尖

大眼鼻細大波腿長，呢個係浮世繪留落黎既美感
如果你係呢一刻畫到細眼大鼻細胸短腳既女角色好靚
我都唔會覺得佢係日系美少女

我唔熟浮世繪，但上網隨手揾幾張浮世繪，就我所見大部份都係細眼大鼻冇畫波冇畫腿


而且，據我道聽途說所知（睇content farm睇返嚟，唔一定啱），與其話現代日系插畫受浮世繪影響，不如話更接近慕夏嗰種風格(唔知叫咩風格)影響
簡潔線條、簡單筆觸、簡單/高對比光影、大量花草樹木同幾何圖形裝飾、色調柔和、題材專畫靚女等等



其實畫風包含好多範疇，人物設計只係其中一部份。除此之外重有筆觸、光影、色調之類範疇，太複雜我都唔識講
巴打講嘅日本幾多頭身香港幾多頭身，對作品整體而言只係屬於好細小嘅一部份，細到我覺得冇必要因為頭身分別而區分唔同畫風
而你講嘅龜頭生mk妹漫，整體畀我嘅感覺同日本常見嘅h漫差唔多

另外我認為，古代資訊唔流通，所以唔同地方畫出嚟嘅畫好大差別，好容易分得出歐洲畫中原畫日本畫。一個地區主流嘅畫風就用地區名命名
但現代人個個都上網向自己鍾意嘅畫風學習，冇任何地域限制。現代人繼續用地區名為畫風命名係咪恰當呢？

我覺得一幅作品屬於咩畫風，只要作者自己認同而且有合理理據就得
可以按作者出生地、生活環境、學習嘅對象、創作理念等等分類
既然幅作品係屬於作者，佢自己鍾意咪算
如果香港作者真係發展出獨有嘅畫風而且喺香港流行，咁當然令人高興。但現階段香港新派漫畫同日本漫畫分別咁細，要自立門派似乎言之尚早

哇，我唔知點講
應該話好感動
巴打你咁細心分析個故事
真係好多謝你

其實你講嘅地方我都認同
呢個故好似好多設定
但我又冇交代到
係自己太貪心
由唔鍾意到鍾意交代得太急
尤其跳舞嗰度
其實啲對白諗咗我好耐，寫完又改
都唔知點樣令佢哋兩個嘅感情進展比較合理
果然巴打又即刻擦覺到我夾硬填
真係瞞唔到讀者嘅法眼

記得呢本嘢係上年八月出
呢個故都算比較後先開始畫，四五月倒啦
嗰時有啲急唔知畫乜好
諗住之前已經畫咗兩個比較悲情嘅故
不如今次整個喜劇少少
類似my fair lady嘅故事啦
舊瓶新酒
我對編劇嘅認識都係從電影、劇、漫畫睇返嚟

可能你會問點解我唔q諗清楚先畫?!!咁多屌位
有時太心急畫咗公仔先
因為冇貨交仲大鑊
之後諗住對白再扭到佢掂為止啦
而家發現其實都係唔得
下次真係要諗清楚再下筆

再次多謝巴打嘅長文
我真係要save低好好珍藏

多謝老師意見
聽個有拍過電影嘅kol(腦燒)講過
一個故事一定要有衝突
不過佢又冇講點衝突法
而家睇翻你講，好似有啲明
兩個女角嘅信念
其實根本性地唔同
如果可以更多交代有乜唔同
甚至要兩個嗌吓交
再互相了解
應該個感情會深刻啲
而家得妹豬係咁屌個豬肉婆但佢又冇乜反應

中段太多唔好嘅位，之前位巴打都講過
但個結局，私心其實我都幾鍾意
因為而家睇返，妹豬話佢有bc
有啲「你估我唔到啦掛」嘅感覺
不過我都係唔好自己讚自己喇
始終有太多要改善嘅地方

關於分鏡
之前喺sns 分享過
通常畫漫畫應該先畫好一整話草稿
然後一次過上線，再後期
但我會完成一頁的草稿、上線、後期
然後才開始下一頁的草稿
因為長期做同一個工序好難受
即係話，我係畫到那頁才想那頁的分鏡
我諗啲人應該會覺得我好亂嚟

拿，而家知咁樣做法出事啦
畫到邊度分鏡到邊度
有時一啲重要嘅格
要臨急就位
搞到前前後後有啲無謂嘅空位
係我錯，冇得唔認
我以後會認真編排分鏡

多謝老師買mkpop
希望你睇得開心
我啲嘢用嚟做反面教材都ok嘅