葉開葉開
2021-06-02 19:16:16
一百九十五
球場上所有球員們散開,行返去自己既位置。
「喂達叔!」阿必笑笑口咁叫住楊舒達。
「?」戇鳩既達叔一臉疑惑咁望返阿必。
「唔好再擺烏龍呀。」阿必笑嘻嘻地道。
佢係寸緊上年東亞少盃外圍賽,達叔對台灣果陣擺烏龍。
激將法?
達叔老臉一紅,尷尬地道:「唔會喇。」
*
雖然阿必咁樣寸鳩楊舒達,但事實上達叔今日既表現非常出色,馬來西亞既前鋒唔算高大,所以所有既高空攻勢比豪歌同達叔解圍係意料中事,估唔到既係達叔既補位攔截非常出色,馬拉仔短小精悍既前鋒竟然都受制於達叔出色既攔截,完全冇辦法起腳。
佢今日既發揮可以話比起隊長豪歌更加出色。
我當係阿必既激將法有效喇。
不過兩隊既實力其實差唔多,但劉sir今日收起左賈加華擺雙防中阿必同發叔,令我地只能靠牛康仲有康達兩邊側擊比家顧去頂,或者二傳比我射門。
原本呢個戰術對矮小既馬拉仔其實係一個幾好既戰術,畢竟佢地既中堅冇家顧咁高大,但可惜既係家顧呢個自稱香港Top 5既前鋒今日啲頭鎚好似失左靈咁,唔係頂中波底炒高就係起跳時間失誤波皮都掂唔到。
不過即使係咁樣,原來我既個人技術即使黎到國際賽都非常啱用,所以即使賈加華冇出場,大舊佬頭鎚失靈,我地由我發動到唔少攻勢。
久攻之下,我終於響上半場尾段把握到馬拉仔後防一次解圍失誤,響禁區頂抽射入網。
當時牛康左路傳中,大舊佬騰空但撻頭,馬拉仔5號加一腳解圍但解得唔夠遠,於是我響禁區頂窩利一抽就射入左。
看台上爆發出香港隊支持者既歡呼聲。
「屌你世界波呀!」
「好波阿熙!」
「再入一球!」
我啲隊友攬住我慶祝。
「唔夠呀,再入一球!」我回應道:「下球到你喇,家顧!」咁講算係比啲激勵大舊佬。
「係呀,你頭先浪費晒康達啲傳中喇。」阿必拍下大舊佬個光頭:「係喎,其實你先十四歲,點解咁快會冇晒啲頭髮既。」又問埋啲戇鳩問題。
「我都唔知…」大舊佬一副心事重重既樣。
睇黎係驚比劉sir屌。
*
上半場我地以一比零暫時領先。
大舊佬既表現非常恐怖,所以佢直頭比劉sir鬧到狗血淋頭,再由23號既麥小明入替。
我唔知呢個係咪一個好既策略,但係我地既攻勢就少左一樣進攻模式。
不過家顧今日表現咁差,就算唔換走佢都發揮唔到佢既高空優勢喇。
下半場除左我地以麥小明換入盧家顧之外,馬拉仔都有調動,換左個13號入黎。
唔通係前鋒黎既?
咁似乎係要同我地鬥攻。
*
咇!
隨住球證吹雞,下半場正式開始!
由於大舊佬已經被調離場,所以我地少左兩翼鳩斬,多左地面攻勢。
不過最擅於組織或者突破既進攻中場賈加華同歐華緯今日仲未出場,所以只能夠由防中阿必發動攻勢。
呢個亦都係我覺得戰術上劉sir唔及陳sir既地方。劉sir係好有威嚴,但有時佢既換人係懲罰式換人,對於踢出黎既效果要二次修正。
陳sir就睇得宏觀好多,好似真係由頭佈緊一個局咁,不過啲球員就唔係好驚佢。
各有各好喇。
不過話說回來都係果句,以大舊佬今日既狀態,就算留佢響場上面都冇撚用喇。
換人之後,阿必雖然係發動攻勢既起點,但重心人物其實係我。
阿必一傳比我之後我就作出個人突破,扭佢老母閪再起腳或者傳出去。
但畢竟係國際賽,唔會好似社際咁輕鬆架喇,對面補位都快,所以夾硬發動左幾個攻勢既攻門都唔中目標。
係喎,馬拉仔個13號入左黎之後好似消失左咁既?
唔係諗住同我鬥攻既咩?
「阿熙!睇後!」阿必響傳完個波比我之後大叫!
我都仲未意識到發生咩事,我隻左腳大脾就傳黎一陣劇痛!
「哇!」我既慘叫聲響空曠既球場迴響…
我成個人飛起再落地…
仆街…係個馬拉仔13號…
佢入黎唔係黎進攻,而係黎破壞我地既進攻!
(待續)