娘娘一死，狗公個個即刻義憤填膺，立志為娘娘報仇。至於英格蘭嗰邊都有唔少人同情貞德，個別參與老屈者更加日日心驚膽顫，驚死會遭天譴，英軍人心渙散。結果法國登上道德高地，取得主導權，慢慢收復失地。
1435年，查理七世同勃艮第大公正斗菲臘簽訂亞哈條約（Treaty of Arras），勃艮第同英格蘭解除盟約，回歸法國王室嘅懷抱，並交還巴黎，查理送返幾個城鎮當回禮，又豁免菲臘作為臣屬嘅義務。而英格蘭失去勃艮第依個強力盟友，已經註定失敗。英法又協議停戰，期間查理七世對軍隊進行改革，加入大量大炮以提升攻城效率，同時加強中央集權，總之就變得更強大啦。
之後嘅事唔駛多講，法國喺1449年收復諾曼第，翌年大敗英軍於布列塔尼。1453年，百年戰爭最後一場戰役喺加斯科尼嘅加斯提隆（Battle of Castillon）打響。依場戰鬥可以話係克雷西戰役嘅掉轉版，長弓因為盔甲質素嘅提升，再唔係以前嘅大殺器，取而代之嘅係法軍嘅新式火銃，英軍終於見識到乜嘢叫閪冧咁款。結果英格蘭唔單止輸咗場仗，仲輸埋苦心經營三百年嘅加斯科尼，英格蘭除咗北端嘅加萊港口之外，至此完全退出法國大陸。
法軍利用火炮吊打英軍
就係咁，由1337年愛德華三世宣稱法國王位，到1453年卡斯提隆一戰，持續咗116年，總共五代人嘅百年戰爭，最終以法國嘅勝利結束。
查理七世前期俾貞德carry，後期自幹，取得最終勝利，因此被譽為「勝利者」（Charles the Victorious）。但係依位勝利者收尾幾年非常折墮，佢個仔，日後嘅路易十一起兵反抗老竇，激到佢身染重病，個口生咗個巨型腫瘤，令到佢完全無法飲食，咁就活生生餓死咗。不過都唔關英格蘭事啦。
勝利者查理七世
戰爭結束後的法國
英格蘭打咗116年，係咪淨係得個桔呢？又唔可以咁講。戰爭之前，英格蘭同法蘭西民族之間糾纏不清，人民唔係為自己民族而戰，而係為封建領主打工，依班封建主嘅身份認同亦唔係建基於民族而生，而係來自獨立於民族嘅家族血統。因此有唔少法國人貴族因為同金雀花王室有血緣關係，而被認為係英格蘭一派。而家百年戰爭激發起法蘭西民族意識，向英法兩邊灌輸一個概念：你係法國佬，我係英國佬。那怕你係我表弟，總之我哋之間都冇任何關係，總之我哋就水火不容。
法國王室作為大贏家，得以向諸侯展示應有嘅權威，戰爭團結上下，無疑推動中央集權。法國擺脫英格蘭之後，終於踏上佢嘅稱霸歐陸之路，成為為人熟知嘅最強陸軍之國（普魯士崛起之前)。
當年金雀花帝國遺留落嚟嘅歷史遺產，隨住英格蘭全面脫離大陸而完全消失，雖然之後嘅英格蘭君主一直保有對法國王位嘅宣稱，直到1801年法國大革命推翻波旁王朝，無王位可宣為止（你應該唔夠膽宣拿破崙呀嗎?)。
事實係戰爭令英格蘭進軍歐陸嘅夢想幻滅，國策轉為打地鼠策略，見到歐陸邊個太強大，就執佢一劑，邊個弱就幫下佢手，所謂歐陸平衡（Balance of Power）是也。的確，英格蘭以及之後嘅大英帝國都冇再對歐陸進行任何嘅侵略行為。至此之後，英格蘭就放眼海洋，開展佢嘅海洋帝國。。。不過哥倫布當時仲未戒奶，要等到佢出道先開展到，咁喺依段時間，英格蘭有乜可以做呢？
既然摘不到光榮的百合，何不摘取有刺的玫瑰。
本章完
