[歷史台]日不落的傳奇，大英帝國的故事（3）

隔離ceo=教皇

新讀者留名，毛巴終於有文，感動

焚書坑爹

隔離ceo=教皇

譯：方丈份人好小器㗎
原 post: https://www.reddit.com/r/CrusaderKings/comments/6ggqvx/ck2_has_some_useful_tips/

我對毛巴你

人類成日要我除眼鏡

毛巴返來嗱
有文出
等我搵返副眼鏡先

仲係咁高汁

咁東正教係幾時開始出現

咁東正教係幾時開始出現

Great Schism

咁東正教係幾時開始出現

Great Schism

religion reformation 500 年前

你唔跟天主教嗰套，有時俾唔信耶穌更可恨，內奸始終危險過外敵（好似係）。 情形就好似上討論區咁樣，當年論壇界高登獨大，巴絲打口中嘅開膠post就等於上高登。由於高登同當年嘅天主教會一樣太過不堪，於是彈出咗個連登，吸引大批信徒轉會，結果高登連登視對方為異端，喺度激烈互插，反而異教好似香討U汪等就好少（費時？)插。

Henry好快就遭到代價，教皇向佢頒布絕罰令，開除教籍。Henry真係多謝你都嚟唔切，再頒布幾條改革法例，進一步切斷國內神職人員同羅馬教廷嘅聯繫，教皇嘅敕令被禁止進入領土。教皇唔再係宗教領袖，咁阿頭依個位由邊個做？神父們你眼望我眼，諗住推舉其中一位做教會領袖。但其實Henry早有人選。

「朕來做！沒有嘗試過的人生，朕都想嘗試一下。」

於是佢喺1534年頒佈至尊法案（Acts of Supermacy），正式確立佢本人同將來嘅君主，就係英格蘭教會嘅最高領袖（Supreme Governor），英國國教嘅信仰守護者，最高主教都係坎特伯雷大主教，副手就係約克大主教。英格蘭宗教改革名義上完成，從此英格蘭再冇天主教廷，只有英國國教會（Church of England）。由於改革嘅性質同馬丁路德嘅宗教改革唔同，所以英國國教自成一派，稱之為聖公宗（Anglicansim），香港分部就係叫聖公會（Sheng Kung Hui），留意個英文名就係嚟自England嘅舊稱Anglia。

去到依度，小弟忍唔住要高歌一曲，識唱嘅一齊唱：美載鵝盛公共薈渴校，冧立幹舊， 怨近蜚盛， 半住忌毒薄礙淨身，lock聚困凝～


英格蘭君主兼任教會領袖


英國國教會

相比起從宗教角度出發嘅宗教改革（廢話），Henry嘅改革其實比較似政治改革，只係想擺脫羅馬教廷嘅影響，完全控制教會，順便方便佢溝女。英國國教其實換湯唔換藥，教義同天主教嘅相差無幾，只不過阿頭唔同咗，國王同宗教領袖係同一個人，可以記少個名，yeah。

之但係改革過程就換咗好多血啦，係鮮血。班神父就算幾貪錢都好，始終都要有專業操守，宗教係跟一世嘅。莫講話神父，你逼普通人突然轉教，佢哋真係會寧死不屈。於是乎有唔少神蹟人員因為唔肯轉教而遭到殺害，單係被天主教廷封為殉道者就有60人，仲未計唔出名嗰啲，同埋一大堆平民。當中包括名著「烏托邦」（Utopia）嘅作者，英格蘭大律師托馬斯．摩爾（Thomas More），摩爾係天主教忠實粉絲，喺擔任首席大法官期間，堅拒承認Henry同Catherine離婚嘅合法性，又拒絕向至尊法案宣稱，結果俾Henry以叛國罪為名處決，去天國搵佢嘅烏托邦。


托馬斯．摩爾

至於改革派先鋒丁鐸亦都難逃厄運。雖然佢寫嘅論文啟發Henry取代教皇，自己做宗教領袖，但係佢本人反對Henry離婚，仲長篇大論講點解反對。Henry理得你支持改革與否，總之阻住佢溝女就係死罪，佢認為丁鐸同禾路士大主教係一夥，於是派人到丁鐸匿藏地安特衛普，獲取丁鐸嘅信任然後再出賣佢，將佢交俾當地政府審判並處決。

丁鐸被處以火刑，臨死前向天呼喊：「上帝呀！請你讓英格蘭國王開眼吧。」（Lord！ Open the King of England's eyes。）


丁鐸之死

點解係咁回覆主題失敗

Henry隻眼就冇開，反而笑到見牙唔見眼－－佢終於可以同Anne名正言順翻雲覆雨。1532年，Henry同Anne秘密結婚，翌年獲得國教會承認並冊封為王后。1533年，Anne誕下第一個女Elizabeth，the Great Elizabeth。兩公婆（狗男女）度過一段快樂嘅時光。

小弟咁講得，當然就代表之後瀨嘢啦。Henry同Anne結婚，除咗因為佢好冧Anne之外，仲為咗佢幫自己生個仔出嚟。但係自從Anne生咗個女之後，佢就經歷一次流產，冇咗個仔，之後又生咗個仔出嚟，但又夭折咗。經歷過流產同孩子夭折嘅打擊，令人懷疑Anne仲有冇能力再生。Henry又開始胡思亂想，認為依段婚姻受到詛咒，於是開始冷落Anne。

其實Anne嘅性格亦係佢失寵嘅原因之一。佢入宮後盡顯奢華嘅作風，服飾首飾，室內裝潢，都要最豪華，搞到Henry花咗大量金錢去裝修宮殿。佢以前做開交際花，所以特別多嘢講，做咗王后之後不可一世，成日干涉朝政，對朝臣評頭品足。佢又同親戚私自分咗從教會充公得嚟嘅財富。英格蘭人民一向都唔妥Anne，認為佢係國王推行暴政，強行轉教嘅元兇，係國王隻雞（The king's whore）。Anne生唔到仔而被國王冷落後，直情遭到輿論嘅唾棄。國王唔鍾意，民眾唔支持，Anne嘅地位搖搖欲墜。

Henry失去對Anne嘅興趣，重新投入覓食之路。唔知佢係咪女僕控，Anne本身係前王后Catherine個女侍官，佢今次又睇上咗Anne個侍女珍．西摩（Jane Seymour）。Anne見到Henry同另一個女人阿珍搞上，即刻呼天叫地，要生要死咁樣。Henry不勝其煩，決定要了結依位曾經令佢愛到同教皇反面既女人。佢自稱佢當時受Anne既某啲法術迷惑，先會同對方結婚，並將Anne趕出宮，由阿珍頂上。

佢之後委派寵臣克倫威爾（Thomas Cormwell）處理Anne嘅收皮事宜。依位克倫威爾當日堅決擁護Henry嘅宗教改革，係改革過程中國王嘅頭馬，殺過唔少殉道者。但係佢最突出嘅貢獻係做龜公，幫Henry同Anne串針引線，之後成為Anne嘅重要盟友，幫協助王后干預朝政。

而家佢受國王所託，同Anne反目，幫Henry落埋最後一刀。克倫威爾展開對Anne既聆訊，老屈佢同Henry近臣通姦。最後，依位間接或直接導致英格蘭宗教改革，令到無數義士化忠魂嘅妖豔賤貨，喺成為王后短短三年之後，就被斬首示眾。歷史學界成日討論，為何Henry要做到咁絕，殺死舊愛，有人認為Heney性格暴戾，咁做合乎佢一貫作風，亦有人話係克倫威爾顧忌Anne勢力不斷膨脹，遲早會威脅到自己，於是煽風點火，造就妖豔賤貨之死。


首席大龜公法官克倫威爾


安妮博琳之死

總之淫婦已死，姦夫繼續上路。新王后阿珍好快就幫Henry生咗個仔愛德華，依個仔冇重蹈佢啲死鬼阿哥嘅覆轍，存活下來，日後會繼承老竇嘅王位。但係佢娘親就唔好彩難產而死。Henry悲痛欲絕，而且之後兩年都冇再娶新老婆。阿珍可以話係Henry嘅最愛，眾多老婆之中，就只有阿珍可以同佢合葬。


曾西摩

Henry始終都要一個新老婆，除咗因為龜公王克倫威爾係咁催促Henry再娶，亦因為英格蘭喺宗教改革後，被國際孤立，佢必需尋求盟友，而政治聯婚就係最佳方法。於是佢公開徵婚，又派出畫家團走訪歐洲王室，尋找靚女，再以畫像形式俾佢揀。

莫道你在選擇人，人亦能選擇你。Henry虐待老婆嗰朵傳遍歐洲，結果冇人睬佢。最後龜公克倫威爾r到個德國貴族女子，讚不絕口，同樣都係叫Anne（Anne of Cleves）。Henry睇過細Anne嘅畫像，覺得佢都算係眉清目秀，而且佢又信新教，於是就答應依門婚事。

新郎新娘直到結婚當日先首次見面。Henry一見到佢嘅未來老婆，當堂打咗個突：「媽呀！為什麼結果不像我想像那樣！」原來個畫家用咗美圖秀秀，真人樣衰過畫像好多，令到Henry喺婚禮當日已經萌生離婚之意。

事實證明細Anne完全唔夾Henry ，佢自小接受傳統婦女教育，有德但無才，對藝術一竅不通，又冇情趣。最慘係樣衰，Henry直情係「無法同佢產生任何關係」，莫非佢係英格蘭嘅欣宜？所以兩人結婚唔夠一年就離婚，不過Henry雖然唔想佢做老婆，但係真心欣賞佢嘅賢慧，於是認佢做乾妹，俾好日子佢過。


愚以為細Anne其實先係最正嗰個

不過佢就唔放過當日極力推薦細Anne嘅龜公倫啦。其實龜公倫作為改革急先鋒，走得太前，成日鼓吹進一步嘅改革，加強王權對宗教勢力嘅控制，諗住乘機打壓異己。點知跟車太貼，Henry唔想再大搞，佢就繼續搞呢搞路，亂惹麻煩，君臣之間早有嫌隙。細Anne事件成為導火線，佢嘅政敵趁機大造文章，話佢想染指國王家事。結果Henry拍板逮捕克倫威廉，審都唔審就斬咗佢頭。

兔死狗烹，克倫威爾慘變安全套，用完即棄。阿龜公倫，你唔駛咁灰，你嘅後代日後會同你報仇，直情推翻成個王室，雖然佢唔係為咗你。不過都係一百年後嘅事囉。

原來字數過多

留名

亨八真係傳奇嚟

原來護國公係佢後人

美載鵝盛公共薈渴校，冧立幹舊， 怨近蜚盛， 半住忌毒薄礙淨身，lock聚困凝～

師兄邊間教會

龜公倫竟然係克倫威爾既伏筆！
但斬既唔係亨利一族

Henry拍板逮捕克倫威廉，審都唔審就斬咗佢頭

打錯名了

美載鵝盛公共薈渴校，冧立幹舊， 怨近蜚盛， 半住忌毒薄礙淨身，lock聚困凝～

師兄邊間教會

究竟係咩歌

美載鵝盛公共薈渴校，冧立幹舊， 怨近蜚盛， 半住忌毒薄礙淨身，lock聚困凝～

師兄邊間教會

聖公會