第137章:
「查理,查理……你冇咩事啊嘛﹖」阿純問。
查理的傷已經重得連對答也支吾以對的,很難說得上冇事……
「你……你話呢﹖比人打到蜂巢咁。」查理說。
我跪在查理旁邊,忍著淚水說:「對唔住啊,我唔應該要你打啲咁難嘅敵人咖。我對你唔住,亦對水姐唔住,明明話過……唔得,我去問下其他人,睇下點樣可以救返你﹗」
查理拉一拉扯我衣袖,搖搖頭的說:「唔使喇,我自己知自己事……本來我都只係卒仔一個,多得隊長你睇得起我同水姐,如果唔係我一早就應該要死喇……」
「唔係咁咖,你地加入得刺客兄弟會,大家就係兄弟、姊妹……你地都唔係卒仔咁簡單。」我說。
「對唔住啊,隊長……成日陀手褦腳咁……可能冇左我嘅話,你地會行動得快啲。」他說。
「點會呢﹖雖然係有時係會闖禍,但係新人都咁咖啦……其實你知唔知我地都唔係啲咩老屎忽刺客,同埋……查理﹖查理﹗」查理還未聽完我說的話就死去了。
我嘆了一口氣,不禁擦了一下眼睛,替查理作上安息的儀式:「查理你絕對唔係拖後腿果個,只係……你喺錯嘅時間,同錯嘅領袖帶領下加入錯左我地姐……安息啦。希望你同水姐喺另一個世界生活得好啲。」
「阿隼……」阿純搭著我膊頭。
「幫我同埋其餘果幾個人做埋安息儀式,佢地都只係比人操控嘅旗子黎咋。」我向阿純說。
這段時間,我一直沉默著。究竟,我何德何能當上刺客大師這個位置﹖大家接二連三的被帶走,被攻擊,被殺死……
連自己的兄弟姊妹都保護不到,還做什麼大師……
「得喇,阿隼……阿隼﹖」這一下沉思,沉得就連阿純已經把儀式完全都不知道。
「哦……係啊……」我只簡單回應。
「阿隼,你……你唔好咁自責啦……我都唔知講咩好,但係我地宜家已經冇退路咖喇。我地仲要搵阮桐貴同方次郎佢地幫手咖。」阿純嘗試安慰我。
「阮桐貴……阮桐貴……」想起這個人,我的確有需要問一問他,為什麼會讓阿純和查理留在敵方陣營中,我不禁說:「唔得,我要去問清楚佢﹗」
「喂,喂……你冷靜啲先啦。」阿純嘗試把我叫著,可是不成功。